• Тонушуп қоюң
  • 21 Сәуір, 2021

Тонушуп қоюңлар

Шөһрәт ИЛИЕВ, 1989-жили Уйғур наһийәсиниң Түгмән йезисида туғулған. 2007-жили йезидики оттура мәктәпни әла баһаларға тамамлап, Яркәнт гуманитарлиқ-техникилиқ колледжида тәһсил көриду. Һазир шәһиридики Мәсим Яқупов намидики 101-мәктәп-гимназиядә ишләватиду.
Шеирийәттә қәлимини синап келиватқан яш иҗаткарниң бир түркүм шеирлири ана тилимизда нәшир қилинидиған гезит вә журналларда йоруқ көрди. 1-синип оқуғучилири үчүн нәшир қилинған «Сават ечиш» дәрислигигә униң шеири киргүзүлгән. Шундақла у яшлар арисида аммибаплиққа айланған  бирнәччә нахша мәтининиң муәллипи.

Һәдәм хатирисигә
Тозуп кәтти сениң гүлдәк яшлиғиң,
Күндә жиғлап дәрия болди яшлирим.
Җеним һәдә барсам сени сеғинип,
Күтәр әнди үнсиз қәбир ташлириң.

Йоллиримға қарап мени күтәттиң,
Кирип кәлсәм хошал болуп кетәттиң.
Әнди сән йоқ өйлириңдә, җан һәдә,
Азапланди көйди жүрәк бу дәрттин.

Жирақ йолға меңип қалсам кечиләп,
Авайлап маң, укам, дәттиң җекиләп.
Қериндишим кичигимдин йөләк боп,
Жүргән едиң өзәң мени йетиләп.

Қәбир ташқа тамча яшлар төкүлүп,
Көп олтардим хиялларға чөмүлүп.
Һәдиҗаним, арманлириң көп еди,
Сениң билән кәтти йәргә көмүлүп.

Өйдә ялғуз акам жүрәр қан жиғлап,
Ата-ана, қериндашму «аһ» бозлап.
Сеғиништа сәнсиз мана жүримиз,
Һәдә, сени қәлбимиздә биз сақлап.

Сүритиңни елип бүгүн қолумға,
Ишәнмәймән, һәдә, сениң йоқуңға.
Көйүмчаним, меһриваним, ялғузум,
Дуа қилай әнди сениң роһуңға.

Бир достум бар

Бир достум бар, хатаримни тапидиған,
Бир достум бар, шу хатани япидиған.
Бир достум бар, тирәк болуп маңа дайим,
«Җан достум» дәп, лавлап туруп янидиған.

Бир достум бар, сүйүм болуп ақидиған,
Бир достум бар, мени чәткә қақидиған.
Бир достум бар, қайғу чүшсә гәр бешимға,
Қериндаштәк бар меһрини яқидиған.

Бир достум бар, өз сирини ачидиған,
Бир достум бар, ярдәм десәм қачидиған,
Бир достум бар, пурсәт тапса, илан кәби
Зәһирини маңа қарап чачидиған.
 

493 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы