Әхбаратлар еқими
01 Желтоқсан, 2021

Аттестацияләш қаидилири өзгәрди

Қазақстан Җумһурийитиниң билим вә пән министри 2021-жил 12-ноябрьда Балилар бағчилирида, мәктәпләрдә, колледжларда вә башқа тәшкилатларда ишләватқан педагог хадимларни аттестацияләш қаидилири һәм шәртлиригә өзгиришләрни киргүзди.
Мәсилән, педагогларни аттестацияләш үчүн Билим башқармилирида комиссияләр қурулиду.
Аттестацияләш комиссиясиниң тәркивигә 10 жил әмгәк стажиға, «педагог-тәтқиқатчи» яки «педагог-мастер» квалификациялик категориясигә егә педагоглар, оқуш-методикилиқ кабинетлириниң (мәркәзлириниң), квалификацияни ашуруш тәшкилатлириниң методистлири, җәмийәтлик вә һөкүмәтлик әмәс тәшкилатларниң, кәспий иттипақларниң вәкиллири, Билим башқармилири органлириниң, идарә қаримиғидики тәшкилатларниң мутәхәссислири кириду.
Билим тәшкилатлириниң рәһбәрлирини вә рәһбәрләрниң орунбасарлирини аттестацияләш комиссиясиниң тәркивигә дөләт органлириниң, әмгәк бойичә вакаләтлик дөләт органлириниң вәкиллири, кәспий иттипақлар, һөкүмәтлик әмәс тәшкилатларниң, билим тәшкилатлири башқармилири коллегиаллиқ органлириниң, җәмийәтлик кеңәшләрниң вәкиллири, шундақла аттестацияләш органниң қурулумлуқ бөлүнмилириниң хадимлири кириду.
Тегишлик дәриҗидики комиссия аттестациядин өткүчиниң һөҗҗәтлирини жилиға икки қетим (еқимдики жилниң 5-май вә 5-ноябрь күнлиригичә) қарайду.
Аттестацияләш төвәндики басқучлардин ибарәт:
Педагоглар үчүн:
МКТ; эссе; квалификациялик баһа; паалийәт нәтиҗилирини комплекслиқ аналитикилиқ хуласиләш.
Билим тәшкилати рәһбәрлириниң орунбасарлири вә методистлар үчүн:
квалификациялик баһа; паалийәт нәтиҗилирини комплекслиқ аналитикилиқ хуласиләш; аттестация комиссиясиниң мәҗлисидә паалийәт нәтиҗилирини тонуштуруш сөһбити (өзини баһалаш вә комиссия баһалири мас кәлмигәндә).
Билим тәшкилатлири вә методикилиқ кабинетларниң рәһбәрлири үчүн:
МКТ; квалификациялик баһа; паалийәт нәтиҗилирини комплекслиқ аналитикилиқ хуласиләш; аттестация комиссиясиниң мәҗлисидә паалийәт нәтиҗилирини тонуштуруш сөһбити (өзини баһалаш вә комисси баһалири мас кәлмигәндә).
Буйруқ 2021-жили 5-декабрьдин тартип күчигә кириду.