• Хәйрихаһлиқ
• 03 Наурыз, 2022

Жутдашларға рәхмәт

Йеқинда Чоң Дехан йезисидики З.Батталханов намидики оттура мәктәптә муәллимләр коллективиниң уюштуруши билән «Мәрданә жүрәк» намлиқ хәйрихаһлиқ акцияси өтти. Униңға жут активистлири, муәллимләр, оқуғучилар қатнашти.
— Хәйрихаһлиқ – инсанийлиқниң бәлгүси, — деди хәйрихаһлиқ акцияни киришмә сөз билән ачқан мәктәп мудири Гүлшат Оңласынова. — Бәш қол бирдәк болмиғинидәк, йезимизда бәзи сәвәпләргә бола, һазир қийин әһвалларда қалған жутдашлиримиз бар, әпсус. Шуларға ярдәм қолини сунуш мәхситидә мошу акцияни уюштуруватимиз. Бүгүн жиғилған мәбләғниң һәммиси әйнә шундақ тәминати начар аилиләргә тапшурулиду. Акциягә йезимиздикиләрдин ташқири һазир башқа йәрләрдә яшаватқан жутдашлиримизму өз ярдәмлирини әвәтти. Пурсәттин пайдилинип, мәзкүр акциягә қатнашқан шәхсләргә өз миннәтдарлиғимни изһар қилмақчимән. 
 Униңдин кейин сөз алған васийлиқ кеңишиниң вәкили Шөһрәт Сабиров, жутниң жигитбеши Муһидин Анайәтов, мәктәп психологи Елеусиз Қуланбаев мәзкүр акцияниң әһмийити һәққидә өз пикирлирини ейтти вә халис ярдәмлирини көрсәтти. Мошу йәрдә хәйрихаһлиқ акцияни өткүзүшкә көп күч чиқарған мәктәп мудириниң тәрбийә ишлири бойичә орунбасари Мадияр Абдурасиловниң әмгигини алаһидә тәкитләп өтүш лазим. У барлиқ тәшкилий ишларни жуқури дәриҗидә уюштурди. 
 Бу күни жиғилған мәбләғ вә мәктәп оқуғучилириға һаҗәт қурал-җабдуқлар ярдәмгә муһтаҗ аилиләргә тапшурулди. 

Илия ҚИЯСОВ, 
иҗтимаий педагог.
 
Уйғур наһийәси.