• Әхбаратлар еқими
• 01 Желтоқсан, 2021

Җамаәтчилик билән учрашти

Өткән һәптидә җумһурийәтлик Уйғур этномәдәнийәт мәркизиниң рәиси, Қазақстан хәлқи Ассамблеяси Кеңишиниң әзаси Шаһимәрдан Нурумов рәһбәрлигидики ҖУЭМниң бир топ башқарма әзалири Панфилов, Уйғур вә Әмгәкчиқазақ наһийәлиридә болуп, тәвәдики җамаәтчилик вәкиллири билән учрашти. 

Гөһәрбүви ИСМАЙИЛҖАНОВА,
«Уйғур авази»

Дәсләп Панфилов наһийәлик Уйғур этномәдәнийәт мәркизиниң рәиси вәзиписини атқуруватқан Азат Гайитов ҖУЭМ рәисигә һәмра болуватқан ҖУЭМ рәисиниң орунбасари, җумһурийәтлик «Уйғур авази» гезитиниң баш муһәррири, ҚХА әзаси Ершат Әсмәтовни, ҖУЭМ рәисиниң орунбасари, ҚХА әзаси Долқунтай Абдухелилни, мәркәзниң иҗраий мудири Зихруллам Қурванбақиевни вә ҖУЭМ рәисиниң мәслиһәтчиси Султанмурат Исрапиловни көпчиликкә тонуштурди. Андин сөз алған Шаһимәрдан Үсәйиноғли яркәнтликләрни елимизниң Тунҗа Президенти күни вә Қазақстан Мустәқиллигиниң 30 жиллиқ мәйрими билән тәбриклиди.
– Әгәр өткән 30 жилға нәзәр ташлайдиған болсақ, даналиримиз мәдһийилигән, әҗдатлиримиз арман қилған әркинлигимизниң һәрбир жилиниң тарихимизда шанлиқ сәһипә болуп қалғанлиғиға көз йәткүзимиз. Өткән әсирниң тохсининчи жиллири есимиздин чиққини йоқ. Бүгүнки турмуш-тирикчилигимиз дәриҗисини әшу жиллар билән селиштурсақ, асман билән йәрдәк пәриқ бар екәнлигини сезивалимиз. Оттуз жил ичидә сүръәтлик тәрәққий етип, өсүп, алға интиливатқинимиз, Қазақстанниң пүткүл дунияға тонулуватқанлиғи – бу елимизниң Тунҗа Президенти – Елбасы Нурсултан Назарбаевниң дана сәясити вә уни изчил давамлаштуруп келиватқан Дөләт рәһбири Қасым-Жомарт Тоқаевниң шиҗаәтлик әмгәк-әҗригә беваситә бағлиқ. Шундақ екән, җумһурийәтлик Уйғур этномәдәнийәт мәркизи тәрипидин уюштурулуватқан чарә-тәдбирләрниң асасий мәхсити – көпмилләтлик елимиздики хәлиқләр достлуғи билән җәмийәтлик разимәнликни мустәһкәмләшкә, миллий қәдрийәтлиримизни сақлап, риваҗландурушқа қаритилғанлиғини алаһидә қәйт қилғум келиду, – деди Шаһимәрдан Нурумов.
 Мәркәзниң икки жилда елип барған ишлири тоғрилиқ новәттики натиқ – Зихруллам Қурванбақиев һесават бәрди. У өз сөзидә өткән 2020-2021-жилларниң Қазақстан хәлқи үчүнла әмәс, бәлки пүткүл дуния әһли үчүн әндишилик жил болғанлиғини, таҗсиман вирустин сақлинип, карантин чарилиригә риайә қилған һалда, пандемия пәйтидә нурғунлиған паалийәтләрниң жүргүзүлгәнлигини, җүмлидин меценатлар тәрипидин тәминати начар аилиләр билән көпбалилиқ аниларға, житим-йесирларға ярдәм көрситилгәнлигини тилға алди. Зихруллам Абайоғли шундақла рәсим- қаидилиримизни, урпи-адәтлиримизни сақлап, уларни бүгүнки күн тәливигә мувапиқ тәрәққий әткүзүштә, оқутулуш уйғур тилида жүргүзилидиған мәктәпләргә бала топлашта, миллий нәширлиримиз оқурмәнлириниң санини көпәйтиш вә һәрхил аммивий-мәдәний чариләрни өкүзүштә ҖУЭМниң алаһидә паалийәтчанлиқ көрсәткәнлигини тәкитлиди.
Новәттики натиқ Долқунтай Абдухелил хәлқимизниң бирлик-өмлүгини қолға кәлтүрүш бойичә өз пикрини изһар қилип, яркәнтликләрниң бу җәһәттин жүргүзүватқан ишлириға апирин әйлиди. Шуниңдин кейин Панфилов наһийәсиниң Пәхрий граждини Турсун Семәтов, Панфилов наһийәлик Уйғур этномәдәнийәт мәркизи рәисиниң орунбасари Маһинур Аюпова, Панфилов наһийәлик ички сәясәт бөлүминиң баш мутәхәссиси Олжас Сарпек, пешқәдәм устаз Майминәм Имәрова җумһурийәтлик Уйғур этномәдәнийәт мәркизиниң һәммимизни һәләйкүмгә салған пандемия шараитидики паалийитигә жуқури баһасини берип, кәлгүси ишлириға муваппәқийәт тилиди. 
***
Сабирәм ӘНВӘРОВА, 
«Уйғур авази»

Уйғур наһийәлик китапхана бенасиниң конференция залида өткән жиғинға наһийәлик Уйғур этномәдәнийәт мәркизиниң әзалири, жигитбашлири билән паалийәтчан ханим-қизлар қатнашти. 
Жиғинға модераторлиқ қилған ҖУЭМниң Уйғур наһийәлик шөбисиниң рәиси Арлен Һосманов авал жиғин қатнашқучилири вә күн тәртивидики мәсилиләр билән тонуштурди. Атап ейтқанда, Шаһимәрдан Үсәйиноғли башлиған топ тәркивидә ҖУЭМ рәисиниң орунбасари, җумһурийәтлик «Уйғур авази» гезитиниң баш муһәррири, ҚХА әзаси Ершат Әсмәтов, ҖУЭМ рәисиниң орунбасари, ҚХА әзаси Долқунтай Абдухелил, ҖУЭМ рәисиниң орунбасари Нурмәһәмәт Палтахунов, ҖУЭМниң иҗраий мудири Зихруллам Қурванбақиев билән ҖУЭМ рәисиниң мәслиһәтчиси Султанмурат Исрапилов болди. Күн тәртивидики мәсилә бойичә җумһурийәтлик Уйғур этномәдәнийәт мәркизиниң икки жиллиқ иш-паалийитиниң һесавати берилди. 
Гәпни өткән жили елимиздики карантинлиқ вәзийәткә бағлиқ һесават бериш жиғинини уюштуралмиғанлиғидин башлиған Шаһимәрдан Нурумов көпчиликни алдимиздики чоң мәйрәмләр Тунҗа Президент күни вә Мустәқиллигимизниң 30 жиллиқ тойи билән тәбриклиди. Бүгүнкидәк бәхтияр, хатирҗәм һаят кәчүрүшимиз Елбасы билән Президентимизниң дана сәясити, бир чаңирақ астида инақ-иҗил яшаватқан йүз оттуздин ошуқ милләт вәкиллириниң бирлигиниң йемиши екәнлигини сөз қилди натиқ. Андин күн тәртивидики асасий мәсилигә көчүп, ҖУЭМ икки жил мабайнида атқурған ишлирини үнчидәк тизип чиқти.
– Көпмилләтлик елимиз яритип бәргән имканийәтләрдин пайдилинип, ана тилимиз, әдәбиятимиз, миллий мәдәнийитимиз, сәнъитимиз, тарихимиз, маарипимиз һәм мәтбуатимизни риваҗландуруп, дөләт сәяситини тәрғибат-тәшвиқат қилип, хәлиқләр достлуғини мустәһкәмләшни асасий мәхсәт қилған ҖУЭМниң җай-җайлардики шөбилири қизғин паалийәт елип бармақта. Пандемиягә бағлиқ нурғунлиған чарә-тәдбирләрни онлайн-форматта өткүзүшүмизгә тоғра кәлди. Атап ейтсақ, Абай Қунанбаев билән Җамбул Жабаевниң 175 жиллиғини, бирқатар намайәндилиримизниң тәвәллудлирини кәң түрдә нишанлап өттуқ. Буниңдин башқа тәвәллудлуқ яшқа толған алтә алимимизға беғишланған хәлиқара онлайн-әнҗуманларни өткүзүп, хәлқимиздин чиққан талантлиқ әрбаплиримизни яш әвлатқа тонуштуруш йолида көплигән ишларни әмәлгә ашурдуқ. «Көк чөшүрә мәйрими», «Әткәнчай фестивали» қатарлиқ миллий мәйрәмлиримизни җанландуруп, миллий таамлиримизни, қедимий аталғулиримизни сақлап, келәчәк әвлатқа йәткүзүш йолида ишләватимиз, – деди ҖУЭМ тәрипидин һәр саһа бойичә атқурулған ишларға айрим-айрим тохталған мәркәзниң иҗраий мудири Зихруллам Қурванбақиев. Натиқниң сөзини толуқтурған ҖУЭМ рәисиниң орунбасари Ершат Әсмәтов болса, мәркәз тәрипидин әмәлгә ашурулған хәйрихаһлиқ паалийәтләр һәққидә сөз қозғиди. 
– Мениң Уйғур наһийәсигә биринчи қетим қәдәм тәшрип қилишим. Биз бирлиги ярашқан әлдә яшаватимиз. Болупму, қазақ, уйғур хәлиқлири – тили бир, дини бир, қиз берип, қиз елип қудилашқан қериндаш милләтләр. Шуңлашқиму бизниң аримизға соғақчилиқ салғуси келидиғанлар йоқ әмәс. Биз шундақ һарамнийәтлик адәмләрдин еһтият қилишимиз керәк. Асасән яшлиримизға һәрқандақ мәсилидә сәвирлик тонутушни, бирлик бар йәрдә бәрикәт болидиғанлиғини чүшәндүрүшимиз лазим, – деди өз новитидә сөз алған ҖУЭМ рәисиниң орунбасари, ҚХА әзаси Долқунтай Абдухелил хәлиқләр бирлигигә бесимлиқ берип. 
Шәһәрдин кәлгән вәкилләрниң сөзидин кейин жиғин қатнашқучилириниң соал, тәклип-пикирлири тиңшалди. Мәсилән, жигитбеши Марат Һейтбақиев той-төкүндики селиқ мәсилисини көтәрсә, пешқәдәм устаз Сирдаш Йолдашев җәмийитимиздики көңли толмайватқан камчилиқларни атап ейтти. Наһийәлик мәслиһәтниң депутати Әрмидин Тайиров бағчә мәсилисини оттуриға қойди. «Наһийә бойичә оттуз йәттә бағчиниң пәқәт бири уйғур тилида иш елип бариду. «Тәрбийә бөшүктин башлиниду» демәкчи, балилиримизни ана тилимизда тәрбийилимисәк, қандақ қилип анатиллиқ мәктәплиримизгә бала топлаймиз?» дегән ойини очуқ ейтти у. 
Қоюлған соалларға қанаәтлинәрлик җавап қайтурулғандин кейин, жиғин қатнашқучилири биреғиздин ҖУЭМниң икки жиллиқ һесаватиға жуқури баһасини бәрди.
    
***
Рашидәм РӘҺМАНОВА,
«Уйғур авази»

Әмгәкчиқазақ наһийәсиниң Челәк йеза округи аппаратиниң Мәҗлисләр залида болуп өткән жиғинға Челәк йеза округиниң һакими Сәкен Абдихалиев, җумһурийәтлик Уйғур этномәдәнийәт мәркизиниң рәиси, Қазақстан хәлқи Ассамблеяси Кеңишиниң әзаси Шаһимәрдан Нурумов, ҖУЭМ рәисиниң орунбасари, җумһурийәтлик җәмийәтлик-сәясий «Уйғур авази» гезитиниң баш муһәррири,  ҚХА әзаси Ершат Әсмәтов, ҖУЭМниң Алмута шәһәрлик шөбиси рәисиниң орунбасари, ҚХА әзаси Долқунтай Абдухелил, ҖУЭМниң иҗраий мудири Зихруллам Қурванбақиев, ҖУЭМ рәисиниң мәслиһәтчиси Султанмурат Исрапилов вә наһийәниң җәмийәтлик ишлириниң активистлири қатнашти. Жиғинға Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов модераторлиқ қилди.
Сулаймән Шәмшидиноғли жиғинниң мәхситигә тохтилип, дәсләпки сөзни Сәкен Абдихалиевқа бәрди.
– Челәк йеза округида уйғур миллитиниң 13 миңдин ошуқ вәкиллири истиқамәт қилиду. Шуңлашқиму биз җәмийәтлик ишлириниң активистлири билән пат-пат учришип, хәлиқ арисидики проблемиларни биллә йешишни әнъәнигә айландурдуқ. Болупму, бийилқи Мустәқиллигимизниң тәвәллудлуқ жилида нурғунлиған изгү ишларни биллә әмәлгә ашуруп келиватимиз. Сөзүмниң испати ретидә йеқинда «Уйғур авази» гезитиниң муштири топлаш штаби билән өткүзгән учришимизни атап өтүшкә әрзийду. 40қа йеқин адәм қатнашқан жиғинда гезитниң паалийити, милләт һаятидики униң роли, орни вә башқиму мәсилиләр әтрапида орунлуқ пикирләр ейтилди. Мән челәклик уйғурларни башқиму барлиқ милләтләр вәкиллири қатарида алдимиздики чоң сәнәлик мәйрәмләр билән сәмимий тәбрикләп, буниңдин кейинму дәл мошу кәйпият вә мәхсәтлиримиз билән ишимизни давамлаштурушқа чақирған болар едим, – деди һаким өз нутқида.
Новәттики натиқ – Шаһимәрдан Нурумов жиғилған көпчиликни мәркәзниң бюро вә башқарма әзалири намидин Тунҗа Президент күни вә Мустәқиллик күни мәйрәмлири билән алдин-ала тәбрикләп, Елбасы Н.Назарбаевниң дана сәясити түпәйли Қазақстанниң Мустәқиллик жиллири қол йәткүзгән утуқлириға қисқичә тохталди.
– Елимизниң Тунҗа Президенти билән Мустәқилликни бир-бирисиз тәсәввур қилишқа болмайду. Чүнки қисқа 30 жил ичидә Елбасы Н.Назарбаев йеңи дөлитимизниң архитектори вә инженери болупла қалмай, униң асасий қурулушчисиға айлинип, Қазақстанни дунияйүзигә тонутти. Қайси саһани алмаң, барлиқ йәрдә пәқәт илгириләш динамикиси бар. Йеқиндила қанчилигән спортчилиримиз дуния чемпиони атилип, елимиз шәнини һәшләргә көтәрди. Әлдики карантин тәләплиригә риайә қилған һалда, тәркивидики барлиқ шөбилири билән биллә ҖУЭМ бир күнму өз паалийитини тохтатқини йоқ. Шу арқилиқ Қазақстанниң тәрәққиятиға өзиниң салмақлиқ һәссисини қошуп келиватиду, – деди Шаһимәрдан Үсәйиноғли өз сөзидә.
Андин З.Қурванбақиев мәркәзниң икки жиллиқ паалийити һәққидә һесават бәрди. 
ҖУЭМниң 106 башқарма вә 24 бюро әзаси бар. Уларниң тәркивигә барлиқ саһаларда хизмәт қиливатқан җәмийәтлик ишларниң активистлири, миллий мәдәнийитимиз җанкөйәрлири киргән. Мәркәз Қазақстан Җумһурийитиниң қанунлири даирисидә уйғур хәлқиниң мәдәнийитини, маарипини риваҗландуруш, урпи-адәт вә тилини сақлаш, милләтләрара разимәнликни мустәһкәмләш, дөләт тилини үгиниш вә башқиму мәсилиләр бойичә қизғин паалийәт елип бармақта. Ахирқи икки жил ичидә, пандемиягә мунасивәтлик еғир вәзийәткә қаримай, хелила тилға аларлиқ чарә-тәдбирләр уюштурулди. Бүйүк намайәндилиримиз Махмут Қәшқәрий вә Йүсүп Хас Һаҗипниң вә башқиму тонулған қәләм саһиблириниң китаплири нәшир қилинди. Миллий маарипни қоллаш мәхситидә, ҖУЭМ йенида Уйғур мәктәплиригә һәмкарлишиш штаби қурулуп, қизғин паалийәт елип бериватиду.
Иҗраий мудир нутқини ҖУЭМниң уюштуруши билән әмәлгә ашурулған хәйрихаһлиқ паалийәт һәққидә аяқлаштуруп, ушбу саһада сахавәтлик ишлири билән көзгә чүшкән меценат оғланлиримиз билән ханим-қизлиримизниң исимлирини пәхирлиниш билән тилға алди.
Новитидә Әмгәкчиқазақ наһийәлик Уйғур этномәдәнийәт мәркизи рәисиниң орунбасари Нурҗамал Һасанова наһийәлик мәркәзниң икки жил мабайнида атқурған ишлириға тохталди вә ҖУЭМни узун жиллардин бери үнүмлүк башқуруп келиватқан Ш.Нурумовқа миннәтдарлиғини билдүрди. Шундақла жутдашлириниң буниңдин кейинму Вәтинимиз – Мустәқил Қазақстанниң риваҗлиниши йолида вәтәнпәрвәрлик вә милләтпәрвәрлик роһ һәм җанпидалиқ билән ишләшкә тәйяр екәнлигини билдүрди. 
Жиғинни Сәкен Абдихалиев йәкүнләп, хәлқимизгә течлиқ, риваҗлиниш, бирлик, өмлүк вә бәрикәт тилиди.