• Әхбаратлар еқими
• 01 Желтоқсан, 2021

Диний әркинлик саһасидики иҗабий өзгиришләрни тәкитлиди

АҚШниң хәлиқара диний әркинлик бойичә комиссияси Қазақстандики диний әркинлик саһасидики иҗабий өзгиришләрни тәкитлиди, дәп хәвәр қилди йеқинда Қазақстан Җумһурийити Президентиниң мәтбуат кативи Берик Уәли.
“Комиссияниң 2020-жил ичидә дуниядики диний әркинликкә бағлиқ вәзийәт тоғрилиқ жиллиқ докладида иҗабий өзгиришләр вә дөләт рәһбири Қасым-Жомарт Тоқаевниң диний әркинлик саһасидики вәзийәтни яхшилаш бойичә тәшәббуслири әкис етилгән” дәп тәкитлиди Президентниң мәтбуат-кативи.
19-ноябрьда Комиссия рәиси Надин Маенза вә униң орунбасари Нури Туркель Қазақстан Җумһурийитиниң “Визуал әхбарат вә диний паалийәт мәсилилири бойичә Қазақстан Җумһурийитиниң бәзибир қанун һөҗҗәтлиригә өзгиришләрни вә қошумчиларни киргүзүш тоғрилиқ” қанун лайиһисиниң 2021-жилқи өзгиришлиригә рәсмий изаһ әвәтти.
Комиссия намидин йезилған хәттә комиссия рәиси Надин Маенза вә униң орунбасари Нури Туркель динға итаәт қилиш әркинлиги саһасидики ислаһатларға өзгиришсиз әмәл қиливатқанлиғи үчүн мәмликитимиз һөкүмитигә миннәтдарлиқ изһар қилди. Бу диний паалийәтни тәртипкә кәлтүрүш мәсилисигә бағлиқ тәклип қилинған түзитишләр обзорида вә қайта қарашта қайтидин тәстиқләнди.
“Көрүлүватқан ислаһатлар үчүн вақит тәләп қилинидиғанлиғини етирап қилип олтирип, биз күчкә егә қанунға кирмигән мәсилиләрни һәл қилишни қошқанда, силәрниң ислаһатларға өзгиришсиз әмәл қилидиғанлиғиңларға ишинимиз. Тәвсийә қилинған түзитишләр лайиһиси һәқиқий илгириләшни намайиш қилиду, әнди уларни йеқинда қайта қарап чиқиш комиссиямиз, АҚШ һөкүмитидики бизниң шериклиримиз вә гражданлиқ җәмийәт көтәргән мәсилиләрни қарап чиқишта силәрниң һөкүмитиңларниң вижданлиқ күч-ғәйритиниң рәмзидур”, дейилиду хәттә.
Изаһта диний әркинлик бойичә Қазақстан вә АҚШ оттурисидики иш бабидики экспертлар топиниң кәлгүси мәҗлислиридә бирләшкән диалогни давамлаштурушқа интилишниң бар екәнлиги һәққидә ейтилиду.
Буниңдин илгири мәҗлис депутатлири диний саһадики қанунни мукәммәлләштүрүшни көздә тутидиған түзитишләрни мақуллиған. Җүмлидин регионаллиқ диний бирләшмиләрни тиркәштики тәләпләр аддийлаштурулған.