• Әхбаратлар еқими
  • 14 Қазан, 2021

Китапханида өткән бир күн

Қазақстан Мәдәнийәт вә спорт министрлиги тәрипидин 2021-жилниң «Қазақстандики балилар вә өсмүрләрниң китап оқушини қоллаш жили» дәп елан қилинғанлиғи һәммимизгә мәлум. Иккинчидин, бийил улуқ дала ақини Җамбул Җабаевниң туғулғиниға 175 жил толди. Әйнә шуниңға мунасивәтлик яш иҗаткарлар билән китапхумарларниң роһий һәмрайиға айланған Алмута шәһиридики Җ.Җабаев намидики балилар вә өсмүрләр китапханисиниң мудири Ғазиза Қудайбергенқизиға мураҗиәт қилған едуқ. У бизгә китапханиниң өтмүшигә, бүгүнки нәпәсигә мунасивәтлик муһим һәм қизиқарлиқ мәлуматларни бәрди.  
 

Китапхана 1976-жили әхбарат елиш, мәнивий сөһбәт қуруш вә яшларниң дәм елиш мәркизи сүпитидә қурулуп, җумһурийәтлик әһмийәткә егә китапхана мәртивисигә еришкән. 1996-жили болса, Җамбул Җабаевниң туғулғининиң 150 жиллиғиға мунасивәтлик, Қазақстан Җумһурийити Һөкүмитиниң тохтамиға бенаән, униңға ақинниң нами берилгән. Китапхана 2008-жили Алмута шәһириниң коммуналлиқ мәһкимиләр сепигә киргүзүлсә, 2016-жили  Алмута шәһириниң мәркәзләштүрүлгән китапханилар тармиғиниң шөбисигә айланди. 2018-жили мурәккәп җөндәштин өткән бу қутлуқ дәргаһ барлиқ җәһәттин тәләпләр дәриҗисидә заманивийлаштурулуп, китапхумар амминиң мәнивий еһтияҗини толуқ қанаәтләндүридиған  билим мәркизигә айланди. Дәсләп лаһийә бойичә 100 адәмгә молҗаланған китапхана бүгүнки күндә бир мәзгилдә 400 оқурмәнгә хизмәт көрситәләйду. 
Заманивий әдәбият җәвһәрлири вә электронлуқ ресурслар билән тәминләнгән китапханида замандашлиримизниң китап оқушқа иштияқ-зоқини ойғитишқа қаритилған актуал мавзулар әтрапида дебатларни, интерактивлиқ учришиларни уюштуруш әнъәнигә айланған. Әйнә шундақ модернизациялиқ йөнилишләр нәтиҗисидә китапханида коворкинг (инглиз тилидин тәржимә қилғанда «һәмкарлишиш» дегән мәнани билдүриду – А.А) мәркизи, йәни һәр түрлүк кәсип егилириниң бешини қошуп,  уларниң һәрхил мавзуларға музакириләр өткүзидиған мәркәз барлиққа кәлди. Мәзкүр  мәркәзниң асасий мәхсити – яшларни бош вақтини үнүмлүк пайдилинишқа җәлип қилиш, улар үчүн әркин сөһбәт мәйданини қуруштин ибарәт. 
Умумән, бүгүнки таңда китапхана фондида үч йүз миңдин ошуқ бәдиий, публицистикилиқ, илмий, психологиялиқ вә башқиму йөнилишләрдики китаплар бар. Униң икки йүз миңи қазақ тилида йоруқ көргән әсәрләр. 
Ғазиза Қудайбергенқизиниң ейтишичә, китапханини жилиға йерим миллиондин ошуқ оқурмән зиярәт қилидекән. Бүгүнки күндә униң әллик миңға йеқини модернизациялик йөнилиштин өткәнләр. Әгәр пандемиягә мунасивәтлик карантин чарилири җарий қилинмиған болса, уларниң сани буниңдин нәччә һәссә көп болаттикән. Һәр һалда биз китапниң қәдир-қиммитини чүшинидиғанлар сепиниң  барғансири өсүватқанлиғиға хурсән болдуқ. 
Китапханида һәрхил сәнәләргә яки қәләм саһиблириниң тәвәллудлириға беғишланған чарә-тәдбирләр, китапларниң тонуштуруш мәрасимлири пат-пат өткүзүлүп туриду. Улардин, әлвәттә, уйғур иҗаткарлириму истисна әмәс. Булту Қазақстан хәлқиниң бирлиги күни һарписида язғучи-драматург Әлибек Байболниң тәшәббуси вә мәзкүр китапханиниң қоллап-қувәтлиши билән онлайн форматта өткән мениң «Жүрәк альбоми» намлиқ китавимниң тонуштуруш мәрасими сөзүмгә испат болалайду. 
– Жил бешида биз Җамбул Җабаевниң 175 жиллиқ тәвәллудини тәнтәнилик рәвиштә ачтуқ,  – деди Ғазиза Қудайбергенқизи биз билән болған сөһбәттә. – Санитарлиқ-эпидимологиялиқ тәләпләргә мувапиқ, униңға санақлиқ зиялилар вә оқурмәнлиримиз қатнашти. Униңдин ташқири, студентлар билән оқуғучилар арисида «Җамбул оқушлирини», Узунғаштики Җамбул намидики мирасгаһниң қоллап-қувәтлишидә көргәзмә уюштурдуқ. Биз шундақла Җамбул әвладиниң вәкили болған Нағашыбек Қапалбекулы билән қоюқ мунасивәт бағлап келиватимиз. Ақынниң мирасини рәтләп-топлап жүргән һөрмәтлик акимиз бизниң китапханиға бовисиниң иҗадийитигә мунасивәтлик һәрхил жилларда йоруқ көргән китаплирини соға қилип кәлмәктә. Шуниң билән биллә Абай намидики Қазақ миллий педагогика университети йенидики Җамбулшунаслиқ вә хәлиқ ақинлири илмий-тәтқиқат институти тәрипидин тәйярлинип, нәширдин чиққан 4 томлуқ «Җамбул Җабаев» намлиқ библиографиялиқ әсәр китапханимиз тәкчисидин орун алди. Һазирчә бизниң китапханидики Җамбулниң мираси җәмләнгән «әң яшанған» китап 1950-жили йоруқ көргән. Мошу йәрдә ақинниң иҗадийитигә, шанлиқ һаят йолиға беғишланған 500гә йеқин надир материалларни жиғип, библиографиялиқ әмгәк тәйярлап чиққинимизни алаһидә тәкитләп өткүм келиду. 
Китапхана коллективи жуқурида қәйт қилинған паалийәтләр биләнла чәклинип қалмайду, әлвәттә. Улар, әгәр һамийлар тепилса, Җамбул намида һәрхил мусабиқә-конкурсларни уюштурушни нийәт қиливатиду. Һә, бу күнләрдә китапханида ақин тәвәллудиниң тәнтәнилик йепилиш мәрасимиға қизғин тәйярлиқ кетип бариду. 

Абдулҗан АЗНИБАҚИЕВ.

Алмута шәһири.
 

526 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы