• Әхбаратлар еқими
• 18 Қараша, 2021

Балиниң әһвали яхши, икки аилә бир-бирини кәчүрди

Алмута вилайитиниң һакими Амандық Баталов Пәнҗимдә йүз бәргән оқуғучилар арисидики тоқунушта еғир җараһәт алған балиниң әһвали яхши болғанлиғини тәкитлиди. Шундақла, икки аилә вәкиллири учришип, бир-биридин кәчүрүм сориғанлиғини ейтти.
 «Мән Пәнҗим йеза округиға барлиқ жутларни яхши билимән. Шу йәрләрдә туридиған адәмләрни тонуймән. У йәрдә һечбир милләтләрара тоқунуш болмиған. Өткәндики вақиәни мошундақ қилип көрситишкә тиришти. Мән дәрру вә ениқ ейттим. Шу күни аммивий әхбарат васитилириниң вәкиллири көп болди. уларниң һәммиси буни чүшинип, бизниң мәвқәмизни қоллиди. Шуниң үчүн уларға миннәтдарлиқ изһар қилимән. Айрим кишиләргә бу вақиәгә башқа түс беришкә имканийәт бәрмиди. Балилар дәлиздә кетип берип, бир-бири билән чиқишалмай, мушлишип қалған. Һәқиқәтән ақивити қайғулуқ болди. Һазир ағриқханида ятқан бала өзини яхши һис қиливатиду. Таш тәккән киши ағриқханидин чиқти. Мошу икки аилә учришип, сөһбәтлишип, бир-бирини кәчүрди», деди Амандық Баталов.
 Вилайәт һакими җәмийәтлик тәртипни бузуп, өйләрниң деризилирини сундурғанларниң җазалинидиғанлиғини ейтти. Һазир уларниң ким екәнлиги толуқ ениқлинип, һәрикәтлиригә баһа берилгән.
 «Җәмийәтлик тәртипни бузғанлар җазалиниду. Мундақ қилишқа болмайду. Мениң билишимчә, һазир улар бир-бириниң үзигә қарашқа уюлиду. Улар шу йәрдә туғулуп өсти. Пәнҗим — чоң йеза. Көп қазақ уйғур қизиға өйлинип, нурғунлиған уйғур қазақ қизини алған — бир-бири билән туққан. Һазир әһвал турақланди. Шундиму биз әһвални назарәттә тутуватимиз», дәп вилайәт һакими.
Амандық Ғаббасоғли шуниң билән биллә «Пәнҗим вақиәсини» милләтләрара тоқунуш дәп әхбарат бәргәнләр билән тамамән келишмәйдиғанлиғини қәйт қилди.
 «Балилар дәлиздә тоқунушуп қалса, қандақ буни милләтләрара тоқунуш дәймиз? 9 вә 10-синип оқуғучилири өзара урушуватиду. Қазақниң орнида – рус, уйғур орнида – корей болушиму мүмкин едиғу. Мән вилайәт һакими сүпитидә ениқ җавапкәрликни зиммәмгә елип, у йәрдә мундақ (милләтләрара тоқунуш) йоқ екәнлигини ейтимән. Шу йәрдә өмүрбойи ишләп келиватқан икки адәм – Серик Ақсубаев вә Закирҗан Кузиевқа илтимас қилдим. Серик – қазақ, Закирҗан—уйғур. Биринчиси өзи берип, өз мәблиғигә деризиләрни җөндәп чиқти, иккинчиси һаҗәт техника билән тәминлиди», деди һаким.