Әхбаратлар еқими
27 Қаңтар, 2022

17 миңға йеқин адәм һәрбий хизмәткә чақиртилиду

Қазақстанда әтиязда 17 миңға йеқин адәмни һәрбий хизмәткә чақиртиш көздә тутулмақта, дәп хәвәр қилиду Мудапиә министрлигиниң мәтбуат-хизмити.
“Йәрлик һәрбий башқарма органлири җумһурийәт қураллиқ күчлиригә, миллий бехәтәрлик комитетиниң чегаричилар хизмитигә, дөләт күзитиш хизмитигә вә Қазақстан Җумһурийитиниң Миллий гвардиясигә һәрбий хизмәткә чақиртишни әмәлгә ашуриду. Бу жили әтиязлиқ һәрбий хизмәткә 17 миң адәм чақиртилиду, уларниң 6,5 миңи қураллиқ күчләрниң қисимлирида вә бөлүнмилиридә һәрбий хизмитини өтәйду”, дейилиду мудапиә министрлиги тарқатқан хәвиридә.
Идаридикиләрниң тәкитлишичә, мудапиә ишлири бойичә департаментларда, башқармиларда вә бөлүмләрдә 2022-жилниң әтиязлиқ һәрбий хизмәткә чақиртиш алдида яшларниң өмүрбаянини тәкшүрүш башланди. Һәрбий хизмәткә 18дин 27 яшқичә болған яшлар чақиртилиду.
“Шәхсий ишларни тәкшүрүштә һәрбий хизмәткә чақиртилидиған яшларниң анкетилиқ мәлуматлири ениқлиниду, һәрбий хизмәткә чақиртилидиған һәрбир шәхс вә униң ата-анилири билән сөһбәт өткүзүлиду”. Һәрбир шәхсни тәкшүрүштә мәҗбурий түрдә униң мутәхәссислиги, шундақла униң әхлақий вә ишбиләрмәнлик хислити, саламәтлиги, бәсти, билими, мәхсус тәйярлиғи вә аиләвий әһвалиға бағлиқ мәлуматлар һесапқа елиниду”, дейилиду хәвәрдә.
Тәкитлинишичә, мәмурий яки җинаий җавапкәрликкә тартилғанларға, тәргәв астида болуватқанларға, қанунсиз җәмийәтлик тәшкилатларға вә әнъәнивий әмәс диний еқимларға әза сүпитидә мәхсус нопуста турғанларға алаһидә диққәт ағдурулиду.
“Яшларниң өмүрбаянини алдин-ала билиш у яки бу әскәр түрлиридә һәрбий хизмитини тегишлик өтишигә тәйяр жигитләрниң сүпәт җәһәттин тәркивини ениқлашқа мүмкинчилик бериду”, дәп тәкитләйду мудапиә министрлиги.
Шундақла һәрбий хизмәттин, шу җүмлидин саламәтлигигә бағлиқ бошитилғанлиғиниң қануний екәнлиги тәкшүрүлиду.
“Һәр күни йәрлик һәрбий башқарма органлириниң һәрбий хизмәткә чақиртиш пунктлириға 800 — 900ға йеқин адәм келип-кетиду. Барлиғи болуп һәрбий хизмәткә чақиртилиш йешида болған 90 миңдин ошуқ адәмниң тәрҗимиһали оқуп үгинилиду”, дәйду Қазақстан Җумһурийити қураллиқ күчлириниң баш штаби тәшкилий-мобилизация ишлири департаменти башлиғиниң орунбасари Аян Еслямов.