• "Birgemiz"
• 21 Шілде, 2021

«Достлуққа» тил тәгмисун

Мәшүр САСИҚОВ,
«Уйғур авази»

Алмута шәһиридики «Достлуқ» мәһәллисиниң баш жигитбеши Азат ака Ибрагимов телефон қипту.
— Укам, улуқ Қурван һейт мәйримидә мәһәллимиздә бирмунчә йеңилиқлар йүз бәрди, – деди акимиз салам-сааттин кейин. – Шуни силәр билән бөлүшкүм кәлди. Биринчиси, жутумиздики сахавәтлик жигитләрниң тәшәббуси, инақлиғи вә ярдими арқилиқ Күрәш вә Мунәввәр исимлиқ қериндашлиримизни өйлүк қилдуқ. Иккинчиси, һейтниң биринчи күни бир қара малдин бирини союп, 300 килограмм гөшни 56 аилигә тарқатқан болсақ, түнүгүн 10 қойниң гөшини 70кә йеқин намрат, турмуш-тәминати начар аилиләргә апирип бәрдуқ.
Әлвәттә, мусулманчилиқта «қилдим-әттим» дейиш тоғра әмәс, амма мән бир жутни башқуруватқан адәм туруп, жутдашлирим мунчилик ишларни әмәлгә ашуруватса, җим йетивелишқа виҗданим чидимиди. Амал болса, шәхсий тирикчилигини тамамән унтуп, әлниң ишиға беличә киргән жутдашлиримға миннәтдарлиғимни гезит арқилиқ йәткүзүп қойсаңлар.
Гәпниң расти, «яқ» дейишкә бизниңму вижданимиз яр бәрмиди. Чүнки бүгүнкидәк һәрким пәқәт өзиниңла ғеми билән яшаватқан бир пәйттә «Достлуқ» мәһәллисиниң турғунлири бийил мошуниң билән иккинчи аилигә өй елип бериватиду. Буниңдин ташқири, ярдәмгә муһтаҗ яки бешиға күн чүшкән қериндашларни йөләп, һәмдәм болуватқанлиғи өз алдиға. Бу қетимму Һейт мәйрими һарписида мәһәллиниң барлиқ активист жигит-қизлири жиғилип, қол-қолчә қурванлиққа союлған малларниң гөшини керәк йәргә тарқитиватқанлиғи әйнә шуниң ярқин ипадисидур. 
Қәйәргила бармаң, «Достлуқ» мәһәллиси тоғрилиқ иллиқ инкаслар бар. «Улар өм. Улар инақ. Мәктивидә һәр жили йоқ дегәндә 5-6 биринчи синип ечиливатқан. Гезит-журналларға толуқ йезилиду». Көпчилик «Достлуқни» әйнә шундақ тәсәввур қилиду. Бу, әлвәттә, қериндашлиримиз көпирәк яшайдиған талай уйғур жутлириға үлгә. Һә, бизму, өз новитидә, беваситә вәзипимизни толуқ чүшинип, «Достлуқтики» йеңилиқларни башқиларға тезирақ йәткүзүшкә алдиридуқ. 
Илаһим, «Достлуққа» тил тәгмисун!