• Әхбаратлар еқими
  • 01 Желтоқсан, 2021

Муһим мәсилиләр муһакимә қилинди

Қазақстан Премьер-министри Асқар Мамин Түркстан шәһиридә Өзбәкстан Премьер-министри Абдулла Арипов билән музакириләрни өткүзди вә икки мәмликәтниң III Регионларара һәмкарлиқ форумиға қатнашти.
Музакириләр давамида сода-ихтисадий, инвестициялик, йеза егилиги, транзит-транспорт, су-энергетика саһалирида, санаәт кооперациясидә, туризм вә башқа саһаларда иккитәрәплимә һәмкарлиқни тәрәққий әткүзүш мәсилилири муһакимә қилинди.
Мәлумки, Мәркизий Азиядики пүткүл регионал содиниң 70 пайизға йеқини Қазақстан билән Өзбәкстанниң әнчисигә тоғра келиду. Иккитәрәплимә сода айлиними 2021-жилниң өткән тоққуз ейи ичидә 2,9 миллиард доллардин ешип кәтти, бу 2020-жилниң мошу вақти билән селиштурғанда, 28,5 пайиз ошуқтур.
2021-жилниң йәкүни бойичә, Өзбәкстан Қазақстанниң әң чоң бәш сода шеригиниң қатариға кириши мүмкин. 2022-жили өзара сода көләмини 5 миллиард, кейинки бәш жил мабайнида 10 миллиард долларға йәткүзүш вәзиписи қоюлди. Икки мәмликәт чегарисида «Мәркизий Азия» хәлиқара сода-ихтисадий һәмкарлиқ мәркизини қуруш лайиһисини әмәлгә ашуруш ишлири жүргүзүлүватиду.
Премьер-министр Асқар Мамин санаәт кооперацияси саһасидики Қазақстан-Өзбәкстан һәмкарлиғиниң жуқури дәриҗидә екәнлигини тәкитлиди.
– Машина ясаш, қурулуш индустрияси саһалирида вә фармацевтика санаитидә һәмкарлиқни күчәйтиш имканийити моҗут, – деди Асқар Мамин.
Қазақстан Һөкүмитиниң рәһбири икки мәмликәт оттурисида транзит-транспорт саһасидики өзара һәрикәтниң жуқури дәриҗидә екәнлигини тәкитлиди — төмүрйол инфрақурулумини тәрәққий әткүзүш, автомобиль өткүзүш пунктлирини йеңилаш бойичә чоң бирләшкән лайиһиләрни әмәлгә ашуруш ишлири жүргүзүлүватиду, жүк тошуш үчүн қолайлиқ тариф сәясити вуҗутқа кәлтүрүлди. Өткән 10 айда мәмликәтләр оттурисида төмүрйол арқилиқ жүк тошуш көләми 20,5 миллион тоннини тәшкил қилди.
 Асқар Мамин икки мәмликәтниң әтрап муһитни қоғдаш, су вә орман егилиги саһалирида һәмкарлиқни йолға қоюшиниң муһим екәнлигини атап көрсәтти. Суғириш вақтида бирлишип күч чиқириш арқилиқ Тоқтоғул вә Қайрақум су амбарлиридин су қоюп бериш әмәлгә ашурулди, бу йеза егилиги мәһсулат йетиштүргүчилириниң тәләп-еһтияҗини қанаәтләндүрди. Арал деңизиниң кәскин экологиялик проблемилирини һәл қилиш, пүткүл Арал деңизи региониниң иҗтимаий-ихтисадий тәрәққиятини қоллап-қувәтләш лайиһилири әмәлгә ашурулуватиду. 
Икки мәмликәт Премьерлири иккитәрәплимә һәмкарлиқ бойичә бирләшкән Һөкүмәтләрара комиссия мәҗлисини өткүзди һәм Қазақстан Җумһурийити вә Өзбәкстан Җумһурийитиниң «Чегариларара һәмкарлиқ: өсүш имканийити» мавзусида өткән III Регионларара һәмкарлиқ форумиға қатнашти. Форумға 200гә йеқин адәм: дөләт органлириниң, регионларниң рәһбәрлири, шундақла икки мәмликәт бизнес саһасиниң вәкиллири жиғилди.
Форум даирисидә машина ясаш, йеза егилиги, қурулуш, электр техникиси материаллирини, медицинилиқ мәхсәттики буюмларни ишләпчиқириш, инфрақурулумни вә башқа саһаларни тәрәққий әткүзүш бойичә умумий баһаси 611,3 миллион доллар болған 54 инвестициялик вә коммерциялик шәртнамә имзаланди. 
Түркстанға қилған сәпири давамида икки мәмликәт һөкүмәтлириниң рәһбәрлири Назарбаев Әқлий мәктивиниң ечилиш мәрасимиға қатнашти, Йәссави мавзолейини, «Ұлы Дала Елі» мәркизини, «Карван-Сарай» туристик комплексини вә башқа объектларни зиярәт қилди. 

205 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы