• Әхбаратлар еқими
• 27 Қаңтар, 2022

Пухта тәргәв қилиш тапшурулди

Дөләт рәһбири Қасым-Жомарт Тоқаевниң рәислигидә Президент Мәмурийити, Бехәтәрлик кеңиши, Баш прокуратура, Миллий Бехәтәрлик Комитети, мудапиә вә ички ишлар министрликлири рәһбәрлиги билән кеңәшмә өткүзүлди.
 Кеңәшмидә Президентқа мәмликәттики әһвални турақлаштуруш бойичә илгири берилгән тапшурмиларниң орунлиниши тоғрилиқ әхбарат берилди. Мәҗлистә тәкитлинишичә, бехәтәрлик вә һоқуқ-тәртипниң әслигә кәлтүрүлүшигә, гражданларниң қануний һоқуқлириниң тәминлинишигә алаһидә диққәт ағдурулуватиду. 
 Ички ишлар министри Ерлан Турғумбаев Президентқа мәмликәтниң барлиқ регионлирида «Һоқуқ-тәртип» оператив-профилактикилиқ чарә-тәдбирләрниң өткүзүлгәнлиги тоғрилиқ доклад қилди.
 Идариниң мәлуматлири бойичә, терроризм, қатиллиқ, һакимийәт вәкиллиригә мунасивәтлик зорлуқ көрситиш, хулиганлиқ, дөләт органлириниң беналириға һуҗум қилиш вә башқа җинайәтләр бойичә 1 822 җинаий иш қозғилип, уларниң 116 мәхсус прокурорларға өткүзүлди. Ички ишлар министрлигиниң өз бехәтәрлиги департаментида ишәнчә телефонлири ишләватиду. Министрниң сөзигә қариғанда, тутулғанларниң конституциялик һоқуқлириниң бузулушиға йол қоймаслиқ мәхситидә, һоқуқ-қоғдаш тәшкилатлири билән қоюқ өзара һәрикәт йолға қоюлған. 
 Миллий бехәтәрлик комитетиниң рәиси Ермек Сағымбаев террорлуқ ховупни бетәрәпләштүрүш вә келәчәктә уларға йол қоймаслиқ бойичә чариләр тоғрилиқ әхбарат бәрди. 
 Мудапиә министри Руслан Жақсылықов Қураллиқ күчләрниң айрим бөлүнмилириниң ички ишлар органлири билән бирликтә террорлуқ хәтәрликниң «қизил» дәриҗиси моҗут регионларда һоқуқ-тәртипни тәминләш вәзипилирини орунлаватқанлиғи тоғрилиқ доклад қилди. Һәрбий объектлар, җүмлидин қурал-ярақ вә оқ-дора амбарлири күчәйтилгән күзәт астида болуватиду. Мудапиә министрлиги Дөләт рәһбириниң Қураллиқ күчләрни ислаһат қилиш тапшурмилирини әмәлгә ашурушқа киришти.
 Баш прокурор Ғизат Нурдәулетов Президентқа терроризм вә аммивий тәртипсизликләр фактлирини тәргәв қилишниң кетип бериши тоғрилиқ һесават бәрди. У шундақла тутулған вә қамаққа елинған шәхсләрниң һоқуқлирини тәминләш бойичә прокурорлар тәрипидин көрүлүватқан чариләр тоғрилиқ доклад қилди. Ғизат Нурдәулетовниң сөзичә, уларниң һәммисигә һимайә вә әдлийә ярдимини елиш һоқуқи тәминләнмәктә, шикайәтләр пухта тәкшүрүлүватиду. Прокуратура органлириға җәриян қатнашқучилиридин 84 шикайәт чүшти. Назарәт чарилири бойичә тутулған 96 граждан бошитилди.
Назарәт оргининиң рәһбири шундақла Дөләт рәһбириниң еғирлаштуридиған һаләтләр йоқ болса, җазани йениклитиш бойичә тапшурмилирини орунлаш тоғрилиқ һесават бәрди. Кәлтүрүлгән мәлуматлаға мувапиқ, сотлар мәмурий тәртиптә 3 314 адәмни қамаққа алған. Прокурорлар җазани йениклитиш тоғрилиқ 1 884 илтимас бәрди. Уларни қарап чиқиш нәтиҗиси бойичә 1 083 адәм қамақтин бошитилди. 490 граждан җәриман төләшниң орниға агаһландурулди.
 Қасым-Жомарт Тоқаев докладларни тиңшап болғандин кейин йүз бәргән вақиәниң барлиқ тәпсилат-әһваллирини ениқлаш ишлирини давамлаштурушниң зөрүр екәнлиги тоғрилиқ билдүрди.
 Президент һәрбий қурулумлар билән вакаләтлик органларниң әхбарат саһасида күч-қувәтни уйғунлаштуруши вә җәмийәтниң тәләплиригә оператив инкас қилиши керәклигини тәкитлиди. Дөләт рәһбири гражданларниң һалак болуши тоғрилиқ мәсилигә тохтилип, Баш прокуратуриға вә Ички ишлар министрлигигә һәрбир әһвал бойичә пухта тәргәв жүргүзүшни тапшурди.
 – Җәмийәттә ойдурмилар вә қуруқ төһмәт асасида йүз бәргән вақиәләр тоғрилиқ пикирләрниң шәкиллинишигә йол қоюшқа болмайду. Гражданлар һакимийәт орунлириниң очуқлуқ вә қанунийлиқни тәминләватқанлиғини көрүши керәк, – деди Қасым-Жомарт Тоқаев. 
 Президент Мәмурийитиниң рәһбәрлигигә мәзкүр мәсилини назарәткә елиш тапшурулди.