• Әхбаратлар еқими
• 19 Мамыр, 2022

Һәмкарлиқни кәңәйтиш мәсилилири муһакимә қилинди

Қазақстан Премьер-министри Әлихан Смайылов видео-конференц-алақә тәртивидә Өзбәкстан Премьер-министри Абдулла Арипов билән музакириләрни өткүзди.
Һөкүмәт рәһбәрлири кәңәйтилгән тәркиптә сода-ихтисадий һәмкарлиқни техиму кәңәйтиш йоллирини, санаәт, транспорт, йеза егилиги вә билим бериш саһалирида бирләшкән лайиһиләрни әмәлгә ашурушниң кетип беришини, шундақла су-энергетика саһасида өзара һәрикәт қилиш мәсилилирини муһакимә қилди. 
­– Өзбәкстан биз үчүн – қериндаш хошна дөләт, вақит синиғидин өткән дост вә узақ муддәтлик стратегиялик шерик. Дөләт рәһбәрлири тәрипидин қоюлған ваәзипиләрни толуқ дәриҗидә әмәлгә ашуруш вә Қазақстан-Өзбәкстан һәмкарлиғини сүпәт җәһәттин йеңи дәриҗигә елип чиқиш бизниң асасий мәхситимиз болуп һесаплиниду, – деди Әлихан Смайылов.
Қазақстан Премьер-министри шундақла Җамбул вилайитидә орун алған йол-транспорт һалакити ақивитидә қаза болған Өзбәкстан гражданлириниң уруқ-туққанлири билән йеқинлириға тәзийә билдүрди.
Өз тәрипидин Абдулла Арипов қазақстанлиқ кәсипдашлириға зәрдап чәккәнләргә оператив ярдәм қилғанлиғи вә зөрүр болған барлиқ тәшкилий чариләрни әмәлгә ашурғанлиғи үчүн тәшәккүр изһар қилди. 
Музакириләр вақтида 2021-жилда мәмликәтләр оттурисидики содиниң 33 пайиз, йәни 4,3 миллиард доллар өскәнлиги тәкитләнди. 2022-жилниң биринчи квартали бойичиму иҗабий көрсәткүч байқалди – товар обороти бир миллиард доллардин ешип кәтти. Бу, өткән жилниң мошу вақти билән селиштурғанда, 27,2 пайиз жуқури. 
Йеқинқи бәш жилда иккитәрәплимә товар оборотини 10 миллиард долларғичә йәткүзүш үчүн 41 чаридин ибарәт Әмәлий иш-һәрикәт плани қобул қилинди. 
Бу йөнилиштә тәрәпләр өзара содидики тосалғуларни елип ташлаш ишини җанландурушниң вә йеңи тосалғуларниң пәйда болушиға йол қоймаслиқниң зөрүр екәнлигини тәкитлиди. Қазақстан тәрәп тегишлик Йол хәритисини тәйярлаватиду, мәзкүр һөҗҗәт моҗут мәсилиләрни биртәрәп қилиш үчүн ениқ ишларни жүргүзүш имканийитини бериду.
Санаәт кооперациясидиму иҗабий тенденция байқалмақта, униңда һазир умумий баһаси тәхминән бир миллиард 786 миллион доллар болған чоң тоққуз бирләшкән лайиһә әмәлгә ашурулуватиду.
– Өзбәкстан компаниялири билән һәмкарлишишқа мәнпийәтдармиз, –деди Әлихан Смайылов. 
Йеза егилиги саһасидики һәмкарлиқ тоғрилиқ Қазақстан компаниялириниң Өзбәкстанға сүт-гөш, белиқ вә белиқ мәһсулатлирини йәткүзүшкә мәнпийәтдар екәнлиги тәкитләнди. Илгири Өзбәкстан тәрәпкә Қазақстанниң 113 компаниясини мәмликәт территориясигә йеза егилиги мәһсулатини елип кириш һоқуқиға егә компанияләр тизимиға киргүзүш бойичә зөрүр материаллар әвәтилгән еди. 
Һөкүмәт рәһбәрлири шундақла икки мәмликәтниң алий оқуш орунлири оттурисида шерикликни йолға қоюш мәсилисини муһакимә қилди. Өзбәкстан гражданлириниң Қазақстан билим бериш системисиға турақлиқ қизиқиватқанлиғи һесапқа елинип, Ташкәнттә әл-Фараби намидики ҚазМУниң, Л.Н. Гумилев намидики ЕМУниң вә М.Әвезов намидики Җәнубий Қазақстан университетиниң шөбилирини ечиш мәсилиси қариливатиду.
Су-энергетика саһасидики өзара һәрикәт музакириләрниң йәнә бир мавзуси болди. Йеқинқи вақитта суғириш вақтида «Бахчи Точик» су амбириниң иш тәртиви бойичә үчтәрәплимә келишимниң қолға кәлтүрүлүши күтүлмәктә. 
Қазақстан вә Өзбәкстан Премьер-министрлири муһакимә йәкүнини чиқирип, иккитәрәплимә һәмкарлиқни бирлишип техиму күчәйтиш үчүн бәлгүләнгән барлиқ лайиһиләрни әмәлгә ашуруш ишини давамлаштурушқа тәйяр екәнлигини тәстиқлиди.