• Әхбаратлар еқими
• 25 Қараша, 2021

Бирлигимиз ярашқан

Қазақстанни маканлиған 130дин ошуқ милләт билән еләтниң тили башқа болғини билән – дили бир. Яркәнт тәвәсидә мана шундақ қириқтин ошуқ милләт вә еләт вәкиллири бир чаңирақ астида достлуқ билән милләтләрара разимәнликтә яшап, әмгәк қиливатқанлиғи билән мәшһур. Йеқинда Панфилов наһийәлик Уйғур этномәдәнийәт мәркизиниң мәҗлисләр залида өткән Қазақстан Мустәқиллигиниң 30 жиллиғиға беғишлинип өткән «Бірлігіміз жарасқан» намлиқ әдәбий музыкилиқ кәч бу сөзүмизгә испат болалайду.

Гөһәрбүви ИСМАЙИЛҖАНОВА,
«Уйғур авази»
 
Яркәнт шәһәрлик китапхана вә шәһәрлик Мәдәнийәт өйи хадимлири, наһийәлик Уйғур этномәдәнийәт мәркизи һәмкарлиғида уюштурулған чаригә шәһәр һакимийити, тәвәдә паалийәт елип бериватқан туңган, славян мәдәнийәт мәркәзлириниң рәһбәрлири билән жут-җамаәтчилик вәкиллири қатнашти. 
 Яркәнт шәһәрлик китапхана мудири Сауле Қайрақова «Менің елим – бейбіт өмір бесігі» мавзусида доклад билән сөзгә чиқти. Натиқ мустәқилликниң 30 жилида барлиқ саһаларда қол йәткүзгән утуқ-муваппәқийәтләргә тәпсилий тохталди. Әң чоң байлиғимиз – елимиздики хәлиқләр достлуғи билән бирлигини тәриплиди. Башқа әлләр қизиқип қараватқан елимизниң Тунҗа Президенти — Елбасы Нурсултан Назарбаевниң тәшәббуси билән тәшкил қилинған Қазақстан хәлқи Асссамблеясиниң ролини вә елип бериватқан нәмунилик ишлирини атап көрсәтти. Тәвәдики уйғур қазақ, туңган, өзбәк, таҗик рус, украин вә башқиму милләт вәкиллириниң, худди бир аилиниң балилиридәк, иҗил-инақ яшап қиз берип, қиз елип, қиз берип, қуда-тамыр болуп өмүр сүрүватқанлиғини тилға алди. 
Шуниңдин кейин сөзгә чиққан Алмута вилайәтлик туңган этномәдәнийәт мәркизиниң рәиси Исмаз Лосанов, Панфилов наһийәлик уйғур, славян мәдәнийәт мәркәзлириниң рәһбәрлири Азат Гайитов, Алина Коробова, әмгәк ветерани Зинат Шыныбаева вә башқилар тәвәдики һәрхил милләт вәкиллириниң бир-бирини тәрҗимансиз чүшинип, урпи-адәт, рәсим- қаидилиригә һөрмәт билән қарайдиғанлиғини қәйт қилишти. Бу хилдики учришиш, баш қошушларниң пандемияниң тәсиридин уюштурулмиғанлиғини, әндиликтә, болупму яшлар билән достлуқни күйләйдиған әдәбий кәчләр, мәдәний-аммивий чарә-тәдбирлириниң өтүшини халайдиғанлиғини йошурмиди. 
Бу күни сөзгә чиққучилар Яркәнт шәһәрлик китапхана хадимлири Сауле Қайрақова билән Айгүл Жетписбаева уюштурған китап көргәзмисини зиярәт қилишти. Китапханичилар билән мәдәнийәт саһасиниң хадими Бақытгүл Байжумановаға миннәтдарлиғини изһар қилип, иҗадий утуқ тилиди. Тәвә турғунлириниң достлуғи билән бирлиги арқисида наһийә ихтисади билән мәдәнийитини йүксәлдүрүшкә қошуватқан төһписини алаһидә атап көрсәтти. Бу достлуқниң үлгисини әвлаттин-әвлатқа сақлап қалдуруш – һәрбиримизниң борчи екәнлигини қәйт қилишти. Сөзара қазақ, уйғур, рус хәлиқ нахша-уссуллири иҗра қилинип, достлуқ, бирлик һис-туйғулири намайиш қилинди. 

 Панфилов наһийәси.