• Җәмийәтлик тәшкилатларда
• 16 Маусым, 2021

Яркәнт тәвәсидә болди

Карлин Мәхпиров башқурған ҖУЭМ йенидики Уйғур мәктәплири билән һәмкарлишиш штабиниң әзалири дүшәнбә күни Панфилов наһийәсигә қәдәм тәшрип қилди. Штаб әзалири икки күн давамида Яркәнт тәвәсидики оқутуш уйғур тилида жүргүзүлидиған 14 мәктәп мудири вә миллий мәдәнийитимизниң җанкөйәрлири, җәмийәтлик ишларниң активистлири билән учришип, штабниң мәхсити вә вәзипилири, келәчәктә наһийә даирисидә әмәлгә ашурулидиған ишлар тоғрисида сөһбәтләшти. Худди башқа җайлардикигә охшаш, Яркәнт тәвәсидиму штаб әзалири сайлинип, ишқа киришти.

Гөһәрбүви ИСМАЙИЛҖАНОВА, 
«Уйғур авази»

 Карлин Мәхпиров рәһбәрлигидики штаб әзалири Шаймәрдан Шәрипов, Абләһәт Камалов, Рәхмәтҗан Йүсүпов, Рәхмәтҗан Ғоҗәмбәрдиев, Шәмшидин Аюпов вә Панфилов наһийәлик Уйғур этномәдәнийәт мәркизи рәисиниң вәзиписини атқурғучи Азат Гайитовни дәсләп Панфилов наһийәлик ички сәясәт бөлүминиң башлиғи Марат Илипов қобул қилди. Марат Тайлақоғли көпмилләтлик тәвәдики әзәлдин қелиплашқан достлуқ, милләтләрара разимәнликни тилға елип, Уйғур мәктәплири билән һәмкарлишиш штабиниң әзалириниң қолға алған ишлириға утуқ тилиди. 
 Штаб әзалири шундақла Панфилов наһийәлик билим бөлүминиң башлиғи Турар Қастеевниң һозурида болуп, сөһбәтләшти. Турар Қастеев наһийәдики маарип саһасида пандемия вақтидиму өткән оқуш жилида муәллимләр билән оқуғучиларниң һәрхил вилайәтлик, җумһурийәтлик онлайн, офлайн байқашларға, пән олимпиадилириға вә илмий лайиһиләргә қатнишип, қолға кәлтүргән утуқ-муваппәқийәтлири һәққидә әхбарат берип, штаб ишини қоллап-қувәтләйдиғанлиғини билдүрди. 
 Шуниңдин кейин бир түркүм алимлардин тәркип тапқан штаб әзалири өз ишини наһийәдики таза уйғуртиллиқ, мутәпәккүр Билал Назим намидики мәктәптин башлиди. Мәзкүр мәктәп мудири Шеринай Һасанова штаб әзалирини иллиқ қарши елип, һәмкарлиқта иш елип баридиғанлиғини билдүрди. Наһийәлик уйғур мәдәнийәт мәркизи рәисиниң орунбасари Маһинур Аюпова билән наһийәниң баш жигитбеши Аблеким Қурбанов вә Яркәнт шәһириниң жигитбеши Рустәм Тайиров биләнму сөһбәт жүргүзүлди. 
 Билал Назим намидики мәктәп йенида мәктәпкә бала топлаш штабиниң әзалири болуп Айшигүл Баратова билән Айшигүл Һәмраева сайланди .
 Новәттики учришиш шәһәрдики йәнә бир таза уйғуртиллиқ, ғәзәлхан-шаир, устаз Хелил Һәмраев намидики мәктәптә давамлашти. Алмутидин қәдәм тәшрип қилған алимлар мәктәп мудири Зенәтбүви Баратова билән учришип сөһбәтләшкәндин кейин, мәктәпниң өтмүши вә бүгүнки нәпәси билән йеқиндин тонушуп, кәң, азадә синипларни зиярәт қилди. Мәктәп мудири штаб әзалириниң ишлирини қоллап-қувәтләйдиғанлиғини билдүрди. Штаб әзалири бу билим дәргаһидиму пешқәдәм устаз, мәзкүр мәктәпниң ата-анилар комитетиниң рәиси Алимҗан Ташмәтов вә Яркәнт шәһириниң жигитбеши Мухпул Розашев билән учришип, сөһбәтләшти. Хелил Һәмраев намидики мәктәпкә бала топлаш бойичә штаб қурулуп, униң рәислигигә Меликәм Нурахунова, орунбасари болуп Гүлшат Һакимова сайланди.
 Яркәнт шәһиридики Әмгәкчи оттура мәктивигә қәдәм тәшрип қилған штаб әзалирини мәктәп мудири Ғалымжан Рыспаев орунбасарлири билән иллиқ қарши алди. Мудир йеңидин мурәккәп җөндәштин өткүзүлгән мәктәпниң бүгүнки нәпәси вә билим сапаси, көрсәткүчлири билән тонуштурди. Учришишқа Әмгәкчи мәһәллисиниң жигитбеши Абдуһемит Һәмраев қатнашти.
 Әмгәкчи оттура мәктивигә бала топлаш штабиниң рәиси Ипарәм Һасанова, орунбасари болуп Диләрәм Мәңсүрова сайланди. 
 Шәһәрдики үчтиллиқ Җамбул намидики оттура мәктәптә болған учришишта мәктәп мудири Гүлвира Муфтахтинова Штаб билән һәмкарлиқта иш елип баридиғанлиғини билдүрүп, штаб әзалириниң қолға алған ишлириға утуқ тилиди. 
 Шуниңдин кейинки учришиш тағ бағридики Садир оттура мәктивидә давамлашти. Садир оттура мәктиви мудириниң оқуш ишлири бойичә орунбасари Рошәнгүл Тохтәмова алимларни иллиқ қарши елип, мәзкүр штаб әзалири билән һәмкарлиқта иш елип баридиғанлиғини билдүрди. Садир мәктивигә бала топлаш бойичә қурулған штабниң әзалири болуп Ташполат Әхмәтов, Шавкәт Һәмраев сайланди. 
 Штаб әзалири Чулуқай йезисидики Җ.Босақов намидики мәктәптә мәктәп мудири Қурванбүби Жанаманова вә мудирниң орунбасарлири Халидәм Балтиева, Сухраб Мәмәтов, йезиниң баш жигитбеши Талипҗан Яқупов билән сөһбәтләшти. Җ.Босақов намидики оттура мәктәпкә бала топлаш штабиниң рәиси вә орунбасари болуп Талипҗан Яқупов билән Халидәм Балтиева сайланди.
 Дехан Ғәйрәт оттура мәктивидики учришишқа мәктәп мудири Айдос Турапбеков вә орунбасари Гүлназ Абитова, муәллим Бибинур Тайирова вә йезиниң баш жигитбеши Ғалипҗан Сонуров қатнишип, штаб әзалирини қоллап-қувәтләйдиғанлиғини қәйт қилишти. Дехан Ғәйрәт йезилиқ мәктәпкә бала топлаш штабиниң рәиси вә орунбасари болуп Бибинур Тайирова билән Ғалипҗан Сонуров сайланди. 
 Уйғур мәктәплири билән һәмкарлишиш штаби әзалириниң 15- июньдики иш күни Чоң Чиған оттура мәктивидә башланди. Чоң Чиған оттура мәктивиниң мудири Бақыт Дүйсембаев, орунбасари Зулияр Қурбанов, йезиниң баш жигитбеши Иминҗан Ғоҗашев, Ханим-қизлар кеңишиниң рәиси Оғләм Тайирова қатнашқан учришишта мудир Бақыт Ермешоғли мәктәп нәпәсидин хәвәрдар қилип, штаб әзалириниң иш паалийитигә утуқ тилиди. Мудир мәзкүр Штаб билән һәмкарлиқта иш елип баридиғанлиғини тәкитлиди. Чоң Чиған оттура мәктивигә бала топлаш бойичә қурулған штабниң рәиси вә орунбасари болуп Айшигүл Йүсүпова вә Оғләм Тайирова сайланди.
 Қириққудуқ йезисидики Яркәнт оттура мәктивиниң мудири Мурат Әжибеков билән орунбасарлири вә уйғур синиплириниң муәллимлири штаб әзалири билән учрашти. Мудир Мурат Әжибеков һәр милләтниң өз тилида оқуп билим елиши зөрүрлүгини, униң үчүн елимиздә барлиқ шараитлар яритиливатқанлиғини тәкитлиди. Мудир Мурат Бекмухаоғли штаб әзалири билән һәмкарлиқта иш елип беридиғанлиғини қәйт қилди. 
 Яркәнт мәктивигә бала топлаш бойичә қурулған штабниң рәиси Диләрәм Өмәрова, орунбасари болуп Зулфийәм Мәшүрова сайланди. 
 Алтөй йезисидики Ә.Қастеев намидики оттура мәктәптә өткән учришишта мәктәп мудири Айбек Сатыбаев, уйғур синиплириниң муәллимлири, йезиниң баш жигитбеши Сәйдәхмәт Розахунов, ханим-қизлар кеңишиниң рәиси Нурағча Исмайилова иштрак қилди. 
 Ә.Қастеев мәктивигә бала топлаш бойичә қурулған штабниң рәиси Сәйдәхмәт Розахунов, орунбасари болуп Нурағча Исмайилова сайланди. 
 Ават йезисиға кәлгән штаб әзалирини мәктәп мудири Бақытгүл Қорғасбаева уйғур синиплириниң муәллимлири билән қарши елип, Штаб билән һәмкарлиқта иш елип беришқа тәйяр екәнлигини билдүрди. 
 Ават мәктивигә бала топлаш бойичә қурулған штабниң рәиси вә орунбасари болуп Пидамәһәмәт Бақиев вә Венерәм Иминова сайланди. 
 А. Розибақиев намидики Пәнҗим оттура мәктивидә өткән учришишқа мәктәп мудири Нургүл Аязбаева билән орунбасари Радик Надиров, миллий мәдәнийитимизниң җанкөйәрлири — йезиниң баш жигитбеши Ясинҗан Тохтахунов, жигитбеши Мәсимҗан Тохтахунов, пешқәдәм устаз Разийәм Саидбаева қатнашти. Нургүл Базарханқизи мәзкүр штаб әзалириниң иш-паалийитигә утуқ тилиди. 
 А.Розибақиев намидики оттура мәктәпкә бала топлаш бойичә қурулған штабниң рәиси вә орунбасари болуп Тайирҗан Һезимов билән Мәсимҗан Тохтахунов сайланди.
 Ынтимақ йезиси (илгәрки Төвәнки Пәнҗим йезиси) Төвәнки Пәнҗим оттура мәктивиниң мудири Айгүл Кәрибаева вә орунбасарлири штаб әзалирини қарши елип, һәмкарлиқта ишләшкә тәйяр екәнлигини билдүрди. Мудир бу жуттики мәктәптә бала саниниң жилдин-жилға өсүватқанлиғини қәйт қилип, мәктәп китапханисида бәдиий әдәбиятлар оқуйдиған оқуғучилар билән муәллимләрниң аз әмәслигини тәкитлигәч, уйғур тилида нәшир қилиниватқан бәдиий әдәбиятлар билән толуқтурулса, дегән пикир-тәклипләр оттуриға қоюлди. 
 Төвәнки Пәнҗим оттура мәктивигә бала топлаш штабиниң рәиси Маһинур Қавашева, орунбасари болуп Үсүпҗан Тейипов сайланди .
 Он төрт жутта өткән учришишта штаб әзалири йеқин арида елимиздики алдинқи қатарлиқ ондин ошуқ алий оқуш орунлириниң оқутқучи-профессорлирини вә жуқурида аталған мəктəплəрниң 9 — 11-синип учумкарлирини вə уларниң ата-анилирини, шундақла пəн муəллимлирини җəлип қилған һалда кəсип таллаш бойичə ZOOM суписи арқилиқ чоң учришиш уюштуридиғанлиғини ейтти.
ҖУЭМ йенидики Уйғур мәктәплири билән һәмкарлишиш штаби әзалириниң Панфилов наһийәсидики мәлиләрниң җамаәтчилик вәкиллири билән болған учришишлирида «Мектеп» нәшрияти Уйғур редакциясиниң башлиғи Рәхмәтҗан Ғоҗәмбәрдиев оқуғучиларниң һаҗәтлик оқуш қураллири билән тәминлиниши, филология пәнлириниң намзити Рәхмәтҗан Йүсүпов иҗадий ишләватқан муәллимләр билән оқуғучиларниң әмгәклиригә тәқриз йезишта ярдәмлишиш вә башқиму маарипимизға аит мәсилиләр бойичә қисқичә әхбарат бәрди. 
 Хәйрият, штаб әзалири пәқәт кәсип таллаш вә бала топлаш мәсилилири биләнла чәклинип қалмиди. Улар оқуғучиларниң үлгирими, учумкарларниң Биртуташ миллий тестқа қатнишиши, уйғур синиплириниң пəн муəллимлири вə һаҗəтлик оқуш қураллири билəн тəминлиниши, уйғур синиплириға бала топлаш, уйғур тилида нəшир қилиниватқан гезит вə журналларниң муштири санини көпәйтиш қатарлиқ муһим мәсилиләрниму муһакимә қилди. 
Шундақ қилип, Панфилов наһийәсиниң он төрт йезисида қурулған штабниң кураторлири болуп Азат Гайитов, Маһинур Аюпова вә Зәйнавдун Сабитов бәкитилди.
 Тәкитләш керәкки, мустәқил елимиздә һәрмилләтниң өз ана тилида билим елиши үчүн мүмкинчиликләр яритилған. Җүмлидин уйғур тилида атмиштин ошуқ мәктәп бар. Лекин балилирини башқа тиллиқ мәктәпләрдә оқутуватқан ата-аниларму йоқ әмәс. Шуңа ата-аниларға мошу җәһәттин йәнә бир қетим чүшәндүрүш ишлирини елип бериш зөрүрдур. 

Панфилов наһийәси.