• Асасий мақалилар
  • 01 Шілде, 2021

Қазақстан —Россия: стратегиялик шериклик

Җумһурийитимиз Президенти Қасым-Жомарт Тоқаев Қазақстанда рәсмий сәпәр билән болуватқан Россия Федерал жиғини Федерация Кеңишиниң рәиси Валентина Матвиенко билән учрашти, дәп хәвәр қилиду Ақординиң рәсмий сайти.

Учришиш давамида көппланлиқ Қазақстан ­– Россия стратегиялик шериклиги вә иттипақдашлиғини мустәһкәмләш истиқбаллири муһакимә қилинди. Сөһбәтдашлар сода-ихтисадий, мәдәний-инсанпәрвәрлик һәмкарлиқниң, Евразия интеграциясиниң муһим мәсилилири, шундақла икки дөләтниң таҗсиман вируси пандемиясигә қарши күришиш бойичә бирләшкән һәрикәтлири һәққидә гәп қозғиди.
Дөләт рәһбири Федерация Кеңиши делегациясини алқишлап, мәмликитимиз билән иккитәрәплимә мунасивәтләрни тәрәққий әткүзүштә вә мустәһкәмләштә Валентина Матвиенкониң шәхсий үлүшини, шундақла униң МДҺ парламентларара ассамблеяси Кеңишиниң рәиси лавазимида қилған үнүмлүк әмгигини жуқури баһалиди. Президент Қазақстан вә Россияниң йеқинлишишида қанун чиқириш органлириниң дайим алақида болуш ролини алаһидә тәкитләп өтти.
“Дөләтләрара һәмкарлиқни тәрәққий әткүзүштә парламентлиқ дипломатия хелә чоң роль ойнайду вә бу Қазақстан вә Россия Федерацияси оттурисидики һәмкарлиқта толуқ өз әксини тапалайду, дәп һесаплаймән. Биз үчүн достлуқ иттипақдашлиқ мунасивәт биринчи дәриҗилик, әвзәллик әһмийәткә егә”, ­– деди президент Қасым-Жомарт Тоқаев.
Қасым-Жомарт Тоқаев Федерация Кеңишиниң рәисигә мәмликитимиздә әмәлгә ашурулуватқан сәясий вә ихтисадий ислаһатлар һәққидә ейтип бәрди. Музакириләр давамида Дөлитимиз рәһбири президент Владимир Путинниң тутқан сәясий йолиниң хәлиқара мәйданда Россия мәвқәсиниң хелә мустәһкәмлинишигә сезиләрлик тәсирини йәткүзүватқанлиғини тәкитлиди.
“Владимир Владимирович Путинниң күчлүк вә салмақлиқ рәһбәрлиги астида Россия Федерацияси хәлиқара мәйданда дунияниң һәрқандақ дөлити униң билән һесаплишидиған вә униңсиз һечқандақ муһим хәлиқара муәмма һәл болмайдиған дөләт сүпитидә көрсәтти”, дәп тәкитлиди Қасым-Жомарт Тоқаев.
Өз новитидә, Валентина Матвиенко президентқа учришиш имканийити үчүн сәмимий миннәтдарлиғини изһар қилди.
“Мән сәпирим алдида Владимир Владимирович Путин билән сөһбәтләштим. У Сизгә сәмимий сағлам вә әң яхши тиләкләрни йоллишимни илтимас қилди. Шундақла  Сизниң ишәнчә вә очуқ мунасивитиңизни жуқури баһалайдиғанлиғини йәнә бир қетим тәкитлиди. Имзаланған барлиқ келишимләр иш йүзидә сөзсиз әксини тепидиғанлиғини тәстиқлиди”, ­деди Федерация Кеңишиниң рәиси Валентина Матвиенко.
Буниңдин ташқири Валентина Матвиенко мәмликитимизниң пайтәхти һәққидә өзиниң иҗабий тәсиратлири билән ортақлашти.
“Өз вақтида Владимир Владимирович Путин Нур-Султанни ­ «заманивий дунияниң мөҗүзиси» дәп атиған. Һәқиқәтәнму бу мөҗүзә күндин-күнгә гөзәллишип, тәрәққий етиветипту. Мән 6-июль күни шәһәр күниниң нишанлинидиғанлиғини билимән. Пурсәттин пайдилинип, Сизни вә Нур-Султан шәһириниң барлиқ турғунлирини келиватқан мәйрәм билән тәбрикләймән, ­– деди Валентина Матвиенко.
Шундақла В.Матвиенко Дөлитимиз рәһбирини парламент сенатида вә мәҗлисидә өткән музакириләрниң йәкүнлири һәққидә хәвәрдар қилди. Учришиш ахирида Қасым-Жомарт Тоқаев өзиниң россиялик кәсипдиши Владимир Путинға ялқунлуқ салам һәм яхши тиләкләрни йоллиди.
Шуни әскә селип өтимизки, буниңдин бираз илгири Россия Федерация Кеңишиниң рәиси Қазақстан рәһбәрлигигә мәмликәттә рус тилини вә мәдәнийитини тәрәққий әткүзүшни қоллап-қувәтлигәнлиги үчүн миннәтдарлиқ билдүргән еди.

1391 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы