• Хәйрихаһлиқ
• 13 Мамыр, 2021

Яхшилиқниң әтә-кечи йоқ

Мусулман инсанниң әң асасий хисләтлириниң бири – меһриванлиқ. Йәни башқиларға яхшилиқ қилип, ғәмғор болуштур. Биригә яхшилиқ қилиш үчүн бай болушимиз яки муһтаҗларға өй селип берип, көп мөлчәрдә ахча ианә қилишимиз шәрт әмәс. Әң муһими, пак нийәт. Чин нийитимиз билән қилған һәрқандақ яхши амалимизниң совави мол болиду. Һетахун Бәкриев башқуруватқан «Әвлия чоққа» корпоративлиқ фонди тәрипидин уюштурулған новәттики хәйрихаһлиқ чарә-тәдбир сөзүмизгә җанлиқ асас болалиса керәк. 

Сабирәм ӘНВӘРОВА,
«Уйғур авази»

Ениғирақ ейтсақ, «Әвлия чоққа» корпоративлиқ фондида хизмәт қилидиған иҗтимаий хадимлар яхши ай, яхши күнләрдә имканийити чәкләнгән  инсанлар үчүн ахча топлап, төрт аилини бираз вақитқа йетидиған озуқ-түлүк билән тәминлиди. Йәнә келип, имканийити чәкләнгән җанларға қарайдиған 74 хадим мошундақ изгү ишни һәр айда әмәлгә ашуруп туруш нийитини билдүрмәктә.
–  «Тама-тама көл болур» демәкчи, көпниң күчидә жиғилған ахча билән һәр айда ярдәмгә муһтаҗ аилиләргә ярдәм көрситип турсақ дәймиз. Әпсуслинарлиғи, җәмийитиздә жилдин-жилға имканийити чәкләнгән җанларниң қатари көпәймәктә. Уларни маддий вә мәнивий җәһәттин қоллаш – бизниң асасий мәхситимиз,  – дәйду Һетахун ака Бәкриев. 
Хуласиләп кәлгәндә, хәйрихаһлиқ қилиш үчүн макан-җай, пул яки вақитни таллавелиш һаҗәт әмәс. Мәйли Розида болсун яки Розидин кейин болсун, яхшилиқниң әтә-кечи йоқ...