• Асасий мақалилар
• 19 Мамыр, 2022

КБШТ кеңишиниң юбилейлиқ саммитиға қатнашти

Қазақстан Президенти Қасым-Жомарт Тоқаев КБШТқа қатнашқучи дөләтләр Коллективлиқ бехәтәрлик кеңишиниң юбилейлиқ сессиясигә қатнашти.
 Коллективлиқ бехәтәрлик тоғрилиқ шәртнаминиң имзаланғиниға 30 жил вә Тәшкилатниң қурулғиниға 20 жил толушиға беғишланған юбилейлиқ саммитқа шундақла Әрмәнстан Премьер-министри Никол Пашинян, Беларусь, Қирғизстан, Россия, Таҗикстан Президентлири – Александр Лукашенко, Садыр Жапаров, Владимир Путин, Эмомали Рахмон вә КБШТ Баш кативи Станислав Зась қатнашти. 
 Қасым-Жомарт Тоқаев учришиш қатнашқучилириға илтипат билдүрүп, Владимир Путинға юбилейлиқ сессияни уюштурғанлиғи үчүн миннәтдарлиқ изһар қилди. 
 Қазақстан Президенти КБШТниң 30 жиллиқ вақит ичидә буниңдин кейинки тәрәққият үчүн җиддий иқтидарға егә көптәрәплимә һәмкарлиқниң әмәлий механизми сүпитидә шәкилләнгәнлигини тәкитлиди. 
 Қасым-Жомарт Тоқаев течлиқ вә турақлиқлиқни, хәлиқара вә регионлуқ бехәтәрликни күчәйтишниң, әза-дөләтләрниң территориялик пүтүнлүгини вә суверенитетини қоғдашниң КБШТниң асасий вәзипилиридин екәнлигини атап көрсәтти. У КБШТниң турақлиқ иш органлириниң утуқлуқ ишлишини, қоюқ һәмкарлиқниң түрлүк шәкиллирини, шундақла һәрбий, һоқуқ қоғдаш вә течлиқпәрвәрлик иқтидарини күчәйтишни тилға алди. 
 Дөләт рәһбириниң докладида хәлиқара терроризм вә экстремизмға, Авғанстандики вәзийәтни көздә тутқан һалда наркотик вә қурал-ярақниң қанунсиз оборотиға, қанунсиз миграциягә алаһидә диққәт ағдурулди.
 – Мошу мәмликәттики вәзийәт, шундақла Авғанстан территориясидә қураллиқ топлар активлиғиниң пәсәймәйватқанлиғи илгәркидәкла бизниң дөләтләрниң бехәтәрлик вә турақлиқлиғиға ховуп туғдуруватиду. КБШТ барлиқ моҗут ховупларни һесапқа елиши вә Мәркизий Азияниң җәнубий чегарилириниң бехәтәрлигини тәминләшкә техиму көпирәк диққәт бөлүши керәк, дәп һесаплаймән, – деди Қасым-Жомарт Тоқаев.
 Қазақстан Президенти КБШТ течлиқпәрвәр күчлириниң ихтидарини күчәйтишни йәнә бир муһим вәзипә дәп атиди. 
 – Бизчә болғанда, һазир КБШТни БДТниң течлиқпәрвәрлик паалийитигә қошуш тоғрилиқ вәзипини қоюш керәк. Мундақ қәдәм КБШТниң һоқуқ мунасивәтлири субъекти болушини күчәйтиду, Тәшкилатниң течлиқни сақлаш бойичә хәлиқара операцияләргә қатнишиш әмәлиятини тәминләйду, – дәп тәкитлиди Қасым-Жомарт Тоқаев. 
Учришиш йәкүни бойичә КБШТқа қатнашқучи дөләтләрниң рәһбәрлири Коллективлиқ бехәтәрлик кеңишиниң юбилейлиқ билдүрүшини қобул қилип, бирқатар һөҗҗәтләрни имзалиди. Андин кейин саммит қатнашқучилири әркин-вәзмин шараитта сөһбитини давамлаштурди.

        *** 
Қасым-Жомарт Тоқаев саммит даирисидә Россия Президенти Владимир Путин билән учрашти. Дөләт рәһбәрлири бирқатар муһим иккитәрәплимә һәмкарлиқ мәсилилирини муһакимә қилди.