• Хәйрихаһлиқ
• 13 Сәуір, 2022

Азатҗандин миннәтдармиз

Әмгәкчиқазақ наһийәси Маливай йезисида ишбиләрмән жигитләр көп. Шуларниң бири – Азатҗан Исрайилов. Униң хошна Байсейит йезисидики «Аспаз» ләңмәнханисини иҗаригә елип, ишләватқиниға анчә узақ вақит болғини йоқ. Лекин өзиниң тәдбирчанлиғи вә тиришчанлиғи түпәйли оңайла ишниң епини еливалди вә ләззәтлик таамларни тәйярлап, көпчиликниң көңлидин чиқиватиду.
Азатҗан Валидиноғли хәйрихаһлиқ ишлиридинму хали әмәс. Бу қетим сехи һәм мәрданә жигит рәпиқиси Маһирәм Ахмоллаева билән Маливай оттура мәктивидики көпбалилиқ аилиләрниң, өйдә оқуйдиған, житим вә йерим житим 30 бала үчүн хәйрихаһлиқ акция өткүзүп, дәстихан яйди. Чарә-тәдбиргә сәнъәткарларни җәлип қилип, концертлиқ программа уюштурди. Балиларниң көңлини елип, кәйпиятини көтәрди. Һәрқайсисиға соғилар таритип, уларниң өйлиригә хошал-хорам қайтиши үчүн зәмин яратти. Улуқ Рамзан ейида сахавәтлик көрситип, алийҗанаплиқ қилди. 
Пурсәнттин пайдилинип, мошундақ алиқини кәң, мәрт-мәрданә  жутдашлиримизға чәксиз миннәтдарлиғимизни билдүримиз.

Шерингүл АЗНАҚУЛИЕВА,  
Маливай оттура мәктивиниң башланғуч синип муәллими.

Әмгәкчиқазақ наһийәси.