• Әхбаратлар еқими
  • 10 Маусым, 2021

Бу қетим Уйғур наһийәсидә болди

Оқурмәнләргә мәлумки, буниңдин бир ай бурун ҖУЭМ йенида Уйғур мәктәплири билән һәмкарлишиш штаби қурулған еди. Мәзкүр штабниң рәиси, «Туран дунияси» түркий хəлиқлəр мəдəнийити” җəмийəтлик фондиниң мудири Карлин Мəхпиров башқурған топ әзалири бу қетим Уйғур наһийәсигә қәдәм тәшрип қилип, оқутуш уйғур тилида жүргүзүлидиған жигирмә бир билим дәргаһиниң мудирлири вә жут активистлири билән учрашти. Карантин тәләплиригә бағлиқ чәклик адәм сани билән өткән қисқа, амма мәзмуни чоңқур учришишлар җәриянида штабниң асасий мәхсити чүшәндүрүлүп, һәр йезидин штаб әзалири сайланди. 

Сабирәм ӘНВӘРОВА,
«Уйғур авази»

 
Карлин Мәхпиров башлиған штабниң әзалири Рəхмəтҗан Йүсүпов, Шəмшидин Аюпов, Рəхмəтҗан Ғоҗамбəрдиев авал наһийәлик билим бөлүминиң башлиғи Адилҗан Һашировниң һозурида болди. Икки тәрәп арисида болған өзара сөһбәттә Адилҗан Мутлахуноғли Уйғур мәктәплири билән һәмкарлишиш штабини қоллап-қувәтләйдиғанлиғини, бирлишип паалийәт елип беришқа һәрқачан тәйяр екәнлигини ейтти. Билим бөлүмидин чиққан топ дәсләп Чонҗа йезисидики уйғур мәктәплиридә болуп, андин Баһар, Таштиқарису, Чарин, Шерин, Узунтам жутлириға қарап атланди. 
Штаб әзалири 5-Чонҗа оттура мәктивиниң мудири Лейла Тейипова, И.Бәхтия намидики 3-Чонҗа оттура мәктивиниң мудири Шерзат Бабаханов билән учришип, 9 — 11-синипни пүтәргән оқуғучиларға кәсип таллашта ярдәмлишиш, мәктәпкә бала топлаш мәсилилирини оттуриға қойди. 
Чонҗа йезисида мәктәпкә бала топлаш бойичә қурулған штабниң әзалири болуп Адаләт Иминова, Муһидин Розахунов, Гүлвира Мәңсүрова, Мирзәхмәт Гайитов, Мирзәхмәт Мерашимов сайланди. 
А.Розибақиев намидики Баһар оттура мәктивиниң мудири Суджата Имиршаева, Таштиқарису оттура мәктивиниң мудири Берикбол Атагелдиев, М.Һәмраев намидики Чарин оттура мәктиви мудириниң оқуш ишлири бойичә орунбасари Шөһрәт Тохтиев вә илмий ишлар бойичә методисти Арупҗан Розиев, шундақла Ширин оттура мәктивиниң мудири Селимәм Һапизова вә мудирниң оқуш ишлири бойичә орунбасари Ваһидин Аваков, Узунтам оттура мәктиви мудириниң оқуш ишлири бойичә орунбасари Адилҗан Тохсуновму штаб әзалирини иллиқ күтүвелип, бирлишип ишләшкә һазирлиғини тәкитлиди.
Хош, Баһар йезисидин Бәхтинур Ғәниева, Сәйдәхмәт Мирзәхмәтов, Таштиқарису йезисидин Динара Ерғалиқизи, Асимҗан Һашимов, Чариндин Зоһра Палтахунова, Азиза Маһидинова, Шериндин Нурбүви Турғанова, Нурмәһәмәт Илиясов, Узунтамдин Шахризадәм Сонурова, Маһинур Розахунова штаб әзалири болуп сайланди. 
Тәкитләш керәкки, штаб әзалири уйғур аилисигә келин болуп чүшкән қазақ қизи Динара Ерғалиқизиниң ана тилимизға болған чәксиз һөрмити вә униң пәрзәнтлирини уйғур синипида оқутуватқанлиғини аңлап, толиму мәмнун болушти. Йәни, өз тилимизниң қәдригә өзимизниңкиләр йетәлмәйватқан пәйттә, қериндаш қазақ қизиниң балилириниң өз ана тилида билим елишиға чоңқур көңүл бөлүши көпчиликни тәсирләндүрди. 
4-юнь күни штаб әзалири Ғалҗат йезисидин Дардамтуғичә болған мәктәпләрни арилиди. Ғалҗатта штаб әзалирини мәктәп мудири Мәһәмәтҗан Абдурусулов, йезилиқ Ханим-қизлар кеңишиниң рәиси Гүлсара Баратова билән жигитбеши Махмут Турдиев қарши алди. Модератор, «Уйғур авази» гезитиниң бөлүм муһәррири Шәмшидин Аюпов Штаб әзалирини тонуштуруп өткәндин кейин, штаб рәиси Карлин Мәхпиров мәзкүр сәпәрниң мәхсити вә штабниң вәзипилири, келәчәктә атқурулидиған ишларниң реҗилири һәққидә тохталди. 
Бу йезида Гүлсара Баратова билән Махмут Турдиев штаб әзаси болуп сайланди. 
Чоң Дехан вә Кичик Дехан йезилиридики билим дәргаһлирида болған штаб әзалири авал Чоң Дехан оттура мәктивиниң мудири Гүлшат Оңласынова билән, андин М.Тейипов намидики Кичик Дехан оттура мәктиви мудириниң тәрбийә ишлири бойичә орунбасари Шатлиқ Һәвәйдуллаев билән сөһбәтлишип, жут активистлири билән айрим учрашти. Штаб әзалири болуп Чоң Дехан йезисидин Гөһәрхан Һәмзәкова билән Муһидин Анайәтов, Кичик Дехан йезисидин Һәмраҗан Әмәтов билән Гүлчеһра Розиева сайланди. 
Новәттики учришиш Кәтмән жутида давамлашти. Штаб әзалири билән йеқиндин тонушқан М.Җәлилов намидики Кәтмән оттура мәктиви мудириниң вәзиписини вақитчә атқурғучи Жеңис Шарипғожаев узун йолдин улуқ мәхсәттә кәлгән зиялилар билән һәмкарлиқта иш елип беришқа тәйярлиғини билдүрди. Бу йезида мәктәпкә бала топлаш бойичә қурулған штабниң әзалири болуп Гүлбаһар Муфтуллаева билән Райгүл Һезимова сайланди. Сәпәр давамида Шуңқар оттура мәктивиниң мудири Бейбит Алғазиев биләнму сөһбәт жүргүзүлүп, штабниң мәхсити чүшәндүрүлди. 
Довун йезисиға қәдәм тәшрип қилған Штаб әзалири мәктәп мудири Халима Малыбаеваниң кабинетида баш қошти. Жут активистлири Әзиз Розахунов билән Арзигүл Турсунова мәктәпкә бала топлаш бойичә қурулған штабниң әзаси болуп сайланди. 
Ардолата йезисидики учришишта Алмутидин кәлгән меһманларни мәктәп мудири Дамир Амаров иллиқ күтүвалди. Бу йәрдиму штабниң мәхсити вә келәчәккә реҗилигән ишлири һәққидә әтраплиқ чүшәнчә берилип, андин штаб әзалири болуп Қасимахун Һәмәев, Росхан Бишәрова сайланди. 
Ғалҗат йезисидин башланған сәпәр Дардамту йезисидики учришиш билән ахирилашти. Дардамту йезисида өткән учришишқа мәктәп мудири Ваһитҗан Һосманов, мудирниң оқуш ишлири бойичә орунбасари Әркин Злавдинов вә жигитбеши Селимахун Әлаев қатнашти. Бу йезида мәктәпкә бала топлаш бойичә қурулған штабниң әзалири болуп Саһирәм Әлаева билән Әршидин Ибдиминов сайланди. 
Сәпәрниң үчинчи күни Ақтам йезисидики учришиштин башланди. Бу йәрдиму мәктәп мудири вә жут активистлири билән һәмсөһбәттә болди. Ақтам йезисида мәктәпкә бала топлаш бойичә штаб қурулуп, униң әзалири болуп Нурахун Дуганов билән Аршалим Дәвләтов сайланди. 
Түгмән уйғур оттура мәктивидә өткән учришишқа мәзкүр мәктәпниң мудири Меһирдин Хоҗаев, Түгмән йеза округиниң һакими Миршат Насиров, йезилиқ Нураний анилар кеңишиниң рәиси Бүвипатәм Абдуллаева, жигитбеши Йолдаш Исламов иштрак қилди. Түгмәндә штаб әзалири болуп Бүвипатәм Абдуллаева билән Дилмурат Тейипов сайланди. 
Түгмәндин чиққан штаб әзалирини Һ.Искәндәров намидики Ават оттура мәктивиниң мудири Ришат Розахунов билән йеза һакими Равиль Анадуллаев қарши алди. Жут активистлири Ғоҗәхмәт Ниғмәтов билән Зорәм Саттарова штабниң Ават йезисидики әзалири болуп сайланди. Дәл мошундақ учришиш Долата йезисида давамлашти. Долата оттура мәктивиниң мудири Сатурин Розахунов штаб әзалириниң паалийитини қоллайдиғанлиғини ейтти. Қурванҗан Үсәнов билән Адаләт Тохтиямова Долата йезисида мәктәпкә бала топлаш бойичә қурулған штабниң әзалири болуп сайланди. 
Штаб әзалири Кичик Ақсу оттура мәктивиниң мудири Тохтахун Қадиров билән учришип, сөһбәтләшти. Кичик Ақсу йезисида мәктәпкә бала топлаш бойичә штаб қурулуп, униң әзалири болуп Замирәм Қадирова билән Адилҗан Сабитов сайланди. 
Чоң Ақсудики учришишқа Ғ.Сәдвақасов намидики оттура мәктәпниң мудири Әзиз Дәраев, жут активистлири вә 9 — 11-синипларниң синип йетәкчилири билән уйғур тили вә әдәбияти пәнлириниң муәллимлири қатнашти. Штаб әзалири болуп Турғанҗан Имиров, Илпәтхан Замандинова вә Надирәм Илахунова сайланди. 
Ахирқи күндики ахирқи учришиш Қирғизсай оттура мәктивидә уюштурулди. Мәктәп мудири Илияс Мураталиев вә жигитбеши Алилҗан Һәмраев штабниң бу изгү паалийитини қоллап-қувәтләп, мәктәптә уйғур синиплириниң ечилиши үчүн зиялиларниң ярдимигә муһтаҗ екәнлигини ейтти. Ениғирағи, Қирғизсай оттура мәктивидә һазир пәқәт бирла уйғур синипи (10-синип) моҗут болуп, жут җанкөйәрлири уйғур синипини ечишқа хелидин бери тәлпүнүп, тиришип келиватсиму, нәтиҗә чиқмайватқанлиғини йошурмиди. Қирғизсай йезисида мәктәпкә бала топлаш бойичә штаб қурулуп, униң әзалири болуп Тамара Азнибақиева, Турдибүви Ахметова вә Әзиз Алдияров сайланди.
Жигирмә бир жутта өткән учришишта штаб әзалири йеқин арида елимиздики алдинқи қатарлиқ ондин ошуқ алий оқуш орунлириниң оқутқучи-профессорлирини вә жуқурида аталған мəктəплəрниң 9 — 11-синип учумкарлирини вə уларниң ата-анилирини, шундақла пəн муəллимлирини җəлип қилған һалда кəсип таллаш бойичə ZOOM суписи арқилиқ чоң учришиш уюштуридиғанлиғи келишилди.
ҖУЭМ йенидики Уйғур мәктәплири билән һәмкарлишиш штаби әзалириниң Уйғур наһийәсидики мәлиләрниң җамаәтчилик вәкиллири билән болған учришишлирида «Мектеп» нәшрияти Уйғур редакциясиниң башлиғи Рәхмәтҗан Ғоҗәмбәрдиев оқуғучиларниң һаҗәтлик оқуш қураллири билән тәминлиниши, филология пәнлириниң намзити Рәхмәтҗан Йүсүпов иҗадий ишләватқан муәллимләр билән оқуғучиларниң әмгәклиригә тәқриз йезишта ярдәмлишиш вә башқиму маарипимизға аит мәсилиләр бойичә қисқичә әхбарат бәрди. 
Сөз ахирида, мустәқил әлниң әвлатлириниң кәспий билим егиләп, җәмийәткә ярамлиқ шәхсләрдин болуп йетилип чиқишини көздә тутқан ҖУЭМ йенидики Уйғур мəктəплири билəн һəмкарлишиш штабиға үч күн бойи йол көрситип, йенидин тепилған миллий маарипимиз вә мәтбуатимизниң җанкөйәрлири, наһийәлик «Нураний анилар» кеңишиниң рәиси Зиләхәм Җәлилова вә униң йолдиши, һөрмәткә сазавәр жут мөтивәри Һапиз Җәлилов, Арзигүл Сулайманова вә Гүлминәм Тохтаеваниң әмгигини алаһидә атап өткән орунлуқ. Шундақла, жирақта жүрсиму, сәпиримизниң утуқлуқ өтүшигә маддий вә мәнивий ярдәм көрсәткән Долқунтай Абдухелил, Ярмәһәмәт Кебиров, Әбәйдуллам Җаппаров, Ершат Әсмәтов вә Мәхсәтҗан Қаһаров қатарлиқ милләтпәрвәр әзимәтлиримизниң исим-шәрипини миннәтдарлиқ илкидә тилға елишқа әрзийду. 
Хәйрият, штаб әзалири пәқәт кәсип таллаш вә бала топлаш мәсилилири биләнла чәклинип қалмиди. Улар оқуғучиларниң үлгирими, учумкарларниң Биртуташ миллий тестқа қатнишиши, уйғур синиплириниң пəн муəллимлири вə һаҗəтлик оқуш қураллири билəн тəминлиниши, уйғур синиплириға бала топлаш, уйғур тилида нəшир қилиниватқан гезит вə журналларниң муштири санини көпәйтиш қатарлиқ муһим мәсилиләрниму муһакимә қилди. 
Шундақ қилип, Уйғур наһийәсиниң жигирмә бир йезисида қурулған штабниң кураторлири болуп яритилиши аҗиз болсиму, жүриги батур анилиримиз Зиләхәм Җәлилова билән Гүлминәм Тохтаева бәкитилди. 
 Улуқ мутәпәккүр алим Йүсүп Хас Һаҗипниң «Өзәңниң пайдисини ойлима, хәлқиңниң пайдисини ойла, хәлқиңниң пайдисиниң ичидә сениңму пайдаң бар», дегән дана сөзи бар. Бир сөз билән ейтқанда, хәлиқниң пайдиси үчүн йолға чиққан ҖУЭМ йенидики Уйғур мәктәплири билән һәмкарлишиш штаби әзалириниң йеза-йезиларни арилап, учришиш өткүзүши хәлиқни ойғитип, келәчигимизгә тосалғу болидиған «кона кесәллиримизни» давалашқа роһ бәрди. 

472 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы