• Асасий мақалилар
• 21 Сәуір, 2022

Қазақстан дәсләпки үчлүктә

Пандемия башлинишидин тартип өткән әң чоң дуниявий вақиәләрниң бири – EXPO – 2020 Дуниявий көргәзмиси аяқлашти.
2021-жилниң 1-октябридин тартип 2022-жилниң 31-мартиғичә “Әқилни бирләштүрүп, келәчәкни вуҗутқа кәлтүримиз” мавзусида өткән EXPO-2020 Dubai көргәзмиси Йеқин Шәриқтики дәсләпки EXPO болди.
Дубай көргәзмисигә дунияниң 192 мәмликити вә 30 хәлиқара тәшкилат қатнишип, уни 24 миллиондин ошуқ адәм зиярәт қилди.
Тәшкилий комитет мәлуматлириға асаслансақ, Қазақстан павильони әң аммибап он павильон қатариға кирип, уни 1,6 миллиондин ошуқ адәм вә миңдин ошуқ рәсмий делегация зиярәт қилди.
Бирләшкән Әрәп Әмирликлири АҚШ вә Хитай павильонлири билән бирқатарда бизниң павильонниму зиярәт қилған БӘӘ премьер-министри Муһәммәд ибн Рашид әл-Мактум вә Дубайниң Мирасхор шаһзадиси Хамдан Муһәммәд әл-Мактум униң биринчи меһманлиридин болди. 
 Мәмликәт Президенти Қасым-Жомарт Тоқаевниң Қазақстан Җумһурийитиниң EXPO-2020 Dubai Дуниявий көргәзмисигә әң жуқури дәриҗидә қатнишишни тәминләш тапшурмиси толуқ орунланди. Мәсилән, Хәлиқара көргәзмиләр бюроси Қазақстан павильониға “Мавзуни ечиш” баш номинацияси бойичә иккинчи орунни бәрди. Биринчи орунни Германия, үчинчи орунни Италия егилиди. Қазақстан көргәзмигә қатнишиштин ихтисадий пайда елипла қоймай, шуниң билән биллә хәлиқара мәйдандики абройини техиму ашурди. Җумһурийәт өзини бизнесни, илим-пәнни вә туризмни тәрәққий әткүзүш үчүн чоң имканийәт һәм иқтидарға егә мәмликәт сүпитидә көрсәтти.
Униңдин ташқири мәмликитимиз зиярәт қилғучиларниң очуқ аваз беришиниң йәкүнигә асасланған Америкиниң Exhibitor Magazine журналиниң тәхмини бойичә “Әң яхши тонуштуруш” номинациясидә биринчи, “Әң яхши павильон” номинациясидә үчинчи орунни егилиди.
Мәмликәт регионлириму инвестицияләрни җәлип қилиш бойичә ишқа паал қатнашти. “Kazakh Tourism” Миллий компанияси “Туризм күнлирини” уюштурди, “ЦРТП “QazTrade” акционерлиқ җәмийити мәмликәтниң экспорт иқтидарини тонуштурди. Шуни тәкитләш керәкки, БӘӘ базири Қазақстан экспортерлири үчүн ечиватқан озуқ-түлүк, йеза егилиги вә һалал мәһсулатиниң сертификатини етирап қилиш тоғрилиқ келишим түзүлди. 
Қазақстанниң EXPO – 2020 көргәзмисидики Миллий күнлири даирисидә БӘӘ энергетика вә инфрақурулум министри Сухейль әл-Мазруи вә БӘӘ дөләт кативи Ахмед Али әл-Саехниң қатнишиши билән Сода-инвестициялик форум болуп өтти.
Алтә ай давамида павильонда мәмликәт ихтисадиниң түрлүк саһалири, җүмлидин инвестициялик, туристик, санаәт, транспорт-логистика вә аграр иқтидари, шундақла тарихий вә мәдәний мираси кәң тонуштурулди.
EXPO-2020 илим-пән, билим, мәдәнийәт вә сәньәт саһасида тәҗрибә алмаштуруш үчүн надир мәйдан болди. Бизниң алимлиримиз билән алий оқуш орунлиримизниң вәкиллири билим бериш саһасида сүнъий әқилни җарий қилишниң актуал мәсилилирини муһакимә қилди, шундақла инновациялик вә билим стартап-лайиһилирини тонуштурди. 
Қазақстанниң Йәр сәйярисиниң обризи болған “Дуния хәритиси” арт-лайиһиси Гиннессниң Рекордлар китавиға киргүзүлди.
Павильонниң мәдәний программиси даирисидә Айман Мусақожаева, Майра Мухамедқизи, Мария Мудряк охшаш хәлиқ вә хизмәт көрсәткән артистлар, Динзухра Тилендиева рәһбәрлигидики Н.Тилендиев намидики “Отрар сазы” фольклор-этнографиялик оркестри, Димаш Қудайберген вә башқа сәнъәт юлтузлири өз һүнәрлирини намайиш қилди. 
Болупму миллий таамлар ресторани көргәзмини зиярәт қилғучилар арисида алаһидә аммибаплиққа егә болди. Миллий музыкилиқ коллективлар очуқ мәйданда уюштурған концертлар тәкрарланмас кәйпият һәдийә қилди.
QazExpoCongress Миллий компанияси вә EXPO – 2020 Dubai тәшкилий комитети оттурисидики келишим даирисидә мәмликитимизниң EXPO – 2017 Astana объектлирини көргәзмидин кейин пайдилиниш тәҗрибиси намайиш қилинди. Мәлумки, Астана көргәзмисиниң объектлири йеңи экосистемиға өзгәртилип, өзини-өзи ақлашқа башлиди. EXPO – 2020 Dubai уюштурғучилири алдидиму көргәзминиң District 2020 мәркизиниң территориясини өзгәртиш вәзиписи туриду. Әйнә шуниңға бағлиқ тәшкилий комитет бирқатар мәмликәтләргә, шу җүмлидин Қазақстанға өз павильонлирини сақлап қелишни тәклип қилди. Сәүдия Әрәпстани, Һиндстан, Австрия, Люксембург вә бирқатар башқа мәмликәтләр шундақ қарар қобул қилди. 
Қисқиси, Қазақстан буниңдин кейин павильонни мәмликәтниң Йеқин Шәриқтики экспорт-инвестициялик потенциалини илгирилитиш үчүн пайдилинишни нийәт қиливатиду.