• Замандаш
• 03 Тамыз, 2022

Һәр бенада изи бар

Гөһәрбүви ИСМАЙИЛҖАНОВА,
«Уйғур авази»

Наһийәниң қайси йеза, авулиға бармаң, көпқәвәтлик өйләр, мәктәпләр билән мәдәнийәт өйлири, балилар бағчилири вә дохтурханилар көзгә челиқиду. Һә, уларниң тәңдин-толиси өткән әсирниң сәксининчи, тохсининчи жиллири селинип, пайдилинишқа берилди. Әйнә шу қурулуш ишлирини елип беришта шу дәвирдики наһийә вә егилик рәһбәрлири салаһийәтлик мутәхәссисләрни җәлип қилған еди. Яркәнтлик Нурмәһәмәт Семәтов әйнә шундақ қошдипломлуқ қурулуш мутәхәссиси сүпити билән бу саһаға тегишлик һәссисини қошти. 
Шәһәрдики Хелил Һәмраев намидики мәктәпни тамамлап, “Муәллим болумән” дегән арманлар билән жүргинидә һәрбий сәпқә чақиртилип, Вәтән алдидики иккижиллиқ борчини өтәш үчүн атланди. Һәрбий сәптә икки жилини қурулуш саһасида өткүзгән у әнди қурулушчи болушни мәхсәт қилди. Бу арманлириға у Ақсу наһийәсидики қурулуш техникумини вә Алмута бенакарлиқ қурулуш институтида оқуп йәтти.
 Һә, у жиллири наһийәдә қурулуш саһасиға алаһидә диққәт-етивар берилип, йеза-авуллар билән шәһәрдә балилар бағчилири, көпқәвәтлик өйләр, мәктәпләр биридин кейин бири селиниватқан жиллар еди. Шундақ қилип, у дәсләп 1975-жили «ПМК-1» мәһкимисигә мастер болуп ишқа орунлаштидә, бәлни бағлап ишқа киришип кәтти. Тәвәдики Кичик Чиған йезисидики 150 орунлуқ Мәдәнийәт өйи, Алмали йезисидики 624 орунлуқ йеңи мәктәп, Пәнҗим йезисидики 960 орунлуқ заманивий типтики мәктәп билән егиликниң мәмурий идарисини селишта чоң җавапкәрлик билән ишлиди. 
Әлвәттә, мундақ яш мутәхәссис наһийә рәһбәрлириниң диққәт-нәзәридә болуп, униңға техиму зор ишәнчә билдүрүлди.  Та бүгүнки күндиму Молодежный шәһәрчисиниң һөснигә һөсүн қошуп, бир-биридин чирайлиқ қәд көтирип турған өйләр мана шу Нурмәһәмәт акиниң рәһбәрлигидә селинғанлиғини һәммә убдан билиду. 
Наһийә рәһбәрлири йәнила чоң җавапкәрлик жүкләп, тәвәдики қайси йезиға әвәтмисун, у өзиниң ишбиләрмәнлиги вә җавапкәрлиги билән ишәнчә һөддисидин шәрәп билән чиқти. Тәвәдә онлиған көпқәвәтлик өйләр, заманивий беналар қәд көтирилип, мәмурийәт беналири, монча, сода мәркәзлири пайдилинишқа берилди. Әпсус, у мана шундақ бәрпакарлиқ билән ишләватқан бир пәйттә күтүлмигән йәрдин заман өзгәрдидә, боһранчилиқ йүз берип, қурулуш ишлири тохтап қалди. 
Тәдбирчан тәшкилатчи Нурмәһәмәт Испатуллаоғли ишсиз қалдим дәп тенәп кәтмиди. У тавакәл дәп, тиҗарәтчиликкә бәл бағлиди. Қурулуш инженери түгмән ечип, ун тартиш ишлирини қолға алди. Шуниң билән бирқатарда «Карим» навайханисида навайчилиқ билән шуғулланди. Тирикчилик уни қанчә синимисун, синақлардин сүрүнмәй, һәр ишта өзиниң тәдбирчанлиғи, ишбиләрмәнлиги билән иш көрди. Навайчилиқта наһийә турғунлирини нан вә нан мәһсулатлири билән тәминләп, 2010-жили һөрмәтлик дәм елишқа чиқти. 
— Һаят бизни тавландурғачқа қурулуш инженери болсамму, навайчилиқта тенимәстин ишләптимиз. Һазир шәһәр вә йезиларни арилап қалғидәк болсам, бизниң «ПМК» мәһкимиси қурулушчилири салған беналарни арилап, һадуқ алимән. Әлвәттә, уларниң бәзилири мурәккәп җөндәштин өткүзүлүватса, бәзилири та шу дәвирдикидәк сақлинип туриду. Мән шу «Молодежный» (һазирқи Головацкий йезиси) Мәдәнийәт өйи билән мәктәп бенаси һәққидә шундақ дегән болар едим. Йеза егилиги ишләпчиқиришиниң маһир тәшкилатчиси Н.Головацкий колхозчилар үчүн көпқәвәтлик өйләрни селишни қолға алған еди. Мана шу өйләрдә  бүгүнки күндиму жутдашлар яшаватиду. Мана биз шундақ ишләптимиз, — дәп әслиди пешқәдәм қурулушчи у жилларни.
— Һазирчу, немә ишлар билән мәшғул болуватисиз? — дәп соридуқ Нурмәһәмәт акидин. 
Йешимиз йәтмиш бәшкә кәлсиму, қутлуқ кәтминимиз билән өлчүк йеримиздә кәтмән чепип, көктат, мевә-чевә өстүрүп, пәрвиш қилиш әмәк болуп қалди бизгә. Һойлиңизда рәңму-рәң гүлләр ечилип, беғиңизда алма-өрүк мәй бағлап, кәйзиләрдә лаза, помидор, тәрхәмәк пишип турса, қандақ яхши. Мана һөрмәтлик дәм елишта мошу ишлар билән бәнт болуватимиз. Һә, жутдарчилиқ ишларғиму арилишимиз. Наһийәлик мәдәнийәт мәркизи рәһбәрлири мәслиһәт сорап қалса, билгинимизни ейтип, у-бу ишларға қол-қанат болушқа биз тәйяр, — дәйду Нурмәһәмәт ака.
Һәқиқәтәнму Нурмәһәмәт Испатуллаоғлини җәмийәтлик ишларниң паал иштракчиси десәк, орунлуқ. Һәрқандақ чарә-тәдбирдә атилиқ несиһитини айимай, қолидин кәлсә, ярдәмгә  тәйяр. Әң муһими, көпмилләтлик тәвә турғунлириниң достлуғи билән бирлигини сақлаш, яшларни әмгәксөйгүчлүккә, вәтәнпәрвәрликкә үгитиштә у мәсләкдаш. Жутта мошундақ көпни көргән мөтивәрләрниң бар болғини қандақ яхши. 
Атилар аман болсун!  

Панфилов наһийәси.