• Әхбаратлар еқими
• 25 Қараша, 2021

«Елбасы. Мустәқиллик. Парламент»

Нурсултан Назарбаевниң тәшәббуслири Қазақстанниң турақлиқ тәрәққий етишини тәминлиди.

Бу тоғрилиқ Мәҗлис рәиси Нурлан Ниғматулин «Елбасы. Мустәқиллик. Парламент» мавзусида өтүп, Тунҗа Президент күнигә беғишланған Хәлиқара парламент конференциясидә билдүрди.
Мәҗлис рәиси Қазақстан бийил нишанлайдиған Мустәқилликниң 30 жиллиғи тоғрилиқ гәп қилип, Тунҗа Президент Нурсултан Назарбаевниң мәмликәтниң шәкиллинишидә вә утуқлуқ тәрәққий етишидә бебаһа роль ойниғанлиғини тәкитлиди.
Нурлан Ниғматулинниң сөзичә, нәқ Елбасыниң стратегиялик йоли түпәйли Қазақстан Кеңәш Иттипақиниң жирақ чәттики җумһурийитидин дуниявий бирләшминиң толуқһоқуқлуқ әзасиға, региондики лидерға, күчлүк ихтисатқа егә вә турақлиқ тәрәққий етиватқан җәмийәткә айланди.
Мәҗлис спикери Қазақстан өткән әсирниң 90-жиллирида дуч кәлгән чоңқур ихтисадий боһран вә малийәвий турақсизлиқ тоғрилиқ әслитип өтүп, мәмликәткә әмәлиятта йоқ нәрсидин йеңи вақит тәләплиригә җавап беридиған нәтиҗидарлиқ башқуруш йолини қурушқа тоғра кәлгәнлигини атап көрсәтти.
– Қазақстанниң Тунҗа Президенти вәтәндашлириниң паравәнлигини асасий орунға қойди, буниң үчүн, биринчи новәттә, ихтисадий ислаһатларға диққәт бөлүшни тәклип қилди. Бүгүнки күндә Нурсултан Назарбаевниң «Дәсләп ихтисат, андин – сәясәт» формулиси дөләтлик боһран-менеджмент өлчимигә айланди, – дәп тәкитлиди Нурлан Ниғматулин. 
Нәрқ механизмлириниң җарий қилиниши, миллий валютиниң киргүзүлүши, Миллий фондниң қурулуши вә башқиму чариләр шу вақитта әмәлгә ашурулған муһим қарарлардин болди.
Мәҗлис рәиси бийил 25 жиллиғини нишанлайдиған Қазақстан парламентаризминиң тәрәққий етишигә диққәтни җәлип қилди.
Нурлан Ниғматулинниң тәкитлишичә, Қазақстан парламентаризми – мәмликәтниң сәясий һаятидики эволюциялик җәриянларниң һәм көрсәткүчи, һәм нәтиҗиси.
– Парламентаризмниң барлиқ тәрәққий етиш басқучлирида қанун чиқириш һакимийитиниң роли вә тәсирини күчәйтишни миллий дөләтчиликниң шәкиллинишиниң һәм тәрәққий етишиниң муһим вәзипилиринң бири сүпитидә бәлгүлигән Қазақстанниң Тунҗа Президентиниң идеялири, тәшәббуслири вә қарарлири асасий роль ойниди вә ойнашни давамлаштуруватиду, – дәп тәкитлиди у. 
Мәҗлис рәиси қазақстанлиқ парламентаризм үлгиси тоғрилиқ гәп қилип, униң демократияләштүрүшниң күчийиши билән һәрбир басқучта өзгәргәнлигини тәкитлиди. Уларниң арисида – мәмликитимизниң икки палатилиқ системини таллавелиши, Қазақстан хәлқи Ассамблеясиниң депутатлирини сайлаш арқилиқ Парламентта түрлүк этносларниң өз вәкиллиригә егә болуш имканийити, көппартиявийлик, һакимийәт вакалитини Президенттин Парламентқа вә Һөкүмәткә қайта тәхсим қилиш.
Нурлан Ниғматулин Қазақстанниң һазирқи тәрәққиятиға тохтилип, Елбасыниң стратегиялик йолиниң варислиғини Дөләт рәһбири Қасым-Жомарт Тоқаев тәминләватқанлиғини атап өтти. Буниңда Мәҗлис спикери инсан һоқуқини қоғдашниң йеңи механизмлирини җарий қилишниң, гражданларниң қатнишишини кәңәйтишниң вә җәмийәт назаритини күчәйтишниң муһим һесаплинип, актуаллиққа егә екәнлигини тәкитлиди. Нурлан Ниғматулинниң сөзичә, жүргүзүлүватқан сәясий ислаһатлар қануний қоллап-қувәтләшкә егә. Мәсилән, сайлам қанунини вә сот системисини мукәммәлләштүридиған пүтүнсүрүк қанунлар түркүми қобул қилинди. Шундақла сәясий партияләр, течлиқ мәхсәттики жиғинлар, йәрлик өзини өзи башқуруш тоғрилиқ қанун һөҗҗәтлиригә өзгиришләр киргүзүлди. 
– Сөзсизки, заманивий, утуқлуқ тәрәққий етиватқан Қазақстан – бу Мустәқилликниң дәсләпки жиллиридила өз тәғдирини Нурсултан Әбишоғли Назарбаевқа, униң җәмийәт тәләплиригә өз вақтида җавап бериш, ислаһатларни алдин-ала жүргүзүш вә милләтни жуқури мәхсәтләрни қолға кәлтүрүшкә җипсилаштуруш қабилийитигә ишәш қилип тапшурған барлиқ қазақстанлиқларниң умумий күчиниң нәтиҗиси. Бүгүнки таңдиму Қасым-Жомарт Кемелоғли Тоқаев Елбасыниң йолини давамлаштуруп вә сәясий ислаһатларни жүргүзүп, Қазақстан җәмийәт һаятиниң барлиқ саһалирини йеңилаш үчүн бирқатар тәшәббусларни оттуриға қойиватиду. Мошуниң һәммиси – Қазақстанниң пүткүл дуния үчүн мурәккәп вақитқа бәрдашлиқ берипла қоймай, бәлки ихтисатниң турақлиқ өсүшини вә қазақстанлиқниң паравәнлигиниң ашурулушини қолға кәлтүрүшиниң ишәшлик имканийити, – деди Нурлан Ниғматулин.
Хәлиара парламент конференциясигә Сенат вә Мәҗлис депутатлири билән бирқатарда Әзәрбәйҗан, Өзбәкстан, Россия, Словакия, Түркия, Европа парламентлириниң рәһбәрлири вә вәкиллири, шундақла хәлиқара тәшкилатларниң вәкиллири һәм экспертлар қатнашти.