• Әхбаратлар еқими
  • 22 Маусым, 2022

Исламшунас алим билән учрашти

Йеқинда Алмута шәһири “Достлуқ” микрорайониниң жут-җамаәтчилиги диний өлүма вә исламшунас алим Муһәммәт Йүсүп билән учрашти. Бу учришишқа пүткүл аңлиқ һаятини Ислам дининиң тәрәққиятиға беғишлиған қериндишимиз билән дидарлишишни халиған йүзгә йеқин адәм қатнашти.

Мәшүр САСИҚОВ,
«Уйғур авази»

Алим һөрмитигә йейилған кәң дәстихан ечилиштин илгири дуа-тәгбир қилинди. Андин «миллий мәдәниййитимиз җанкөйәри Азтекин Ибрагимов сөзгә чиқип, алим Муһәммәт Йүсүпниң тәрҗимиһали вә әмгәк паалийитигә тохталди.
– Әгәр биз Муһәммәт Йүсүпниң Алла йолида әмәлгә ашурған ишлириға тәпсилий тохтилидиған болсақ, бир күнму азлиқ қилиду – деди натиқ. – Шуңлашқа мән уларниң асасийлирини атап өтәй. Мәсилән, китавимиз Қуръан Кәримни уйғурчиға тәрҗимә қилғининиң вә уни барчимизға һәқсиз тарқатқанлиғиниң өзи бир қәһриманлиқтур. Буниңдин ташқири, Қуръан Кәримдин толуқ мәлумат беридиған көплигән китапларни нәшир қилдурғининиму алаһидә тәкитлигән орунлуқ. Шундақла униң миңдин ошуқ илмий мақалиниң муәллипи екәнлиги, қериндишимизниң тиришчанлиғи билән илим-пәнгә дегән иштияқиниң зорлиғидин дерәк бәргүси. Әлвәттә, биз, уйғурлар, униң әмгәклири арқилиқ динимиз Исламни чоңқур үгәндуқ вә улардин йүзлигән соалға җавап таптуқ.
Андин новәт билән сөзгә чиққан жут мөтивәрлири Қасим һаҗим Имиров, Ғоҗәхмәт Калашиев, Садиқжан Юнусов, сәясәтшунас Қәһриман Ғоҗамбәрдиев, пешқәдәм журналист Ядикар Сабитов, австралиялик меһман Өмәрҗан Мәхсүт, қаримлар Ялқун Норузов вә Бәхитҗан Норузов Муһәмәт Йүсүпниң инсанларни Исламға йеқинлаштуруш йолидики әҗригә жуқури баһасини бәрди. Улар алимниң динимиз Исламни чоңқур үгәнгән һалда, бизниң һалал билән һарамни айривелишимизға ана тилимизда зәмин яратқанлиғи һәркимниң қолидин келивәрмәйдиған ишлардин екәнлигини тәкитләп, бу йөнилиштә Муһәммәт Йүсүп чоң бошлуқни толуқтурғанлини қәйт қилди. Натиқлар, умумән, бир еғиздин диний өлүма, Исламшунас алимниң дуния уйғурлири арисида йәткән һөрмитини тилға елип, шан-шөһритиниң бәләнтлиги әйнә шу җапалиқ әмгиги бәдилигә кәлгәнлигини тәкитлиди. 
Учришиш давамида «Достлуқ» микрорайониниң баш жигитбеши Азат Ибрагимов вә тиҗарәтчи һәм меценат Қасим һаҗим Имиров жут-җамаәтчилик намидин меһманға чапан япти. Андин Муһәммәт Йүсүп сөз елип, өзиниң намиға ейтилған иллиқ сөзләргә толиму мәмнун болғанлиғини йәткүзүп, Алла йолида қилған ишлирини тоғрилиқ қисқичә ейтип өтти:
– Һөрмәт қериндашлирим – деди у өз нутқида. – Бүгүн силәр мени толиму махтавәттиңлар. Мән унчивала иш қилғиним йоқ. Әлвәттә, өзәм яхши көридиған илим-пән арқилиқ силәрниң көңлүңлардин чиққидәк иш қилған болсам, мән өзәмни бәхитлик һесаплаймән. Әнди бая силәр тәкитлигән Қуръан Кәримниң уйғурчә тәрҗимиси пәқәт мениңла әмгигим түпәйли йоруқ көргини йоқ. Униңға қол учини сунған сахавәтлик инсан Дилмурат ака Кузиев аримизда олтирипту. Шу милләтпәрвәр акимиз болмиған болса, мениң әмгигим, мүмкин, бүгүнгә қәдәр топа бесип ятар еди. Әнди бәзи әмгәклиримму қазақстанлиқ қериндашлиримниң қоллап-қувәтлиши нәтиҗисидә әмәлгә ашти. Пурсәттин пайдилинип, мениң билән йеқин алақида болған Садиқҗан ака Юнусовқа, «Мир» нәшриятлар өйиниң» мудири Әлишер Хәлиловқа, корректорлиқ җәһәттин көп әҗир сиңәргән Юлтузай Семәтоваға вә башқиму инсанларға чәксиз миннәтдарлиғимни билдүримән. Алла уларға саламәтлик вә хатирҗәмлик бәргәй.
Умумән, учришиш қизиқарлиқ дәриҗидә өтти. Муһими, әрәпстанлиқ қериндишимиз мошу йәрдиму Ислам дини бойичә әтраплиқ чүшәнчә бәрди.    
 ***
Бу хилдики учришишлар, әлвәттә, Султан-Қорған мәһәллисидики мәркизий мечит билән М.Яқупов намидики 101-мәктәп-гимназиясидиму өтти. У йәрдә алимға алаһидә һөрмәт көрситилип, саһипханлар тәрипидин уйғурниң чапинини япти. Учришишқа жиғилған көпчиликкә Муһәммәт Йүсүп Ислам дини бойичә әтраплиқ әхбарат бәрди. Ахирида у жиғилғанларни қизиқтурған көплигән соалларға ениқ мисаллар арқилиқ әтраплиқ җавап бәрди.

414 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы