• Асасий мақалилар
• 14 Шілде, 2021

Елбасыға ядикарлиқ орнитилди

Дөләт рәһбири Қасым-Жомарт Тоқаев Пайтәхт күни һарписида Тунҗа Президент – Елбасы Нурсултан Назарбаевқа орнитилған ядикарлиқни ечиш мәрасимиға қатнашти. Монумент йеқинда пайтәхттә Әлихан Бөкейхан вә Керей, Жәнибек ханлар кочилириниң қийилишида ечилған истираһәт беғиниң территориясигә орунлашти.

Президент ядикарлиқ лентисини қийип, мәрасимға қатнашқучиларға нутуқ билән мураҗиәт қилди. Қасым-Жомарт Тоқаев һәр жили Пайтәхт күни һарписида шәһәрниң роһий қияпитини ачидиған йеңи комплексларниң қәд көтириватқанлиғини тәкитлиди вә өткән жили Елбасы Китапханиси мирасгаһиниң селинғанлиғини, әнди униң йенида ечилған истираһәт беғиниң шәһәрликләрниң сөйүмлүк дәм елиш җайиға айланғанлиғини әслитип өтти.
– Шуңлашқа нәқ мошу йәрдә биз бүгүн Елбасы Нурсултан Әбишоғли Назарбаев шәрипигә орнитилған тарихий ядикарлиқни ечиватимиз. Шу нәрсә қанунийки, мәзкүр һәйкәлтарашлиқ әсәр юбилейлиқ жилда қәд көтәрди, –деди Дөләт рәһбири.
Қасым-Жомарт Тоқаев Нурсултан Назарбаевниң дөләтчилик асаслирини шәкилләндүрүшкә, дөләт чегарисини бәлгүләшкә, аләмшумул боһранларни йеңип чиқишқа, мәмликәтниң хәлиқара абройини күчәйтишкә бебаһа һәссә қошқанлиғини атап көрсәтти.
– Елбасы нурғунлиған хәлиқара тәшәббусларни оттуриға қойди вә мәмликитимизни аләмшумул сәясәтниң алдинқи сепигә елип чиқти. Пүткүл дуния уни улуқ сәясәтчи, тарихий шәхс сүпитидә билиду. Қазақстанниң һазирқи вә кәлгүси әвлади өз хәлқиниң улуқ оғланиға тәңлишиши керәк, –деди Қасым-Жомарт Тоқаев вә Елбасыниң хәлиқни миқияслиқ өзгиришләрни әмәлгә ашурушқа дәвәт қилип, тәғдиранә өзгиришләр, миқияслиқ ислаһатлар тимсалиға, Мустәқиллигимизниң рәмзигә айланғанлиғини тәкитлиди.
Дөләт рәһбири униңдин ташқири Тунҗа Президентниң жирақни көздә тутқан тәшәббуслириниң дөлитимизниң сәясий вә ихтисадий утуқ-муваппәқийәтлириниң асасини тәшкил қилидиғанлиғини әслитип өтти.
– Елбасыниң стратегиялик йоли – бизниң мәмликәтни техиму йеңилашқа қаритилған сәястимизниң мустәһкәм асаси. Чапсан өзгириватқан дунияда ислаһатларни утуқлуқ әмәлгә ашуруш үчүн бизгә ениқ идеологиялик нишанлар вә турақлиқ бебаһа асас керәк, – деди Президент.
Қасым-Жомарт Тоқаев бу йосунда улуқ шәхсләр шәрипигә монументларни орнитиш арқилиқ биз милләтни роһий тикләш үчүн асас яритиватқанлиғимиз тоғрилиқ пикирни ейтти. Президент әйнә шуниңға бағлиқ йеқинқи вақитта Әлихан Бөкейханниң, Ахмет Байтурсыновниң, Мыржақип Дулатовниң, Қаныш Сәтбаевниң вә башқиму улуқ шәхсләрниң образлирини әбәдийләштүридиған ядикарлиқларниң ечилидиғанлиғини тәкитлиди.
Дөләт рәһбири сөзиниң ахирида Қазақстан хәлқини Пайтәхт күни билән тәбриклиди.