• Әхбаратлар еқими
  • 22 Маусым, 2022

«...Сәнъәткар болсаң, тәлпүнгин!»

Дүшәнбә күни миллий мәдәнийитимизниң җанкөйәрлири Илһамия Ниязова билән Пәридәм Һосманованиң уюштуруши вә җумһурийәтлик Уйғур этномәдәнийәт мәркизиниң қоллап-қувәтлиши билән Әмгәкчиқазақ наһийәсиниң Ават йезисидики Мәдәнийәт өйидә Балилар жилиға беғишланған «Өнерпаз болсаң, арқалан!» — «Сәнъәткар болсаң, тәлпүнгин!» мавзусида конкурс-фестиваль болуп өтти. Униңға Уйғур, Панфилов, Әмгәкчиқазақ наһийәлиридики оттура мәктәпләрниң уйғур вә қазақ синиплирида билим еливатқан 159 оқуғучи қатнашти.

Шәмшидин АЮПОВ, 
«Уйғур авази»

Мәлумки, елимиз Президенти Қасым-Жомарт Тоқаевниң тәшәббуси билән бу жили «Балилар жили» дәп елан қилинди. Мана мошу муһим сәнә даирисидә оқутуш уйғур тилида жүргүзүлидиған мәктәпләрдә көплигән тилға аларлиқ мәдәний чарә-тәдбирләр уюштурулуп, келәчәк егилири һесапланған балиларни шатлиққа бөлимәктә. Мошу жилниң апрель ейида милләтпәрвәр ханим-қизлар Илһамия Ниязова билән Пәридәм Һосманованиң беваситә күч чиқириши билән «Долан» уссул ансамблиниң рәһбири Бәхтияр Имран вә тонулған нахшичи Феруза Җалалова Панфилов наһийәсиниң Яркәнт шәһиридә, Уйғур наһийәсиниң Чонҗа вә Әмгәкчиқазақ наһийәсиниң Челәк йезилирида болуп, сәнъәткә иштияқ бағлиған оқуғучилар арисида кастинг өткүзүп, 6 — 18 яш арилиғидики 159 оқуғучини таллавалған еди. Әнди бүгүнки йәкүнлигүчи конкурс-фестивальға әйнә шу таллавелинған яш талант егилири иштрак қилип, өз һүнәрлирини намайиш қилди. 
Риясәтчи – Әмгәкчиқазақ наһийәси Өмәр Муһәммәдий намидики Ават оттура мәктивиниң муәллими Сәнәм Имрәмзиева мәзкүр чарә-тәдбирниң қаидилирини елан қилип, адил қазилар әзалири тонуштурулғандин кейин, яш талантлар «Вокал», «Уссул», «Миллий саз» вә «Монолог» номинациялири бойичә өзара мусабиқигә чүшти. Мусабиқә җәриянида яш талант егилири тәрипидин һәрхил әвришим уссуллар орунлинип, йеқимлиқ нахшилар яңриди. Тамашибинлар биридин бири өткән зил авазлиқ нахшичилар билән маһир уссулчиларниң талантиға апирин әйлисә, ләпәр орунлиған И.Бәхтия намидики 3-Чонҗа уйғур оттура мәктивиниң оқуғучилири Зарина Һапизова билән Ислам Шавдуновниң, Байсейит йезиси И.Тайиров намидики оттура мәктивиниң оқуғучилири Сәрдар Мәсимҗанов билән Ирадә Әхмәтованиң иҗрачилиқ маһаритиниму давамлиқ алқишлар билән баһалиди. «Хуш нава», «Сәбда» миллий чалғу-әсваплар ансамбльлири тәрипидин иҗра қилинған «Әмгәк шатлиғи», «Хошаллиқ» сазлиридин, «Қәшқәр», «Ясмин», «Дилназ» ансамбльлириниң иҗрасидики миллий уссуллиридин бәһримән болди.     
Конкурс-фестивальға қатнашқан уссулчи қизлар билән оғулларниң һәрбир уссулға маслаштурулуп тикилгән миллий кийимлириму көпчиликни қайил қилди. Қисқиси, 18 мәктәптин кәлгән талантлиқ қиз-жигитләр бу күни көпчиликни шатлиққа бөлиди. 
Әлвәттә, бу хошаллиқ дәмләр мошундақ яш талант егилириниң өз һүнәрлирини намайиш қилишиға зәмин яритип, уларға баш-пана болған Илһамия Ниязова, Пәридәм Һосманова вә башқиму сәнъәтсөйәр инсанларниң изчил әмгигиниң нәтиҗиси десәк, мубалиғә болмас.
Мана, көпчилик тақәтсизлик билән күткән, йәни «йүздин — жүгрүк, миңдин — тулпар» ениқлинидиған һаяҗанлиқ пәйт келип, униң йәкүни елан қилинди вә өз кәспиниң маһирлири аталған адил қазилар — П. Чайковский намидики Алмута музыка колледжиниң оқутқучиси Сабирҗан Манашев, «Уссулчи ғунчилар» вә «Таҗиниса» миллий уссул ансамблиниң бәдиий рәһбири вә баш балетмейстри, хәлиқара конкурсларниң лауреати Гүлбаһар Қасимова-Ибрагимова вә тонулған композитор Мехруллам Сетәковниң қарари билән топтин озғанларниң исим-шәрипи атилип, ғалиплар Пәхрий ярлиқ вә хатирә соғилар билән тәғдирләнди. Шундақ қилип, «Миллий саз» номинацияси бойичә дутар билән «Сидр» сазини иҗра қилған Абдуллам Сақашев (Яркәнт шәһири, Х.Һәмраев намидики уйғур оттура мәктиви), «Хуш нава» ансамбли (Әмгәкчиқазақ наһийәси, Маливай оттура мәктиви) 1-орунға сазавәр болса, «Сәбда» (И.Бәхтия намидики 3-Чонҗа уйғур оттура мәктиви) вә «Айжан қыз» хәлиқ күйини орунлиған домбричилар топи (Маливай оттура мәктиви) 2-орунни егилиди. Әнди 3-орун гитара, равап вә дутар билән «Попурри» сазини орунлиған Қурванҗан Рашидиновниң (Уйғур наһийәси, Долата оттура мәктиви) әнчисигә тәгди. «Вокал» номинацияси бойичә 1-орунни Рәхим Амутов (И.Бәхтия намидики 3-Чонҗа уйғур оттура мәктиви) егилисә, 2-орунға Камиләм Хаңзатова (Әмгәкчиқазақ наһийәси, Раһат оттура мәктиви), 3-орунға Амина Савайдинова (Яркәнт шәһири, Б.Назим намидики уйғур оттура мәктиви) сазавәр болди.
«Уссул» номинацияси бойичә — йәккә уссули билән қазиларни қайил қилған уссулчи қизлар Азиза Набиуллаева (Яркәнт шәһири, Х.Һәмраев намидики уйғур оттура мәктиви) 1-орунни, Линара Мәһәмәтова (И.Бәхтия намидики 3-Чонҗа уйғур оттура мәктиви) 2-орунни, Сабина Һасанова (Байсейит йезиси, И.Тайиров намидики оттура мәктәп) 3-орунни егилиди. Әнди уссулчи жигитләрдин Азим Алимҗанов (Алтөй йезиси, Ә.Қастеев намидики оттура мәктәп) 1-орунға сазавәр болса, 2-орун Султан Хоҗашевниң (Яркән шәһири, Х.Һәмраев намидики уйғур оттура мәктиви) әнчисигә тәгди. «Дилназ» ансамбли (Тәшкәнсаз йезиси, Һ.Абдуллин намидики оттура мәктәп) 1-орунға муйәссәр болса, «Ясмин» ансамбли (Маливай оттура мәктиви) 2-орунни егилиди. 
«Монолог» номинацияси бойичә —Ә.Қастеев намидики Алтөй оттура мәктивиниң оқуғучиси Ясмина Алимова 1-орунға сазавәр болди. Конкурс-фестивальниң ғалиплири Пәхрий ярлиқ вә мәхсус соғилар билән тәғдирләнди . Шундақла барлиқ қатнашқучилар (159 оқуғучи) вә 30 муәллим ҖУЭМниң Пәхрий ярлиқлири вә Тәшәккүрнамилири билән тәғдирләнди.
Ахирида мәзкүр чарә-тәдбирниң уюштурғучиси Илһамия Ниязова сөзгә чиқип, наһийәләрдин кәлгән оқуғучиларға вә уларниң ата-анилири билән педагог-хореографлириға, муәллимлиригә адил қазилар — Гүлбаһар Қасимова-Ибрагимоваға, Сабирҗан Манашевқа, Мехруллам Сетәковқа һәм ушбу конкурс-фестивальни уюштурушқа чоң ярдәм қилған Қазақстан Җумһурийитиниң Президенти йенидики Миллий қурултай вә Қазақстан хәлқи Ассамблеяси Кеңишиниң әзаси, ҖУЭМ рәиси Шаһимәрдан Нурумовқа, ҖУЭМ Әмгәкчиқазақ наһийәлик шөбисиниң рәиси Сулайман Мәхсүтовқа вә униң орунбасарлири Нурбүви Насирова билән Нурҗамал Һасановаға, «Уйғур авази» гезитиниң баш муһәррири Ершат Әсмәтовқа, Кузиевлар аиләвий фондиға, «Арзу» кафесиниң башлиғи Арселин Зулияровқа, Ават йезиси Мәдәнийәт өйиниң мудири Долқун Розахуновқа, Гүлҗаһан Талиповаға вә Сәнәм Имрәмзиеваға вә башқиму исимлири аталмиған миллий мәдәнийитимиз  җанкөйәрлиригә чәксиз миннәтдарлиғини изһар қилди. 
Әтигәнлиги башлинип, алтә саат давам қилған «Өнерпаз болсаң, арқалан!» — «Сәнъәткар болсаң, тәлпүнгин!» конкурс-фестивали көплигән яш талантларниң йүксәк пәллиләргә интилишиға түрткә болди. 
Җәмләп ейтқанда, ушбу чарә-тәдбирдин миллий нахша-сазға тәшна жүрәкләрни қандуруп, арамхуда дәм елип қайттуқ.

СҮРӘТТӘ: конкурс-фестивальдин көрүнүш.

Әзиз НАСИРОВ чүшәргән сүрәт. 

408 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы