• Әхбаратлар еқими
• 22 Маусым, 2022

Президент — Россиядә...Иранда вә Катарда болди

Дөләт рәһбири Қасым-Жомарт Тоқаев Петербург хәлиқара ихтисадий форуми аяқлашқандин кейин Россия Президенти Владимир Путин билән учрашти. 
 Икки мәмликәт лидерлири сөһбәт давамида сода-ихтисадий саһадики Қазақстан-Россия һәмкарлиғиниң һазирқи әһвали вә уни тәрәққий әткүзүш истиқбалини тәпсилий муһакимә қилди. 
 Қасым-Жомарт Тоқаев мурәккәп геосәясий вәзийәткә қаримай, Қазақстанниң асаслиқ стратегиялик шериги Россия билән болған өзара һәрикитиниң җошқун тәрәққий етиватқанлиғини тәкитлиди. 
 – Һөрмәтлик Владимир Владимирович, мән Сизниң мошу абройлуқ форум ишиға қатнишиш тәкливиңизни қанаәтлиниш билән қобул қилдим. Сизниң докладиңизни чоң қизиқиш билән тиңшидим. Бийилқи жил – алаһидә жил, дипломатик мунасивәтләрниң орнитилғиниға һәқиқәтәнму 30 жил, йәни иккитәрәплимә һәмкарлиқни тәрәққий әткүзүштә чоң утуқларниң бар екәнлигини тәкитләш үчүн толуқ асас бар. У нәқ алға қарап сүръәтлик тәрәққий етишни давамлаштуриду, дәп ойлаймән, – деди Дөләт рәһбири. 
 Өз новитидә Россия Президентиму мәмликәтләр оттурисида сода-ихтисадий һәмкарлиқниң изчил тәрәққий етиватқанлиғини қәйт қилди.
 – Петербург хәлиқара ихтисадий форумиға кәлгиниңизгә чоң рәхмәт. Биз үчүн бу муһим – алаһидә мунасивитимизни намайиш қилиш вә Сиз билән асасий йөнилишләр бойичә келишивелиш имканийити, асасий йөнилиш, әлвәттә, ихтисат. Һазирла форум мәйданида бу тоғрилиқ ейтти, – деди Владимир Путин.

***

Дөләт рәһбири Қасым-Жомарт Тоқаев Иран Ислам Җумһурийитидә рәсмий сәпәрдә болди. 
 «Саадабад» Президент комплексида рәсмий қарши елиш мәрасимидин кейин икки мәмликәт Президенти тар даиридә учрашти. Қасым-Жомарт Тоқаев Президент Ибрахим Раисиға Иранға рәсмий сәпәр билән келишкә тәклип қилғанлиғи үчүн миннәтдарлиқ билдүрди. 
– Сәмимийәт вә меһмандостлуқ билән үчүн миннәтдарлиқ билдүргүм келиду. Мән Сизниң тәкливиңизни чоң қанаәтлиниш билән қобул қилдим. Мениң Президент сүпитидә Иранда дәсләпки қетим болушум. Бу сәпәр муһим әһмийәткә егә. Бүгүнки музакириләрниң мәмликәтлиримиз оттурисидики һәмкарлиқниң тәрәққий етишиға күч-қувәт беридиғанлиғиға ишинимән. Иран – Каспий регионидики йеқин хошнимиз вә ишәшлик шеригимиз, – дәп тәкитлиди Дөләт рәһбири Қасым-Жомарт Тоқаев. 
Өз новитидә Иран Президенти Қасым-Жомарт Тоқаевқа вә униңға һәмра болуватқан делегациягә илтипат билдүрүп, мәзкүр рәсмий сәпәрниң иккитәрәплимә һәмкарлиқниң барлиқ йөнилишлири бойичә Қазақстан – Иран мунасивәтлирини тәрәққий әткүзүштә бурулуш басқучи болуп һесаплинидиғанлиғини атап көрсәтти.
Қасым-Жомарт Тоқаевниң Теһранға қилған рәсмий сәпириниң программиси Иран Ислам Җумһурийитиниң алий лидери Али Һөмәйни билән өткүзгән учришиш билән тамамланди. Сөһбәт давамида тәрәпләр Қазақстан-Иран мунасивәтлирини тәрәққий әткүзүш истиқбалини муһакимә қилди.

***

Дөләт рәһбири Қасым-Жомарт Тоқаев дүшәнбә күни Катар әмири шейх Тамим бен Хамад Әл Таниниң тәкливигә бенаән Дохаға кәлди.
Әтиси Қазақстан Президенти «Аләмшумул ихтисатни әслигә кәлтүрүш сүръитини яхшилаш» мавзусида өткән иккинчи Катар ихтисадий форуминиң ечилишиға қатнашти.
Форум мәмликәтләрни ихтисадий боһрандин елип чиқишқа беғишланди. У Bloomberg агентлиғи тәрипидин уюштурулуп, Катар әмириниң қоллап-қувәтлишидә өтти.
Андин кейин Қазақстан Президенти Қасым-Жомарт Тоқаев Катар әмиришейх Тамим бен Хамад Әл Тани билән учришип сөһбәтләшти.
Учришиш давамида тәрәпләр һәмкарлиқниң һазирқи әһвали вә истиқбалини муһакимә қилди. Лидерлар һәр икки тәрәпниң сода-ихтисадий алақиларни күчәйтишкә вә бирләшкән инвестициялик лайиһиләрни әмәлгә ашурушқа болған интилишини тәстиқлиди.
Қазақстан Президенти ихтисадий һәмкарлиқ истиқбали тоғрилиқ гәп қилип, икки мәмликәт оттурисида өзара сода көрсәткүчлирини көпәйтишниң муһим екәнлигини атап өтти.
Дөләт рәһбири Қазақстан вә Катар оттурисида өзара қизиқиш һасил қилидиған саһалардики мунасивәтләрни күчәйтиш үчүн чоң имканийәтләрниң бар екәнлигини тәкитлиди. У икки мәмликәтниң һөкүмәтлири вә бизнесменлири оттурисида өзара һәрикәтни җанландурушни тәклип қилди.