• Җәмийәтлик тәшкилатларда
  • 16 Маусым, 2021

Шөбә қурулуп, рәиси тайинланди

Йеқинда Чонҗа йезисидики Мәркизий китапханида җумһурийәтлик Уйғур этномәдәнийәт мәркизиниң көчмә мәҗлиси болуп өтти. Униңға мәзкүр тәшкилатниң рәһбәрлиги, Уйғур наһийәси һакиминиң орунбасари Кәдиржан Бағбаев, наһийәдики җәмийәтлик ишлар активистлириниң бир топи қатнашти. Баш қошуш таҗсиман вирус пандемиясигә бағлиқ елан қилинған карантин қаидилиригә мувапиқ тар даиридә уюштурулди.
 ҖУЭМ рәиси, Қазақстан хәлқи Ассамблеяси Кеңишиниң әзаси Шаһимәрдан Нурумов дәсләп жиғилғанларни ҚХА Кеңишиниң Қазақстан Җумһурийитиниң Дөләт кативи Қ.Көшербаевниң қатнишишида өткән кәңәйтилгән мәҗлисидә қаралған муһим мәсилиләр билән тонуштуруп, уларни әмәлгә ашуруш чарилиригә тохталди. Шуниңдин кейин у көпчиликни буниңдин бирнәччә күн илгири ҖУЭМ башқармисиниң қарариға бенаән мәркәзниң Уйғур наһийәлик шөбисиниң қурулғанлиғидин һәм униң рәисиниң тайинланғанлиғидин хәвәрдар қилди.
 – Қазақстан Җумһурийитиниң «Җәмийәтлик бирләшмиләр тоғрилиқ» қануниға бенаән, ҖУЭМ Уйғур наһийәлик вакаләтханиси шөбә сүпитидә қайтидин қурулди, – деди Шаһимәрдан Үсәйиноғли. – Униң рәислигигә наһийә җамаәтчилигидин алтә шәхсниң, униң иккиси аял, намзити тәвсийә қилинди. Башқарма әзалириниң көпчилиги уларниң ичидин Арлен Һосмановни бу вәзипигә мувапиқ дәп һесаплап, у ҖУЭМ Уйғур наһийәлик шөбисиниң рәиси болуп тайинланди. 
 Натиқ шундақла  өткән жилниң ахирида тәвәдә қурулған «Достық» уйғур этномәдәнийәт мәркизи» җәмийәтлик бирләшмисиниң  рәиси Розахун Насиров билән учришип, сөһбәтләшкәнлигини, мәзкүр җәмийәтлик тәшкилатниң ҖУЭМ билән һәмкарлиқта иш елип баридиғанлиғини, униң рәисиниң ҖУЭМ башқармисиниң әзалиғиға қобул қилинидиғанлиғини тәкитлиди. 
 Мәзкүр жиғинда сөзгә чиққан наһийәниң инавәтлик ақсақили Закир Мәмиров, җәмийәтлик ишларниң активисти Зиләхәм Җәлилова йеңи рәисни тәбрикләп, паалийитигә утуқлар тилигәч, уни һәртәрәплимә қоллап-қувәтләйдиғанлиғини билдүрди.

 Арлен Сеналоғли Һосманов 1966-жили Алмута вилайити Уйғур наһийәсиниң Кәтмән йезисида туғулған.1973 – 1983-жиллири киндик қени төкүлгән жутидики оттура мәктәптә тәһсил көргән. Андин Алмутидики Қазақ йеза егилиги институтини инженер-механик мутәхәссислиги бойичә әла баһаларға тамамлиған. 2012 – 2015-жиллири Алмута Энергетика вә алақә университетиниң электроэнергетика факультетида оқуп, иккинчи алий билимгә егә болиду. Әмгәк паалийитини 1988-жили туғулуп өскән йезисидики “Қизил Туғ” колхозида машина-трактор ишханисиниң (МТМ) башлиғи хизмитидин башлайду. Андин мәзкүр егиликтә (1991 – 1994), Уйғур наһийәлик исситиш тармақлири мәһкимисидә (1995 – 2000) баш инженер, “Аблин и К” ҖЧЙда иҗраий мудир болуп ишләйду. 2013 – 2017-жиллири Уйғур наһийәсиниң мәркизи Чонҗа йезисиниң һакими лавазимини егиләйду. 2017-жилдин буян шәхсий тиҗарәт билән шуғуллинип кәлмәктә. 2021-жили Уйғур наһийәлик мәслиһәтниң депутати болуп сайланди. Аилиси, үч пәрзәнди вә нәврилири бар.

 

Розахун Қаблахуноғли Насиров 1953-жили Алмута вилайити Уйғур наһийәси Ғалҗат йезисида туғулған. 1970 — 1975-жиллар арилиғида Алмутидики Қазақ йеза егилиги институтида билим алған. Мутәхәссислиги бойичә инженер-механик. Әмгәк паалийитини 1975-жили Уйғур наһийәсидики «Социализм» колхозида баш инженер-механик сүпитидә башлиған. 1979 — 1988-жиллар арилиғида Чонҗа йезисида баш-инженер, кейин наһийәлик йеза егилиги бөлүми башлиғиниң орунбасари хизмәтлиридә болған. 1988 — 1990-жилларда «Агросервис» бирләшмисиниң рәиси, кейин Уйғур наһийәлик агробирләшмә рәисиниң орунбасари болуп ишлиди. 1990-1992-жиллири Уйғур наһийәлик агросанаәт бирләшмисиниң рәиси, 1992 —1996-жилларда А.Розибақиев намидики совхозниң мудири, 1996 — 2001-жиллар арилиғида А.Розибақиев намидики ишләпчиқириш кооперативи ассоциациясиниң рәһбири болса, 1999 — 2002-жиллири «Саламәт» дехан егилигини башқурди. 2002 — 2004-жилларда Баһар йезисидики «Ұлы дән» ҖЧЙниң мудири болди. 2004 — 2007-жилларда «Саламәт» дехан егилигиниң башлиғи хизмитини атқурди. 2007 — 2017-жиллар арилиғида «Центр по недвижимости» Уйғур наһийәлик шөбисиниң рәһбири. 2017-жилдин буян Чонҗа йезисидики «Независимый оценщик» қозғалмайдиған мүлүк ширкитидә ишләйду. Уйғур наһийәсиниң Пәхрий граждини (2013), Алмута вилайәтлик хәлиқ депутатлири иҗраий комитетиниң Пәхрий ярлиғи (1986), СССР Алий кеңишиниң «За трудовую доблесть» медали вә ҚҖ Әдлийә министрлигиниң Пәхрий ярлиғи билән мукапатланған.
2020-жилниң октябрь ейидин «Достық» уйғур этномәдәнийәт бирләшмиси» җәмийәтлик тәшкилатиниң рәиси. 
 


 

1458 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы