• Хәйрихаһлиқ
• 16 Маусым, 2022

«Тиҗарәтчи ана»

Өткән һәптидә «Туран» университетиниң һозурида тиҗарәт билән шуғуллиниватқан аялларни қоллап-қувәтләш бойичә «Кәсіпкер ана» («Тиҗарәтчи ана») хәйрихаһлиқ оқутуш программисиниң йәкүнләш басқучи болуп өтти. Униң асасий мәхсити — елимиз ихтисадини тәрәққий әткүзүш үчүн аялларниң салаһийитини ашуруш, уларни тиҗарәт билән шуғуллинишқа инталандуруш вә өз ишиға мунасивәтлик пәйда болидиған тосалғулуқларни йеңишкә ярдәмлишиш.

Шәмшидин АЮПОВ, 
«Уйғур авази»

 Amway хәйрихаһлиқ фонди «Атамекен» Миллий тиҗарәтчиләр палатиси вә Қазақстанниң аиләвий тиҗарәт бирләшмиси, Ишбиләрмән аяллар кеңиши вә Қазақстан тиҗарәтчилири форуми билән һәмкарлиқта уюштурулған мәзкүр лайиһигә пәқәт көпбалилиқ вә беқивалғучилар, шундақла нака балиларниң анилири қатнашти. Һәрбир ана өзиниң бизнес-идеялирини тәвсийә қилди вә уларни әтраплиқ тәрипләп беришкә тиришти. Тәвсийә қилинған идеяләрниң бесим көпчилиги тикинчилик вә тамақ мәһсулатлири, ата-ана тәрбийиси вә қошумчә билим бериш, клининг вә дизайн саһасидики лайиһиләрни тәшкил қилди.
Финалға келәчиги зор бизнес-лайиһиләр чиқти. Уларниң ичидә өй тоқумичилиғини тәйярлаш ательеси, кигиз буюмлирини ишләп чиқиш, пайдилиқ қәндәләт мәһсулатлирини ишләпчиқириш кәби лайиһиләр таллавелинди.
Бизнес-лайиһиләр байқишида биринчи орунни мевә чипслирини ишләпчиқириш бойичә «Есо.4.u» лайиһиси билән Сәуле Шаламбаева егилиди. У өз ишини тәрәққий әткүзүшкә Amway фондидин 500 000 тәңгә миқдарида грант алди.