• Йеңилиқлар
  • 10 Ақпан, 2012

Мәктәп қурулуши қайта қолға елинди

Кеңәш дәвридә аяқлашмай, түзүм өзгәргәндин кейин мәбләғ мәсилисигә бағлиқ тохтитилип қоюлған беналарниң қурулуш ишлири бүгүнки күндә қайта қолға елинмақта. Уйғур наһийәсидиму мундақ беналар көпләп санилиду. Чонҗа йезисидики қурулуши аяқлашмиған мәктәп бенаси шу җүмлидин. Һазир униң қурулуши қайта қолға елинди. Шуниңға мунасивәтлик биз наһийә һакиминиң орунбасари Қуралбек Бекмуханбетовқа йолуққинимизда, төвәндикиләрдин вақип болдуқ. Мәзкүр мәктәп қурулушини қолға елиш мәсилиси вилайәт дәриҗисидә муһакимә қилинғиниға хелә вақит болған көрүниду. Чүнки, шу пәйтләрдила Чонҗа йезиси аһалисиниң көпийиши сәвәвидин, моҗут болуп турған билим дәргаһлири уларниң еһтияҗини толуқ қанаәтләндүрүш үчүн йәткүлүксиз болған. Һазир мәктәп қурулушиға җумһурийәт бюджетидин 932 миллион 653 миң тәңгә мәбләғ аҗритилди. Униң 771 миллион тәңгиси пәқәт қурулуш-монтаж ишлириға сәрип қилинмақчи. Қурулуш ишлирини жүргүзүш һоқуқини тендер усули арқилиқ йеңивалған Алмута шәһиригә қарашлиқ «Ник» қурулуш мәһкимисидә мошу күнләрдә 150 қурулушчи ишләватиду. Уларниң 120си жутдашлиримиз. Мошу күнләрдә қурулуш мәһкимиси ейиға 90 миллион тәңгә әтрапида мәбләғ өзләштүрүватиду. Гәрчә, ишниң сүръити мошундақ давамлишидиған болса, мәһкимә рәһбәрлиги бәргән вәдисиниң һөддисидин шәрәплик чиқидиғини талашсиз. Чүнки бүгүнки дәвир тәләплиригә толуқ җавап беридиған заманивий 550 орунлуқ мәктәп бенаси йеңи оқуш жилида пайдилинишқа берилиду дәп күтүлмәктә. Буниңдин башқа җумһурийәт Президентиниң Қазақстан хәлқигә йоллиған бийилқи Мәктүбидә ейтилған бәзи көрсәтмиләр бойичә наһийәдә бир қатар ишлар һазирниң өзидила қолға елинди. Мәсилән, йеқинқи өтмүштә шәхсийләргә сетилип кәткән дөләт мүлүклирини қайта һөкүмәт қармиғиға өткүзүш чарилири әмәлияттин өз ипадисини тапмақта. Мәсилән, 90 орунлуқ «Березка» балилар бағчисини қайта тикләшкә вилайәт бюджетидин 120 миллион тәңгә мәбләғ бөлүнгән. Уни күзгичә пайдилинишқа бериш көздә тутулуватиду. Түгмән вә Чарин йезилиридики оттура мәктәпләрдә мурәккәп җөндәш ишлирини жүргүзүшкә 100 вә 200 миллион тәңгә мәбләғ бөлүнди. Наһийәдә турушлуқ өй мәсилисигә бағлиқ вилайәт һакимийитигә қилинған мураҗиәтләр җавапсиз қеливатқини йоқ. Униң бюджетидин аҗритилидиған мәбләғ һесавиға Чонҗа йезисидики көп пәтирлик икки өйниң бири ремонтлинип, пайдилинишқа берилмәкчи. Пат-йеқинда 80 аилә турушлуқ өй билән тәминлиниду дегән сөз. Шундақла наһийәмизниң тағ бағриға җайлашқан йезилирида ичидиған су, йол вә кочиларни җөндәш һәм йоруқлуқ билән тәминләш мәсилилирини һәл қилиш қолға елинмақчи.

Махмут ИСРАПИЛОВ.

Уйғур наһийәси.

747 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы