• Асасий мақалилар
• 24 Ақпан, 2022

Новәттин ташқири Мәҗлис

Дөләт рәһбири Қасым-Жомарт Тоқаевниң рәислигидә видеоконференц алақә тәртивидә Қазақстан Җумһурийити Президентиниң йенидики Чәт әл инвесторлири кеңишиниң новәттин ташқири мәҗлиси болуп өтти.
Чарә-тәдбиргә Президент Мәмурийитиниң рәһбәрлиги, Һөкүмәт әзалири, дөләт органлириниң, трансмиллий вә миллий компанияләрниң вәкиллири қатнашти.
Учришиш қатнашқучилири мәмликәтниң инвестициялик мәптункарлиғини яхшилаш бойичә бирқатар тәклипләрни оттуриға қоюп, инсан иқтидарини күчәйтишкә вә ихтисатта һәм инвестициялик сәясәттә экологиялик, иҗтимаий вә корпоративлиқ башқуруш үлгилирини җарий қилишқа алаһидә диққәт ағдурди. 
Дөләт рәһбири чарә-тәдбирни ечип, паҗиәлик «январь вақиәлиригә» диққәтни җәлип қилди вә өз вақтида көрүлгән һәм қәтъий чариләр түпәйли мәмликәттики вәзийәтниң толуқ турақлаштурулғанлиғини тәкитлиди.
Қасым-Жомарт Тоқаев хәлиқара принципларға қәтъий әмәл қилған һалда жүргүзүлүватқан тәргәвниң давамлишиватқанлиғини тәкитлиди. Президент шундақла «январь вақиәлириниң» инвесторлар үчүн мәлум рәвиштә ениқсизлиқ пәйда қилғанлиғини тилға алди.
– Мәмликәт Президенти сүпитидә чәт әл инвесторлири үчүн «очуқ ишикләр» сәяситиниң бизниң стратегиялик әвзәллигимиз болуп қалидиғанлиғиға ишәндүргүм келиду. Дөләт шерикләр вә инвесторлар алдидики мәҗбурийәтләр билән капаләтләрни толуқ дәриҗидә орунлайду. Январь боһрини нәрқ ихтисадиниң тәрәпдари екәнлигимизгә, қанунниң үстүнлүгигә, хәлиқара вә ички мәҗбурийәтләргә әмәл қилишимизға һечқандақ тәсир қилмиди, – деди Қасым-Жомарт Тоқаев.
Дөләт рәһбири мәмликәтни өзгәртиш планлири билән ортақлашти. Президент қанунниң үстүнлүгиниң вә уни һәммисигә охшаш қоллинилишиниң йеңи йолниң асаси болидиғанлиғини билдүрди.
– Буниңдин кейин УИМниң вә дуниявий рейтингтики орунниң өскәнлигини көрситидиған абстракт рәқәмләр әмәс, бәлки хәлқимиз кириминиң һәм турмуш дәриҗисиниң көтирилгәнлиги ихтисадий ислаһатларниң асасий вәзиписи болуп һесаплиниду. Әлвәттә, тиҗарәтчиләрниң йеңи синипини шәкилләндүрмәстин, шундақла жуқури сүпәтлик инвестицияләр җәлип қилинмастин бу мәхсәткә йетиш мүмкин әмәс, – дәп тәкитлиди Қазақстан рәһбири. 
Қасым-Жомарт Тоқаев барлиқ хәлиқара рейтинг агентлиқлириниң мәмликәтниң инвестициялик җәһәттин ишәшлик екәнлигини турақлиқ тәстиқләватқанлиғини тәкитлиди. Униң пикричә, январьдики вақиәләр, паҗиәлик болғанлиғиға қаримай, мәмликәтниң сәясий вә ихтисадий системисиниң пухтилиғини көрсәтти.

– Шуниңға ишинимәнки, барлиқ мәлуматларниң рәсмий елан қилиниши бизниң иш-һәрикәтлиримизниң толуқ асаслиқ болғанлиғини вә пәқәт мәмликәтниң пүтүнлүгини сақлап қелишқа, гражданлиримизниң һаяти һәм мүлкини вә бизнесни һимайә қилишқа қаритилғанлиғини ишәшлик испатлайду. Силәр – Қазақстанда узақ вақит ишләватқан мәмликитимизниң достлири – үчүн бу очуқ көрүнүп туриду. Вақиәләрниң һәқиқий сәвәви вә шу күнләрдики әйни әһвал тоғрилиқ һәқиқәт наһайити муһим, – деди Дөләт рәһбири.
Президент Кеңәш әзалириға мураҗиәт қилип, уларниң тәвсийәлириниң Қазақстанни вә әмәлгә ашурулуватқан ислаһатлар йолини қоллап-қувәтләйдиғанлиғини атап көрсәтти.
Дөләт рәһбири өз сөзидә «Қазақстан халқына» җәмийәтлик иҗтимаий фондиниң қурулушиға йәнә бир қетим тохталди.
– Айрим чәт әл инвесторлирида фондқа бәдәл әвәтишниң мәҗбурий екәнлиги тоғрилиқ соаллар пәйда болуватиду. Бәдәл төләшниң пәқәт ихтиярий екәнлигини тәкитлигүм келиду, – деди Президент.
Қасым-Жомарт Тоқаев иш бабидики учришиш йәкүнини чиқирип, Кеңәшниң мәмликәттә әмәлгә ашурулуватқан ислаһатлар билән бирқатарда өз паалийитиниң яндишишлирини йеңилаш керәклигини атап көрсәтти. 
Дөләт рәһбири шундақла Кеңәшниң новәттики 34-умумий мәҗлисиниң күн тәртивигә тохтилип өтти. Мәҗлис йешил ихтисат вә төвән углеродлуқ технологияләрни җарий қилиш мәсилилиригә беғишлиниду. 
Президент учришиш ахирида чәт әл инвесторлириниң мәмликитимиздики паалийитигә мунасивәтлик бирқатар муһим соаллириға җавап бәрди. 
Чарә-тәдбир давамида шундақла миллий ихтисат министри Әлибек Қуантыров, Азия тәрәққият банки, Европа реконструкция вә тәрәққият банки, Citigroup, EY, ExxonMobil, Chevron, TotalEnergies, Shell, Eni S.p.A., CNPC, Cameco, ArcelorMittal, Gene охшаш чоң хәлиқара малийә вә бизнес-қурулумларниң рәһбәрлири сөзгә чиқти.