• Маарип
  • 22 Маусым, 2022

Қолда бар алтунниң қәдрини биләйли

Йеқинда Алмутидики «Достлуқ» микрорайонида А.Розибақиев намидики 153-мәктәп-гимназиягә йеңи оқуш жилиға бала топлаш мәсилисигә беғишланған умумий жиғин болуп өтти. Жут рәһбәрлиги уюштурған баш қошушқа пәқәт дружбилиқларла әмәс, бәлки алимлар, мәтбуат хадимлири, Әвезов, Алатав наһийәлиридики җамаәтчилик вәкиллири билән миллий мәдәнийитимиз җанкөйәрлири қатнашти. 

Ершат ӘСМӘТОВ,
«Уйғур авази»

“Достлуқ” микрорайони Ақсақаллар кеңишиниң рәиси Әли Әхмәтов көпчиликкә бу муһим жиғилишниң мәзмун-маһийитини чүшәндүргәндин кейин, риясәтчи, журналист Шавкәт Нәзәров дәсләпки сөзни гимназия мудири Шавкәт Өмәровқа бәрди. 
– Миллий маарип мәсилиси – бүгүнки күнниң асасий проблемисила әмәс, хелә вақиттин бери бизниң «түгимәс нахшимиз» болуп келиватиду, — деди өз нутқида Шавкәт Ниязоғли. – Дайим мошу мәсилә әтрапидин биз айлинип кетәлмәймиз һәм кетишимизму мүмкин әмәс. Сәвәви, һәрқандақ милләтниң бебаһа байлиғи, җан томури – тил. Һә, миллий маарипни буниңдин бөлүп қарашқа һәргиз болмайду.
Мудир өзиниң жигирмә минутлиқ докладида гимназия коллективиниң оқуғучиларға дөләт стандартиға мувапиқ сапалиқ билим бериш, җәмийәткә лайиқ заманивий шәхсни тәрбийиләш йолида қол йәткүзгән утуқ-муваппәқийәтлиригә әтраплиқ тохталди. Натиқ шундақла өзи рәһбәрлик қиливатқан билим дәргаһиға бала топлаш мәсилисини чоңқур тәһлил қилип, униң мурәккәплишишиниң сәвәплирини, болупму буниңдики ата-аниларниң ролини ениқ дәлил-испатларни кәлтүрүп, кәң даиридә ейтип өтти. 
Шуниңдин кейин сөз новитини алған филология пәнлириниң доктори Алимҗан Тиливалди, жут мөтивәри, пешқәдәм мәтбәәчи Зерип Молотов, «Достлуқ» микрорайониниң баш жигитбеши Азат Ибрагимов, жут активисти Шеринбанум Әлиева, миллий мәдәнийитимизниң җанкөйәри Азтекин Ибрагимов миллий маарипимизға аит проблемилар, уларни һәл қилиштики қийинчилиқлар һәққидә гәп қозғап, бу мәсилидә һечбир уйғурниң чәттә қалмаслиғи һәм һәммимизниң күч чиқириши лазимлиғини алаһидә тәкитлиди.
Гәп болуватқан гимназиядә бүгүнки күнгә қәдәр, тәйярлиқ синиплирини қошқанда, 1400 оқуғучи билим алмақта. Бу, әлвәттә, бир қаримаққа, яман әмәстәк. Амма имканийәтниң буниңдин нәччә һәссә жуқури екәнлигини әскә алсақ, хәлқимиздә миллий маарипимизға болған көзқарашниң жилдин-жилға суслишип кетип барғанлиғини сезивелиш тәс әмәс. Жираққа бармай, буниңға мәзкүр билим дәргаһи орунлашқан, хәлқимиз вәкиллири зич яшайдиған «Достлуқ» микрорайонидин 2507 уйғур пәрзәндидин пәқәт 591 қаракөзимизниңла ана тилида оқуватқанлиғини мисалға кәлтүрсәк купайә. Һә, гимназия оқуғучилириниң қалған қисмини шәһәр даирисидики вә сиртидики айрим жутлардин кәлгәнләр вә башқа милләт вәкиллири (9 қазақ, 1 рус вә 8 өзбәк) тәшкил қилиду.
Шуни ишәшлик ейталаймизки, гимназия муәллимлириниң кәспий маһарити һәм оқуғучилириниң билим дәриҗиси елимиздики билим дәргаһлириниң һечқайсидин кам әмәс. Мәсилән, гимназия Миллий биртуташ тесттин жуқури нәтиҗиләргә еришип келиватса, ахирқи он төрт жил ичидә оттура һесапта учумкарларниң 83 пайизи, йәни 599 учумкардин 502 учумкар (униң 389 грант бойичә) Қазақстандики вә чәт әлләрдики һәрхил йетәкчи алий оқуш орунлириға чүшкән. 32 оқуғучи гимназияни «Алтун бәлгүгә» тамамлиған. Мундақ мисалларни йәниму нурғун кәлтүрүшкә болиду. Буниңға фактлар йетип-ашиду. 
Балилиримизни педагогикилиқ мутәхәссисләр һәм маддий-техникилиқ базиси җәһәттин карванбеши аталған, елимиздики вә униң ташқирисидики көплигән мәктәпләргә үлгә болуп, исми дунияға тонулған қутлуқ билим дәргаһида, йәнә келип, ана тилимизда оқутуштин баш тартиватқанлиғимиз – һәйран қаларлиқла әмәс, бәлки әқилгә сиғмайдиған әһвалдур. Мустәқил Қазақстандикидәк хәлқимиз үчүн яритилған мундақ имканийәтниң дунияниң һечбир мәмликитидә йоқлуғини ойлисаң, «қолда бар алтунниң қәдригә йәтмәйватқанлиғимизни» сезивелиш тәс әмәс. Шуңлашқиму бу мәсилидә «бөкимизни алдимизға қоюп», чоңқур ойлинип, тегишлик хуласә чиқиришимиз лазим, дәп ойлаймиз.
 

406 рет

көрсетілді

1

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Асийәм

27 Маусым, 2022

Азтикин Ибрагимовниң балилири , нәврилири рус тилида оқуп, өйлиридә русчә параңлашса улар башқиларға қандақ несиһәт қилалайду? Бирәр адәм орнидин туруп, сизниң нәврилириңиз қайси мәктәптә оқуйду дәп немишкә соримайду?

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы