• Әхбаратлар еқими
• 10 Маусым, 2021

Қазақстан тәшәббуслирини қоллап-қувәтләйду

Қазақстан Президенти Қасым-Жомарт Тоқаев БМТ Баш кативи Антониу Гутерриш билән видеоконференцалақә тәртиптә учришип, музакириләрни жүргүзди.
Музакириләр давамида Қазақстанниң БМТ билән һәмкарлиғиниң муһим йөнилишлири қаралди. Пандемиягә қарши туруш, климатниң өзгиришигә қарши күришиш, шундақла регионлуқ бехәтәрлик һәм турақлиқни тәминләш бойичә бирләшкән күч-қувәтләргә алаһидә диққәт ағдурулди.
Президент Қазақстанниң Антониу Гутерришниң намзитини иккинчи қәрәлгә БМТ рәһбири лавазимиға сайлинишини қоллап-қувәтләйдиғанлиғини тәстиқлиди.
 Сөһбәтдашлар Авғанстандики вәзийәт нуқтәий нәзәридин регионлуқ бехәтәрлик вә турақлиқни тәминләш мәсилилирини тәпсилий қарап чиқти. Дөләт рәһбири Қазақстанниң Авғанстанға ярдәм қилишни давамлаштурушқа вә мошу мәмликәттә турақлиқни әслигә кәлтүрүшкә қаритилған хәлиқара иш-һәрикәтләргә қатнишишқа тәйяр екәнлиги тоғрилиқ билдүрди. Бу йосунда БМТ Баш кативи Мәркизий Азия дөләтлириниң, җүмлидин Қазақстанниң мошу җәриянни илгирилитиштә чоң роль ойнаватқанлиғини тәкитлиди.
Қасым-Жомарт Тоқаев БМТ Баш кативини таҗсиман вирусқа қарши туруш бойичә көрүлүватқан чариләр, җүмлидин ички “QazVac” вакцинисиниң ишләп чиқирилиши, мошу жилниң ахириғичә мәмликәт аһалисиниң 55 пайизға йеқинини вакцинилаш планлири тоғрилиқ хәвәрдар қилди. Антониу Гутерриш Қазақстанниң ковидқа қарши препаратиниң ишләп чиқирилишини вә аммивий вакцинилаш кампаниясиниң утуқлуқ кетип барғанлиғини алқишлиди. 
БМТ Баш кативи Қазақстанниң Деңизға чиқиш йоли йоқ тәрәққий етиватқан дөләтләр топиға киридиған мәмликәтләр мәнпийәтлирини қоғдашқа қаритилған тәшәббуслирини иҗабий баһалиди, бу болупму пандемия пәйда қилған боһран шараитида алаһидә муһимдур.
Қазақстан Президенти ноябрь ейида Глазгода өтидиған “COP-26” Дуниявий климат конференциясигә қатнишиш нийити тоғрилиқ хәвәр қилди. Мәзкүр конференциядә 2060-жилға қәдәр Қазақстанниң углеводородтин бетәрәп мәмликәт болушни қолға кәлтүрүш бойичә йеңиланған миллий чарилири елан қилиниду.
Антониу Гутерриш Қазақстанниң ядроға қарши аләмшумул мәсилини илгирилитиштики лидерлиғини жуқури баһалиди.
Қасым-Жомарт Тоқаев БМТ Баш кативини бийил август ейида мәмликитимиздә өтидиған Шәмәй полигониниң йепилғиниға 30 жил толушиға беғишланған хәлиқара конференциягә қатнишишқа тәклип қилди.
 Тәрәпләр сөһбәт ахирида өзара қизиқиш һасил қилидиған мәсилиләрниң кәң даириси бойичә қоюқ алақиларни давамлаштурушқа келишти.