• Әхбаратлар еқими
  • 25 Қараша, 2021

Жутниң отидин кирип...

Бәхтишат СОПИЕВ,
«Уйғур авази»

«Шапағат» (илгәрки Заря Востока) микрорайонидики Мурат Һәмраев намидики 150-уйғур оттура мәктивидә 336 бала оқуйду. Бийил тәйярлиқ синипиға — 24, 1-синипқа 27 бала кәлди. Бу өткән жиллар билән селиштурғанда, наһайити яхши көрсәткүч. Буниңға һәрким һәрхил тәхминләрни ейтишмақта. Бири «яш мудирниң әмгиги» десә, йәнә бирлири балилирини уйғур синипиға елип кәлгән ата-аниларни махтаватиду. Бәзиләр җумһурийәтлик Уйғур этномәдәнийәт мәркизи йенида қурулған уйғур мәктәплиригә һәмкарлишиш штабиниң әмгиги дейишиду. Шундақла көпчилик жутниң отидин кирип, сүйидин чиқиватқан жигитбашлириниң миннәтсиз әмгини тилға алмақта. Һәқиқәтәнму бу йәрдә жигитбашлириниң әмгиги көп. Униңға һәргиз көз жумалмаймиз.
Илгири мошу жутта баш жигитбеши болған, һазир җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Ярмәһәмәт ака Кебировниң «бизниң мәлидә жигирмидин ошуқ жигитбеши бар» дегини ядимда. Һәрбир кочида бирдин жигитбеши бар. Демәк, бу кичик жут әмәс. Йәнә келип, у «жуқарқи» вә «төвәнки» дәп иккигә бөлүниду. Ейтмақчи, Ярмәһәмәт ака өзиниң орниға «төвәнки мәлиниң» жигитбеши Үсүпҗан Бәраевниң намзитини көрсәткәндә жут қарши болмиди. Уни бир еғиздин баш жигитбеши қилип сайлашти. Мана бир жилдин бери Үсүпҗан Бәраев жуттики яхши ишларниң тәшәббускари болуп кәлмәктә. Җүмлидин йеңиқи уйғур мәктивигә бала топлашта униң әмгиги көп. 
– Үсүпҗан Байсейитта туғулуп, шу йәрдики уйғур мәктивидә оқуған. Жүриги «уйғурум» дәп соқиду. Шундақла униң жутдарчилиқ ишлириға арилишип жүргинигә 20 жилдин ашти. Адәмләр билән тил тепишишни билиду. Мәктәпкә бала жиғиш, муштири топлаш, театрниң билетини сетиш охшаш ишларда өзиниң паалийәтчанлиғини көрсәтмәктә. Униң «Һардим» дегинини аңлимаймән, – дәйду Ярмәһәмәт ака. – Үсүпҗанниң йенида Әнвәр Әлиев, Сираждин Вәлиев, Дилшат Илахунов, Қурванҗан Сулайманов, Илдар Әлиев, Рәшидин Таҗидинов, Пәрһат Һәйрәмов, Йолдаш Әлиев, Туғлуқ Қаһаров, Пәрһат Һәйрәмов, Әхмәтҗан Зәйнамов, Сәдирдин Нәзәров, Талғат Мәһәмәтов, Нурамбәг Абдуллаев, Мухтәр Ниязов, Йолдаш Зулияров, Абдрим Әлиев,  Ниғмәт Баратов, Әзим Қадир, Мусрәт Кебиров, Рустәм Кәнҗиев, Қудрәт Һетәков, Әркинҗан Иминов, қатарлиқ миллий мәдәнийитимизниң җанкөйәрлири бар. Һәммиси «хәлқим», «жутум» дәп жүгрәп  жүргән адәмләр.
Әву бир жиллири Үсүпҗан Бәраевниң тапқан-тәргининиң бир бөлүгини китапларни нәшир қилишқа, мәктәпкә, һал-оқити төвән аилиләргә хираҗәт қилғинини жутдашлири унтуғини йоқ. У һазирму бу адитини ташлимиди. Пурсити кәлсә, муһтаҗлардин ярдимини айимайду. 
Икки оғул өстүрүп, бәш нәврә сөйгән Үсүпҗан билән Росхан Бәраевлар уларниму милләтпәрвәрлик роһта тәрбийилимәктә. Чоң оғли Әлишер Көкчетав шәһәрлик прокурориниң орунбасари, Әркин дадиси охшаш әл хизмитидә. 
Биз гезитимизниң активистини тәвәллуди билән тәбрикләп беришимизға, униң өйигә икки кочиниң жигитбеши кирип кәлди. Кирипла һәр иккилиси қоюн дәптәрлирини чиқарди. «Кочимизда паланчә адәм «Уйғур авазиға», паланчә адәм «Азия бүгүн» гезитиға йезилди» дәп һесават беришкә башлиди улар. 
Гәпара жут активистлири гезитлиримизни тарқитиш мәсилиси бойичә дуч келиватқан қийинчилиқларға тохталди. Бу мәсилә аста-аста һәл болуватиду. Хошал боларлиқ йери, бәзи жигитбашлири почта хадимлирини күтмәй, кочисидики 60 аилигә өзлири тарқитиветипту. Буни аңлап, уларға өзимизниң миннәтдарлиғини изһар қилдуқ. 
— Жутумизниң өмлүгигә тил тәгмисун. Жутдашлар һәрқандақ тәшәббусимизни қоллап-қувәтләп кәлмәктә.- дәйду Үсүпҗан Бәраев. 
«Бар күчимизни мәктәпкә селишимиз керәк. Миллий мәктәп бар болса, яшлиримиз гезитму оқуйду, театрғиму бариду» дәйду улар.

212 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы