• Әхбаратлар еқими
  • 01 Желтоқсан, 2021

Яшлиқ йешини өстүрүш муһакимә қилинди

Қазақстанда яшларниң йешини 35 яшқа өстүрүш мәсилиси муһакимә қилинди, дәп хәвәр қилиду җумһурийәт Әхбарат вә җәмийәтлик тәрәққият министрлигидә.
Министрликниң хәвәр қилишичә, 2021-жилниң 21-майида Қазақстан Президенти Яшлар сәясити бойичә кеңәшниң мәҗлисидә Қазақстандики яшлиқ йешини 35 яшқа өстүрүш мәсилиси муһакимә қилинған.
“Кеңәш ишчи топлириниң әзалири мәзкүр мәсилини тәпсилий қарап чиқип вә һәртәрәплимә оқуп-үгинип Қазақстандики яшлиқ йешини 35 яшқа ашуруш тоғрилиқ тәклипни қоллап-қувәтлиди”, дәйду идариниң мәтбуат-хизмитидикиләр.
Шундақла министрликтә мәзкүр мавзуға бағлиқ хәлиқара тәҗрибини “Яшлар” илмий тәтқиқат мәркизи оқуп-үгәнгәнлигини хәвәр қилди. Мәркәзниң мәлуматичә, Дуниявий саламәтликни сақлаш тәшкилати вә БМТниң класификацияси бойичә яшлиқниң әң жуқарқи чеки сүпитидә 44 яш бәлгүләнгән. Бирқатар Европа дөләтлиридә (Грекия, Италия, Португалия, Кипр, Румыния), шундақла Шәрқий Җәнубий Азия әллиридә, (Сингапур, Вьетнам) 15 яштин 35 яшқичә болған шәхсләр яшлар болуп һесаплиниду. Буниңдин ташқири, Қазақстанниң “Рухани жаңғыру” җәмийәтлик тәрәққият институти” коммерциялик әмәс акционерлиқ җәмийити 2021-жилниң 21-сентябридин 1-октябриғичә “Қазақстандики яшлиқ йешини 35 яшқа ашуруш” мавзусиға иҗтимаий тәтқиқат жүргүзди.
“Иҗтимаий тәтқиқат нәтиҗиси бойичә пикри соралған респодентларниң 66,9 пайизи заманивий шараитта пәқәт йеши 29дин төвән болған гражданларла яшлар болуп һесаплиниду дегәнгә келишкән. Шуниң билән бир вақитта “Әгәр қануний дәриҗидә яшларниң йешини 35кә ашуруш имканийити пәйда болса, буниңға сиз қандақ қариған болар едиңиз?” дегән соалға пикри соралғанларниң 61,8 пайизи иҗабий җавап бәргән. Шундақ екән, пикри соралғанларниң көпчилиги яшлиқ йешини 35кә ашуруш тоғрилиқ идеяни қоллап-қувәтләйду, дәп тәкитләйду идаридикиләр.
Әхбарат вә җәмийәтлик тәрәққият министрлигинин мәлуматлиричә, һәрбир бәшинчи қазақстанлиқ бу әтики күнгә болған ишәнчә һис-туйғусини вә оптимизмини мустәһкәмләйду, яшларниң иҗтимаий активлиғини ашуриду, дәп һесаплайду. Әмәлиятта пикри соралған қазақстанлиқларниң төрттин бир қисми яшлиқ йешини ашурушниң аилә қуруш, бала тепиш йешиниң өсүшигә елип келидиғанлиғиға үмүт қилиду.
Идаридикиләр Қазақстанда бәзибир дөләт қоллап-қувәтләш чарилири һазирниң өзидә 35 яшқичә болған шәхсләрниң қатнишишини көздә тутидиғанлиғини әскә салди. Һазирқи күндә Қазақстанда 14 яштин 29 яшқичә болған шәхсләрла яшлар дәп һесаплиниду.
Буниңдин илгири Президент Қасым-Жомарт Тоқаев яшларниң яш чекини ениқлаш үчүн умумий шкалини ишләп чиқиш вәзиписини тапшурған.
“Яшларниң яш даирисини ениқлайдиған умумий шкалини ишләп чиқиш актуал мәсилә болуп һесаплиниду. Көплигән дөләтләрдә яшларниң жуқарқи яш дәриҗиси 35 яшқа ашурулған. Бу некалиқ болуш оттура йешиниң өсүши вә адәмләрниң билим елишқа вә кәспини мукәммәлләштүрүшкә көп вақит сәрип қилиши түпәйли йүз бериватиду. Бизниң дөлитимиз буниңдин истисна әмәс”, деди Дөләт рәһбири Миллий җәмийәтлик ишәнчә кеңишиниң мәҗлисидә. 

163 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы