• Җәмийәтлик тәшкилатларда
• 06 Мамыр, 2021

Уйғур мәктәплиригә һәмкарлишиш штаби қурулди

Шәмшидин АЮПОВ, 
«Уйғур авази»
Өткән җүмә күни җумһурийәтлик Уйғур этномәдәнийәт мәркизи бюросиниң жиғини болуп өтти. Униңға мәркәзниң бир түркүм башқарма әзалири вә башқиму җәмийәтлик ишларниң активистлири қатнашти. Баш қошуш бүгүнки күн тәләплиригә мувапиқ, юмшитилған карантин қаидилиригә әмәл қилған һалда өткүзүлди. 
Жиғинни ҖУЭМниң иҗраий мудири Зихруллам Қурванбақиев киришмә сөз билән ечип, жиғилғанларға күн тәртивидә бирла мәсилә —ҖУЭМ йенида уйғур тилида билим беридиған мәктәпләр билән һәмкарлишиш штабини қуруш екәнлигини ейтти вә ушбу мәсилиниң мәзмун-маһийитини чүшәндүрди. 
Шуниңдин кейин ҖУЭМ йенидики Жигитбашлири кеңишиниң рәиси Ярмәһәмәт Кебиров бу вәзипигә җәмийәтлик ишларда мол тәҗрибигә егә, «Уйғур авази» гезитиға муштири топлаш бойичә қурулған штабни икки жил башқуруп, жуқури нәтиҗә қазанған «Туран дунияси» түркий хәлиқләр мәдәнийити җәмийәтлик фондиниң мудири Карлин Мәхпировниң намзитини тәвсийә қилди. 
Жиғин иштракчилириниң қоллап-қувәтлиши билән Карлин Мәхпиров (сүрәттә) ҖУЭМ йенидики Уйғур мәктәплири билән һәмкарлишиш штабиниң рәиси болуп сайланди. 
Баш қошуш җәриянида сөз новитини алған җумһурийәтлик Уйғур этномәдәнийәт мәркизиниң рәиси, ҚХА Кеңишиниң әзаси Шаһимәрдан Нурумов, ҖУЭМниң Алмута шәһәрлик шөбиси рәисиниң орунбасари, көрнәклик меценат Долқунтай Абдухелил, «Уйғур авази» гезитиниң баш муһәррири, ҖУЭМ рәисиниң орунбасари Ершат Әсмәтов, ҚУЯБ рәиси Рустәм Хәйриев, Маарип кеңишиниң рәиси Шерипҗан Илияров вә мәзкүр қурларниң муәллипи Карлин Нурдуноғлиниң мәзкүр штабниң рәисигә жүклинидиған җавапкәрликниң һөддисидин толуқ чиқалайдиғанлиғиға ишинидиғанлиғини билдүрди. Өзигә үмүт артқан көпчиликкә рәхмәт ейтқан Карлин Мәхпиров штаб рәиси болуп пәқәт бир жил ишләшкә тәйяр екәнлигини изһар қилди.
Баш қошуш давамида маарип, мәдәнийәт, мәтбуат вә башқиму миллий тәрәққиятимизға даир мәсилиләр әтрапида көпчиликниң тәклип-пикирлири тиңшалди. Миллий урпи-адәтлиримизни, мәдәнийитимизни риваҗландуруп, келәчәк яшлиримизниң пухта билим елишиға болған иштияқини ойғитиш вә уларни Қазақстан вәтәнпәрвәрлиги роһида тәрбийиләш, иҗадий ишләватқан муәллимләр билән қабилийәтлик оқуғучиларни рәғбәтләндүрүш охшаш муһим мәсилиләр бойичә пайдилиқ пикир-тәклипләр ейтилди.