• Җәмийәтлик тәшкилатларда
• 14 Шілде, 2021

Ханим-қизлар билән учрашти

Җумһурийәтлик Уйғур этномәдәнийәт мәркизи йенидики Уйғур мәктәплиригә һәмкарлишиш штабиниң новәттики учришиши Алмутидики Достлуқ өйидә өтүп, униңға мәзкүр җәмийәтлик тәшкилат йенидики Ханим-қизлар кеңишиниң бир түркүм әзалири қатнашти. 
Учришишни «Уйғур авази» гезитиниң бөлүм муһәррири, филология пәнлириниң намзити Шәмшидин Аюпов киришмә сөз билән ечип, штаб әзалирини тонуштурди. Шуниңдин кейин сөз тизгинини қолға алған «Туран дунияси» түркийтиллиқ хәлиқләр мәдәнийити» җәмийәтлик фондиниң мудири, ҖУЭМ йенидики Уйғур мәктәплири билән һәмкарлишиш штабиниң рәиси Карлин Мәхпиров штабниң мәхсити вә вәзипилиригә қисқичә тохтилип өтти. Карлин Нурдуноғли ханим-қизларниң миллий мәдәнийитимизни, урпи-адәтлиримизни тәрәққий әткүзүштә қошуватқан мунасип төһписини вә ушбу мәхсәттә атқуруватқан изгү ишлирини алаһидә тәкитләп, әндики паалийитини оқутуш уйғур тилида жүргүзүлидиған мәктәпләргә қаритишниң муһимлиғини атап өтти.
Штаб әзалири — Қазақ миллий аграр университетиниң вә Suleyman Demirel University профессори, әдлийә пән­лириниң доктори, академик Шаймәрдан Шәрипов, «Туран» университетиниң профессори, тарих пәнлириниң доктори Абләһәт Камалов, «Мектеп» нәшрияти Уйғур тәһриратиниң башлиғи Рәхмәтҗан Ғоҗамбәрдиев вә мошу қурларниң муәллипи шундақла җумһурийәтлик Уйғур этномәдәнийәт мәркизи йенидики Ханим-қизлар кеңишиниң рәиси Сәнәм Беширова, «Җанан» хәйрихаһлиқ аяллар фондиниң рәиси Мизангүл Авамисимова вә мәзкүр фондниң әзаси, миллий мәдәнийитимизниң җанкөйәри Турсунай Иминова, «Ана тилим – дана тилим» ютуб каналиниң муәллипи Зорәм Авутова, Талғир наһийәлик Ханим-қизлар кеңишиниң рәиси Каминур Сопиева, Қарасай наһийәлик Уйғур этномәдәнийәт мәркизиниң рәиси Айшәм Норузова қатнашқан ушбу учришишта оқутуш уйғур тилида жүргүзүлидиған мәктәпләрни һәртәрәплимә қоллап-қувәтләшниң зөрүрлүги алаһидә қәйт қилинди.
Өз новитидә паалийәтчан ханим-қизлар өзлириниң хәйрихаһлиқ паалийитини «Мәктәпкә — йол» акцияси даирисидә жүргүзидиғанлиғини һәм мәктәпләр китапханилириға уйғурчә әдәбий китаплар билән бәзи мәктәпләрдә йетишмәйватқан оқуш қураллирини йәткүзүп беришкә өз үлүшини қошидиғанлиғини вә бүгүндин башлап бу мәсилидә штаб әзалири билән һәмкарлишип иш елип баридиғанлиғини тәкитлиди. Сәнәм Беширова бу изгү ишқа башқиму паалийәтчан ханим-қизларни җәлип қилип, миллий маарипимиз мәсилилирини штаб әзалири билән бирликтә һәл қилишқа ат селишидиғанлиғини ейтти. 
Учришиш давамида Ханим-қизлар кеңиши йенида штаб қуруш муһим дәп тепилип, униң рәислигигә Сәнәм Беширова сайланди. Учришиш қатнашқучилири бу мәсилидә һәмкарлишип һәрикәт қилишқа келишти.
                                          
 Рәхмәтҗан ЙҮСҮПОВ,
     ҖУЭМ йенидики Уйғур   мәктәплиригә һәмкарлишиш штабиниң әзаси.