• Җәмийәтлик тәшкилатларда
• 02 Ақпан, 2022

Наһийә хәлқи чәттә қалмиди

Мәшүр САСИҚОВ,
«Уйғур авази»

Январь вақиәси. У пүткүл Қазақстан хәлқини һәләйкүмгә салди. Биз бу айда илгири-кейин дуч кәлмигән келишмәслик, уқушмаслиқ яки қандақту- бир қорқунучлуқ аламәтләрни баштин кәчүрдуқ. Әхбарат васитилиридин әйнә шундақ адәмни чөчүтидиған сәясий «инқилапларни» көрүп-аңлап жүргинимиз болмиса, уларниң бизниң елимиздә йүз бәрмәйдиғанлиғиға ишәнчимиз камил еди. 
Әпсус, уни биз өз көзүмиз билән көрүп, қулиғимиз билән аңлашқа «муйәссәр» болдуқ. Мундақ әһваллардин хәвиримиз йоқ болғачқа, униң  бизгә толиму ғәлити сезилгәнлиги һәқ. Һазир униң ақивити тоғрилиқ сөз қилишниң орни йоқ. Немә үчүн йүз бәрди, кимләр зәрдап чәкти, уни тохтитишқа қандақ күч қоллинилди, уни һәммимиз яхши билимиз. Бүгүн пәқәт әшу қалаймиқанчилиқларни биртәрәп қилишта қазақстанлиқларниң өмлүги вә бир-бирини йолда қоймиғанлиғи тоғрилиқ сөз болмақ. 
Бу җәһәттин елип қариғанда, Президентимиз Қасым-Жомарт Тоқаевниң тутқан сәясий йолини, йәни тактикисини қоллап-қувәтләштә бизниң милләт вәкиллири чәттә қалғини йоқ. Мәсилән, һазирчә ениқ болмиған иғвагәрләрниң қара нийити түпәйли, Қазақстан хәлқиниң теч һәм паравән һаятини бузғанлар билән күрәш нәтиҗисидә җумһурийәт даирисидә комендантлиқ саат елан қилинди. Болупму җәнубий пайтәхткә кирип-чиқидиған чоң-кичиклигидин қәтъий нәзәр, барлиқ йолларға транспорт васитилирини тәкшүрүш мәхситидә мәхсус постлар қоюлди. Уларниң ишлирини бираз болсиму йеникләштүрүш нийитини билдүргән йәрлик аһалидин тәркип тапқан «хәлиқ сақчилири» қурулуп, улар кәчки саат 20:00дин таң сәһәргичә новәтчилик қилди. 
 Әлвәттә, бу ишлардин Талғир наһийәсиниң жут активистлириму чәттә қалғини йоқ. Улар ана жутлирини қарақчилардин қоғдап қелиш үчүн «бир яқидин баш, бир йәңдин қол чиқирип» өзлириниң иҗил-инақлиғини испатлиди. Талғир наһийәлик Уйғур этномәдәнийәт мәркизиниң рәиси Иминҗан Тохтахунов билән «Қоғамдық келісім» җәмийитиниң рәиси Ж.Бутабаеваниң тәшәббуси түпәйли, тәвәдики барлиқ жутларда «хәлиқ сақчилирини» хизмитидин ташқири, аһали бехәтәрлигини күзитиватқан ички ишлар органлириниң хадимлири билән һәрбийләргә әтә-кәчтә иссиқ тамақ йәткүзүш ишлири уюштурулди. Әлвәттә, январь ейиниң җандин өтидиған соғида вақтида кәлгән тамақ уларға мәдәт бәргәнликтин, улар көпчиликкә миннәтдарлиғини билдүрүп һармиди. Мундақ чарә-тәдбир наһийәниң Қизил Ғәйрәт, Гүлдала, Туздыбастав, Бесағаш, Қизил Туғ-1-2 охшаш йезилирида һәр күни дегүдәк өткүзүлди.
Силәр сүрәттә көрүватқан Қизил Туғ-2 йезисиниң активистлири Җөһәргүл Жаканова, Санийәм Дөләтова, Аминәм Сейитова вә Муқәддәс Зайитова рәһбәрлигидики ханим-қизлар шәһәрдә пәвқуладдә әһвал җарий қилинған, йәни шәһәр әтрапидики йезиларға постлар қоюлған күндин етиварән, у йәрдә хизмитини өтәватқан һәрбийләр билән Ички ишлар органлирини иссиқ тамақ билән тәминләп кәлди. Уларниң ушбу сахавәтлик ишидин мәмнун болған йәрлик һакимийәт рәһбәрлири уларға апирин ейтип, мустәһкәм саламәтлик тилиди.