• Улуқ Ғалибийәткә – 77 жил
  • 04 Мамыр, 2022

Яшлар һәрбий хизмәттин немишкә қачиду?

Дөләт рәһбири Қасым-Жомарт Тоқаев январь ейида болуп өткән Парламент Мәҗлисидә яшларни һәрбий борчини өтәшкә қандақ инталандурушқа болидиғанлиғини җәмийәт болуп ойлаштуруш керәклигини ейтти.

Шәмшидин АЮПОВ, 
«Уйғур авази»

 — Һәрбий билетқа егә болуштин яшлар пәхирләнмәйду вә Вәтәнгә хизмәт қилишниң бәлгүси һесапланмайдиған болди, — деди Президент. —Һәрбий борчини өтәш, һоқуқ қоғдаш саһасида ишләш – алаһидә миссия. Бу –Вәтән үчүн җенини қурван қилишқа бәл бағлиған гражданларниң әқил-парасити билән таллиши. Яшлиримизни һәрбий борчини өтәшкә қандақ инталандурушқа болидиғанлиғини биз җәмийәт болуп ойлаштурушимиз керәк.
Сир әмәски, нәрқ дәври дәймизму, бәзән йеңи әсирниң йеңичә йөнилишлирини алға сүрүп, яшларниң һәрбий борчини өтәштин баш тартидиғини пат-пат байқилиду. Чүнки һазирқи яшларниң бесим көпчилиги һәрбий хизмәткә беришни «пәқәт вақит өткүзүш» дәп һесаплайду.
— Яшлар армиягә бериштин қачиду, барғуси кәлмәйду. Мәнму әйнә шундақ яшларниң бири, — дәйду Әзиз исимлиқ шәһәрлик жигит мошу мәсилигә мунасивәтлик өз ой-пикри билән ортақлашқач. — Чүнки бир жил вақтим бошқа кетидиғандәк. Һәрбий билет, бәлким, дөләт хизмәтчилиригә яки һоқуқ қоғдаш саһасида ишлигүси келидиғанларға керәкту, шәхсән мениң ишимға униң һаҗитиму йоқ.
Тоғра, мустәқил дөләт болғандин кейин, чегаримизни кечә-күндүз күзитидиған, ички тиничлиқни сақлайдиған, дөләтниң бехәтәрлигини тәминләйдиған һәрбий хизмәтчилиримизгә йетәрлик дәриҗидә көңүл бөлүшимиз һәм һаҗәт болған барлиқ шараитни яритишимиз лазим. Ваһаләнки, йошуридиғини йоқ, мустәқилликниң дәсләпки жиллири елимизниң һулиниң пүтүнлүги билән хәлқимизниң тиничлиғини һимайә қилип, кечә-күндүз сәптә турушқа тәйяр һәрбий хизмәтчилиримизгә йетәрлик дәриҗидә иҗтимаий йеникчиликләр қараштуралмидуқ. Қазақстан мустәқилликкә еришкинигә техи 30 жил болди. Һазир елимиз қәддини руслиди, әһвал қисмән болсиму яхшиланди. Шундақ екән, мошу йәрдә «Немишкә һәрбий хизмәтчиләргә һәрхил имтиязларни қараштурушқа болмайду?», дегән соалниң өзлүгидин пәйда болидиғини тәбиий. Әгәр биз яшлиримизниң Вәтәнни қоғдаш йолидики әмгигини баһалайдиғинимизни көрситәлисәк, яшларниң «һәрбий хизмәткә тәйяр!», дегән ихласини ашуралайдиған болимиз. Раст, Президент өз сөзидә Миллий гвардияниң мәхсус мәхсәттики бөлүмчилириниң санини көпәйтиш, уларниң һәрбий тәйярлиқ дәриҗисини көтириш, мәхсус транспорт васитилири билән тәминләш вә мәхсус бөлүмчиләр хадимлириниң айлиқ маашини көтириш бойичә бирқатар тапшурмиларни бәрди. Бу, әлвәттә, яхшилиқниң нишани.
Дәрвәқә, илгири әл арисида һәрбий вәтәнпәрвәрлик күчлүк болидиған. Бала вақтимизда кочида һәрбий кийим кийгән кишини көрсәк, бөләкчә һәвәслинәттуқ. Һәтта, акилиримиз һәрбий борчини өтәп өйигә кәлгәндә, шу кочиниң һәммә яшлири дегидәк униң йенидин чиқматтуқ. Формисиға қизиқип, гәп-сөзлирини һәвәс билән тиңшаттуқ. Мана, һәрбийләргә дегән һөрмәтни шу дәвирләрдә йезиниң бәңваш балисиғичә яхши чүшинәтти. Һә, һазир яш җәңчиниң һәрбий хизмәткә қачан берип-кәлгининиму билмәйсән. Һазир уларға беғишланған имтиязларни йоқ десиму болиду. Йошуридиғини йоқ, һазир яш әвлатниң һәрбий хизмәткә болған қизиқиши тамамән суслишип кәтти. Һәрбий хизмәттин қачқан яш җәңчиләрниң «Мән у йәрдә хизмәт қилғум кәлмәйду» дәп журналистларға очуқ сөһбәт бериватқининиму пат-пат аңлаймиз. Мошу бир көрүнүштинла бизниң армиядики әһвалниң қандақ екәнлигини билгили болиду 
Қазақстан Җумһурийити Миллий гвардияси һәрбий кеңишиниң кативи, полковник Сәвирдин Имиров «Уйғур авази» гезитиниң мухбири Йолдаш Молотовқа бәргән сөһбитидә (20-январь, 2022-жил) мошу мәсилигә мунасивәтлик мундақ дәйду: «Яшлар арисида һәрбий хизмәткә болған һөрмәтни ашуруш үчүн яшларни маддий җәһәттин рәғбәтләндүрүшни илгири сүрүш лазим дәп ойлаймән. Гражданлиқ борч, конституциялик вәзипә —буниң һәммиси чүшинишлик. Бирақ маддий җәлипкарлиқ, иҗтимаий пакет, ениқ малийәвий қоллап-қувәтләш болғанда, жигитләр һәрбий борчини өтәшкә һәвәс бағлап, аилисиниң вә Вәтининиң течлиғи үчүн җанпидалиқ билән хизмәт қилидиғини ениқ».
 Әгәр, һәқиқәтәнму, илгәркидәк һәрбий хизмәтчиләргә йетәрлик дәриҗидә имтиязлар қараштурулидиған болса, бу Вәтәнни һимайә қилиш алдидики һәрбийләрни рәғбәтләндүрүш яки инталандуруш әмәс, әлниң, җүмлидин яш әвлатниң һәрбий хизмәткә дегән қизиқишини ойғитишқа иҗабий тәсирини йәткүзидиғини шүбһисиз. Шуңлашқа һәрбий хизмәтниң қәдир-қиммитини, аброй-инавитини көтириш үчүн яшларни маддий җәһәттин рәғбәтләндүрүшни илгири сүрүшни қараштурушимиз тегиш.

Җәмләп ейтқанда, Вәтән алдидики пәризни өтәш һәрбир әзимәтниң борчи екәнлигини әсла ядимиздин чиқармайли. Билсәк һәм чүшәнсәк, һәрбий хизмәт — яш әвлатниң ирадисини мустәһкәмләйдиған, бәрдашлиқ, төзүмлүк хисләтлирини шәкилләндүридиған һаят мәктиви.
 

182 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы