• Әхбаратлар еқими
• 18 Қараша, 2021

Саммит қатнашқучилириға мураҗиәт қилди

Қазақстанниң Тунҗа Президенти­ – Елбасы Нурсултан Назарбаев Түркийтиллиқ дөләтләр һәмкарлиқ кеңишиниң VIII саммитиға қатнашқучиларға видеомураҗиәт қилди.
Нурсултан Назарбаев видеомураҗиитидә Реджеп Тайип Эрдоғанға өзини Түркий кеңишиниң пәхрий рәиси сүпитидә саммитқа қатнишишқа тәклип қилғанлиғи үчүн миннәтдарлиқ изһар қилди.
– Бийил мениң тәшәббусим билән әтиязда өткән Түркий кеңишиниң нарәсмий онлайн-саммитиға қатнашқанлиғиңиз үчүн миннәтдарлиқ билдүримән. Сизниң қарариңиз билән Түркстан шәһири түркий дунияниң роһий пайтәхти мәртивисигә еришти. Мошуниң һарписида мошу шәһәрдә Түркийтиллиқ дөләтләр Парламент ассамблеясиниң 10-юбилейлиқ саммити утуқлуқ өтти. Алла несип қилса, сизниңму муқәддәс Түркстанға келидиғанлиғиңизға үмүт қилимән. Бизниң хәлиқлиримиз өз әллириниң суверенитети тоғрилиқ биринчи қетим билгәнләрниң – саммит қатнашқучилириниң хатирисидә мәңгү қалиду. Биз тарихий утуқлиримиз вә түркий әлләрниң утуқлири билән пәхирлинимиз. Униңдин ташқири дөләтлиримиз өз алдиға тәрәққий етиш бойичә йеңи улуғвар миллий мәхсәтләрни қойиватиду, – деди Елбасы.
Нурсултан Назарбаев шундақла Түркий кеңишиниң лидерлириға буниңдин икки жил илгири Бакуда оттуриға қойған икки тәкливини қоллап-қувәтлигәнлиги үчүн миннәтдарлиқ билдүрди. 
– Биринчидин, «Түркий дуния – 2040 истиқбали» стратегиялик һөҗҗәт тәйярлинип қобул қилинди. Мәзкүр концептуал программа тәшкилатниң узақ муддәтлик истиқбалиниң мәхсәтлирини бәлгүләйду. Иккинчидин, бүгүндин башлап бизниң бирләшмә «Түркий дөләтләр тәшкилати» дәп атилиду. Шундақ екән, Стамбулда қобул қилинидиған қарарлар қериндаш дөләтләрниң көпқирлиқ һәмкарлиғини җанландурушқа җиддий тәсир йәткүзиду, – дәп қошумчә қилди Қазақстанниң Тунҗа Президенти.