• Әхбаратлар еқими
• 23 Қыркүйек, 2021

Тәтқиқатларға мәбләғ бөлиниду

Мәлумки, Билим вә пән министрлиги йенида қурулған Яш алимлар кеңишиниң  пайдилиқ  илмий тәтқиқатлири елимизниң ихтисади билән илим-пәниниң риваҗлинишиға өз үлүшини қошмақта.

Шәмшидин АЮПОВ, 
«Уйғур авази»

Мустәқил әл тарихида 2015-жилниң декабрь ейида дәсләпки қетим  Дөләт рәһбири Нурсултан Назарбаев әл-Фараби намидики илим-пән билән техника саһасидики Қазақстан Җумһурийитиниң йеңи дөләт мукапити билән 40 лауреатни тәғдирлисә, ушбу мукапат 2019-жили – 29, 2020-жили 15 лауреатқа тапшурулди.
Умумән, елимиздә һәржили 6 мәхсус мукапат вә 75 дөләт илмий стипендияси, униң ичидә талантлиқ яш алимларға беғишланған 50 стипендия бериливатиду.  Дөләт рәһбириниң қазақстанлиқларға йоллиған новәттики  Мәктүбидә  «Илим-пән саһасини грантлиқ мәбләғ билән тәминләш муддитини бәш жилғичә узартиш мәсилисини қараштурған тоғра», дәп  тәкитләнгән еди.  Мәктүптә көздә тутулған вәзипиләрни әмәлгә ашуруш мәхситидә  елимизниң яш алимлири үчүн дәсләпки қетим илмий тәтқиқатларни грантлиқ мәбләғ билән тәминләшкә қаритилған конкурс өткүзүлүватиду.
Тәкитләш лазимки, 2019-жилдин башлап елимизниң барлиқ университетлирида Технологияләр трансферти  канцелериясигә беғишланған грант бөлүш даирисидә 1500 алим билән илмий хадимни оқутуш башланди.
Буниңдин сирт, Қазақстан алимлири хәлиқара рейтингқа егә нәширләрдә илмий мақалилар елан қилишқиму паал арилашмақта. Бүгүнки күндә Scopus  мәлуматлири бойичә қазақстанлиқ алимлар мақалилириниң умумий сани 19879ға, әнди Web of Scіence  мәлуматлар базисида 25088 мақалиға йәткән.