• Муштири топлаш 2022
• 25 Қараша, 2021

Бар болуңлар, җанкөйәрләр!

Гөһәрбүви ИСМАЙИЛҖАНОВА,
«Уйғур авази»
 
 — Алтөй йезисида «Уйғур авази» гезитиға өткән жили 204 аилә муштири болған еди. Бийил жигитбашлири билән ханим-қизлар бу көрсәткүчни ашуримиз дегән нийәттә, — деди йезиниң баш жигитбеши Сәйдәхмәт ака Розахунов биз билән болған сөһбәттә. 
 Һәқиқәтәнму, жут атисиниң бир гепини икки қилмайдиған жутдашлири ишқа қизғин киришип кәтти. Йезидики он сәккиз кочиға сайланған җавапкәр өйму-өй арилап гезитқа йезиватиду. Алтөйлүкләр үч-төрт жилдин бери гезитқа йезилимиз дәп почта бөлүмчисигә берип, аварә болмайду. Әң муһими, ким гезитқа язди – гезитни шу киши өйму-өй тарқитип, йәткүзүп бериду. Биз “йезида почтичи йоқ екәндә?” дегән хуласигә кәлдуқ.— «Уйғур авази» гезити наһийәлик почтиға һәптиниң пәйшәнбә күни келиду. Биз йезида яшиғачқа, гезитни җүмә күни елип чиқиду. Алтөй — чоң жут. Тәркивигә йәнә Надәк вә Чежин йезилири кириду. Йезилиқ почта бөлүмчисидә бари-йоқи бирла почтальон бар. Гезит тошиғучиға башқа штат қараштурулмиған. Йезида яш аилиләр көп. Улар өй селип, жутдашлар сани күндин-күнгә өсмәктә. Шуниң үчүнму ялғуз почтичи гезит-жуналларни тарқитип үлгирәлмәйду. Бизниң тәләпчан гезитханлиримиз арисида пешқәдәм устаз, дохтур, дөләт хизмәтчиси, қисқиси, көзи очуқ, миллий гезит-журналларни төрт көзи билән күтидиған адәмлиримиз хелә нурғун. Шуңа биз «Уйғур авази» гезитини һәр кочиға бөлүнгән җавапкәр адәм тарқитип беришини илтимас қилдуқ. Сөз йоқ, гезит гезитханниң қолиға вақтида йәткүзүлүватиду. Гезит тарқитиватқан, йәни почтичиниң хизмитини атқуруватқан җанкөйәрлиримиз униң үчүн мааш соримайду. Улар бу ишқа жүрәк хаһиши, миллий ғурури билән бәл бағлиғанлар, — деди жигитбеши Сәйдәхмәт ака мәғрурлинип. 
 Адилҗан Аюпов, Абдуллам Имәров, Әзимҗан Имрәмзиев, Илһам Мәсимов, Нурағча Исмайилова, Дилбирим Тудиярова, Камиләм Зайирова, Селимәм Абубәкриева, Розигүл Бақиева, Эльмира Яқупова, Бибинур Мәсимова, Алийәм Имрәмзиева қатарлиқ паалийәтчанлар һәптиниң һәр шәнбә күни жутдашлириниң һалидин хәвәр алғач, гезит-журналларни тарқитип бериду.  Һә, жут мөтивәрлири «Уйғур авазини» қолиға елип, уларға миннәтдарлиғини изһар қилиду. 

Панфилов наһийәси.