• "30 Тәуелсіздік жылдары"
  • 03 Наурыз, 2021

Оқуған адәм йәрдә қалмайду...

Қаттиқ сигнал берип, қуюндәк учқан тез ярдәм машинисини көргәндә, кимниңла болсун көңли пәришан болиду. «Улуқ Аллам өзәң яр-йөләк болғайсән!» дәп ичтин дуа қилип, аманчилиқни сораймиз. Әнди бир пәс өзимизни шу ғуюлдиған машининиң ичидики ақхалатлиқ адәмләрниң орниға қоюп көрәйличу?..

Сабирәм ӘНВӘРОВА,
«Уйғур авази»

Шу пәйт кимду-бириниң һаяти қил үстидә. Өмүр билән өлүм арисидики күрәштә һәр секунд қиммәт. Һаятниң қанунийити шуки, бирдә дәл вақтида йетип, бемарни аман елип қалсиңиз, бирдә сиздин бурун әзрайил периштиси йетип бериши мүмкин... 
Көрүп турғиниңиздәк, бу җәриянни пәрәз қилишниң өзи оңай әмәс. Амма тез ярдәм бөлүмидә хизмәт қилидиған һәр хадимниң һәрбир күни мана шундақ өтиду. Уларға жүкләнгән җавапкәрлик интайин жуқури. Шуңа, бу хизмәтниң жүкини көтириш үчүн инсанға дипломдин бөләк, «жүрәк» керәк. 
Яш болсиму, дәсләпки әмгәк йолини тез ярдәм станциясидә ишләштин башлиған бүгүнки қәһриманимиз Наргиза Турғанова - мустәқилликниң тәңтуши. У 1991-жили Уйғур наһийәсиниң Ақтам йезисида дунияға кәлгән. Аилисиниңла әмәс, жутдашлириниңму пәхригә айланған у кичигидинла тиришчанлиғи билән көпниң көзигә чүшүп, һәрхил конкурсларниң ғалиби атилиду. 
Ейтип өтүш керәкки, атиси Октябрь Һезимахунов узун жиллар бойи Ақтам оттура мәктивини башқурған мәрипәт беғиниң бағвини. Миллий роһни һәммидин үстүн қойидиған билимхумар аилидә тәрбийиләнгән қиз 2008-жили Алмута шәһиридә уйғур тили вә әдәбияти пәнлиридин өткән җумһурийәтлик олимпиадиға қатнишип, биринчи орунға еришиду. Қисқиси, Наргизаниң оқуғучилиқ дәвридә қол йәткүзгән утуқлири буниң билән чәклинип қалмайду. 
 Хәлқимиздә «Оқуған йәрдә қалмайду» дегән дана сөз бар. 2009-жили алтун угисини «Алтун бәлгүгә» тамамлап, чоң һаят қойниға учум болған Наргиза шу жили С.Асфендияров намидики Қазақ миллий медицина университетиниң умумий медицина факультетиға грантқа оқушқа чүшиду. 2014-жили алий билим дәргаһини әла баһаларға тамамлап, билимини техиму йетилдүрүш үчүн йәнә икки жил интернатурида оқуйду. 2016-жили терапевт мутәхәссислигини егиләп, әмгәк йолини Алмута шәһиридики 10-Тез медицинилиқ ярдәм көрситиш станциясидин башлайду.
– Дохтур болуш — мениң балилиқ арминим еди. Кәспий билим алғандин кейин тез ярдәм станциясидә ишләш қарариға келишимниңму өз сәвәви бар. Чүнки ярдәмгә муһтаҗ җанларға дәл вақтида йетип берип, бемарниң һаятини хәтәрдин сақлап қелишни пәқәт тез ярдәмдә ишләйдиған саламәтлик сақчилирила чоңқур һис қилалайду. Җавапкәрлигиниң үстүнлигидин қәтъий нәзәр, мәнму шу туйғуни сезинишкә бәл бағлидим. Шундақла мошу йолни таллиғиним үчүн һечқачан өкүнгән әмәсмән, – дәйду Наргиза.
Наргиза Турғанова 2016-жили өзи охшаш С.Асфендияров намидики Қазақ миллий медицина университетини тамамлиған Радик Абдукәримов билән аилә қуриду. 2018-жили пәрзәнтлик болуп, бала күтүми билән дәм елишқа чиққан яш келин өзини йеңи қиридин тонутуш ойиға келиду вә балилар массажи бойичә мәхсус билим елип, йәнә бир кәсипни қолға алиду. 
– Бурун бовақларға массажни момилири ясатти. Һә, һазир, буму заман тәливигә лайиқ пәйда болған кәсипниң бир түригә айланди. Һазирқи анилар балилириға массаж яситиш үчүн мәхсус билими бар мутәхәссисләргә мураҗиәт қилиду. Буниң сәвәви немидә? – дәп соридим униңдин.
– Һазирқи экологияни һалакәт гирвигидә дәп ейтсақ, хаталашмаймиз, – деди у биз билән болған сөһбәттә. — Шуңлашқиму бүгүнки күндә һәрқандақ ағриқлар билән туғулидиған сәбиләрниң сани өсмәктә. Көп әһвалда мана шундақ патологиялик ағриқларға муптула болған бовақларниң анилири дохтурларниң йолланмиси билән массажистниң ярдимигә тайиниду. Бүгүнки күн тәливи бойичә, һәрқандақ бала бир жилда йоқ дегәндә төрт-бәш қетим массаж елиши керәк. Массажниң пайдиси болмиса, зийини йоқ. Чүнки балиға массаж яситиш арқилиқ көплигән ағриқларниң алдини елишқа болиду. Шуниң үчүнму, пәрзәндиниң саламәтлигигә бепәрва қаримайдиған көзи очуқ анилар балилирини мәхсус билими бар мутәхәссисләргә апарғанни әвзәл көриду. Дохтур сүпитидә ейтарим, бу — интайин тоғра қарар.     
 
    

330 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы