• Муштири топлаш 2022
• 18 Қараша, 2021

Һөрмәтлик гезитхан!

Ахирқи вақитларда җай-җайлардики муштирилиримиз биз билән хәвәрлишип, почта бөлүмлириниң гезитни өз вақтида таратмайдиғанлиғи һәққидә пат-пат шикайәт қилидиған болди. Шундақла «почтиға гезитқа йезилайлуқ дәп барсақ, қобул қилмиди» дәйдиған гезитханлиримизму учришиду. Биз бу мәсилиләр бойичә «Қазпошта» акционерлиқ җәмийитиниң рәһбәрлигигә рәсмий хәт йоллиған едуқ (Бу проблемилар җумһурийитимиздә йоруқ көридиған барлиқ гезит-журналларға мунасивәтлик болуп чиқти — ред.). Өткәндә улардин төвәндики җавапни алдуқ. 

«Уйғур авази» гезитиниң баш муһәррири Ершат ӘСМӘТОВқа!
Һөрмәтлик Ершат Моллахуноғли!
2021-жилниң 9-ноябрь күни «Қазпошта» акционерлиқ җәмийити «Алматы почтамты» Алмута шөбиси вә «Почталық Сервис» шөбиси билән  гезит-журналлар рәһбәрлири бирликтә «дүгләк үстәл» өткүзүлгәнлиги, униңда җумһурийәтлик қәрәллик нәширләргә муштири топлаш вә уни вақтида гезитханларға йәткүзүш бойичә мәсилиләрниң муһакимә қилинғанлиғи өзиңизгә яхши мәлум. Мәзкүр «дүгләк үстәлниң» йәкүнини сизгә йоллаватимиз.
Барлиқ почта бөлүмлиригә аммибап болған қәрәллик нәширләрниң тизими илинди;
2022-жилға муштири топлашни қобул қилиш муддити көрситилгән елан қайтидин йеңиланди;
Муштириларға хизмәт көрситиш бойичә алақә операторлар билән һәптисигә 2 қетим нәзәрийәвий вә әмәлий дәрисләрни өткүзүш бәлгүләнди;
Гезитқа муштири топлаш вә уни макан-җайиға йәткүзүш бойичә җавапкәр адәмләр тайинланди.

Һөрмәтлик гезитхан!
Буниңдин кейин почта бөлүмчилиридә гезитқа муштири болуш бойичә қийинчилиқларға дуч кәлсиңиз — 8 (727) 261-59-11 (20500), 8-701-611-41-54,  гезит вақтида таритилмиса  — 8 (727) 259-88-99 (20318, 20018), 8-707-333-71-45, 8-747-339-87-38 телефонлири арқилиқ хәвәрлишип, мәсилиңизни һәл қилишиңизға болиду».