• Әхбаратлар еқими
  • 01 Желтоқсан, 2021

«Әдәбий достлуқ — әбәдий достлуқ»

Йеқинда Алмута шәһиридики М.Һәмраев намидики 150-уйғур оттура мәктивидә Қазақстан Мустәқиллигиниң 30 жиллиғиға беғишланған Қазақстан Язғучилар иттипақи Уйғур әдәбияти кеңишиниң рәиси, шаирә, алимә Патигүл Мәхсәтова билән «Әдәбий достлуқ – әбәдий достлуқ» мавзусида онлайн-учришиш болуп өтти. Униңға мәктәп муәллимлири билән оқуғучилар, шундақла җәнубий пайтәхттики оқутуш уйғур тилида жүргүзүлидиған мәктәпләрдин бир топ муәллимләр қатнашти. 
Учришишни М.Һәмраев намидики 150-уйғур оттура мәктиви мудириниң вәзиписини атқурғучи Муһидин Имашев киришмә сөз билән ечип, қатнашқучиларни Қазақстан Мустәқиллигиниң 30 жиллиқ мәрикиси билән қизғин тәбриклиди. Андин у мәктәп оқуғучилириниң қазақстанлиқ вәтәнпәрвәрлик роһида тәрбийилиниватқанлиғини вә уларниң заман тәливигә мувапиқ сүпәтлик билим вә аңлиқ тәрбийә еливатқанлиғини қәйт қилғач, шаирә вә алимә Патигүл Мәхсәтова тәрипидин «Гүллән, яшна, Қазақстан!» топлиминиң нәширдин чиққанлиғини атап өтти вә ишлириға иҗадий утуқ тилиди. 
Шуниңдин кейин уйғур тили вә әдәбияти пәнлириниң муәллими Гүлнара Тайирова Патигүл Мәхсәтованиң иҗадий паалийитигә тәпсилий тохтилип өткәч, шаирәниң Қазақстан Мустәқиллигигә беғишланған бирқанчә әсәрлирини атап өтти .
Учришиш җәриянида 8-синип оқуғучилири Амиля Абдурахманова билән Илминур Абдулҗанова шаирәниң бирқанчә шеирлирини ядқа ейтип бәрсә, уйғур тили вә әдәбияти пәнлириниң муәллими, филология пәнлириниң намзити Һакимҗан Һәмраев Патигүл Мәхсәтованиң «Гүллән, яшна, Қазақстан!» топлими һәққидә ой-пикирлири билән ортақлашти. 
Учришиш давамида шаирлиримизниң достлуқ мавзусиға беғишланған шеирлири оқуғучилар тәрипидин ипадилик оқулди. Патигүл Мәхсәтованиң шаирә, алимә сүпитидила әмәс, оқуғучилиримиз пайдилиниватқан дәрисликләрниң муәллипи сүпитидиму яхши тонуш екәнлиги вә униң миллий маарипимизниң риваҗлинишиға қошуватқан төһписиниң зор екәнлиги тилға елинди. 
— Онлайн-учришишқа тәклип қилғиниңларға көп рәхмәт, — деди сөз новитини алған Патигүл Мәхсәтова. — Мәнму барлиқ муәллимләр билән оқуғучиларни Қазақстан Мустәқиллигиниң 30 жиллиқ мәрикиси билән чин қәлбимдин тәбрикләймән. Муәллимләрниң ишлириға муваппәқийәт, оқуғучиларниң оқушта илғар болуп, дайим жуқури пәллиләрдин көрүнүшини тиләймән. Әнди «Гүллән, яшна, Қазақстан!» топлимимға кәлсәк, әсирләр бойи давамлишип кәлгән қазақ-уйғур достлуғи әдәбиятимиздиму өз әксини ярқин тапалиғанлиғи мәзкүр топламдики әдипләр иҗадидин ениқ көрәләймиз. Қазақ хәлқиниң уйғур хәлқигә ят әмәслигини тарих сәһипилиридин яхши билимиз. Шуңлашқа бу учришишниң «Әдәбий достлуқ – әбәдий достлуқ» дәп атилиши беҗиз әмәс. Әлвәттә, бүгүн өткүзүлгән чарә-тәдбирниң тәрбийәвий әһмийити зор вә мошу хилдики иҗадий учришишлар мәктәпләрдә пат-пат өткүзүлүп турса, иҗаткарлар билән оқурмәнләр арисидики достанә мунасивәтләрму мустәһкәмлиниду. 
Учришиш ахирида муәллимләр вә оқуғучилар сөз болуватқан мәсилиләр әтрапида ой-пикирлири билән бөлүшкәч, шаирә вә алимәгә өзлирини ойландуруватқан соалларни қоюп, қанаәтлинәрлик җавап алди. 
Оқуғучиларни достлуққа, вәтәнпәрвәрликкә тәрбийиләш, өсмүрләрдә милләтләрара достлуқ чүшәнчисини шәкилләндүрүш мәхситидә уюштурулған мәзкүр учришиш тәсирлик һәм қизиқарлиқ өтти.

Ялқун МӨМҮНОВ, 
М.Һәмраев намидики 150-уйғур оттура мәктиви мудириниң тәрбийә ишлири бойичә 
орунбасари.

Алмута шәһири.
 

298 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы