• Әхбаратлар еқими
• 01 Қыркүйек, 2022

Һөкүмәтләрара кеңәш мәҗлисигә қатнашти

Қазақстан Премьер-министри Әлихан Смайылов Қирғизстанда иш бабидики сәпәрдә болуп, Чолпон-Ата шәһиридә өткән Евразия һөкүмәтләрара кеңишиниң мәҗлисигә қатнашти. 
Қазақстан Һөкүмитиниң рәһбири һазирқи шараитта Иттипақ әллириниң баһаларниң, биринчи новәттә, озуқ-түлүк товарлири баһалириниң җиддий өсүшигә дуч кәлгәнлигини тәкитлиди. Униң сөзичә, өткән алтә айда ЕАИИда озуқ-түлүк баһаси 12,9 пайиз көпәйди. 
­– Шуни тәкитләш керәкки, бизниң интеграцияниң һазирқи дәриҗисидә өзара содида миллий валютилар кәң пайдилинилмақта. Буниңда биз миллий валютилиримиз оттурисидики алмаштуруш курслириниң җиддий бузулуватқанлиғини көрүватимиз, улар Америка валютисиға бағлиқ кросс-курслар арқилиқ бәлгүлиниду. Бу содиға вә мәмликәтлиримиздики инфляция җәриянлириға җиддий тәсир қиливатиду, – дәп тәкитлиди Қазақстан Премьер-министри.
Әлихан Смайылов кәсипдашлирини миллий валютиларниң алмаштуруш курслирини шәкилләндүрүш мәсилилирини муһакимә қилиш үчүн мәркизий банкларниң консультациялирини жүргүзүшкә вә Евразия һөкүмәтләрара кеңишиниң новәттики мәҗлисигә тәклипләрни беришкә чақирди.
Һөкүмәтларара кеңәш мәҗлисидә Евразия ихтисадий иттипақиниң әллири Евразия қайта ғәмсизләндүрүш компаниясини (ЕҒК) қуруш тоғрилиқ қарар қобул қилди.
Шундақ қилип, бизнесқа ярдәм қилишниң йәнә бир қурали пәйда болиду. Тәшкилат өзара вә ташқи содида ғәмсизләндүрүш мәсилисидә ярдәм қилиду, инвестициялик һәмкарлиқни рәғбәтләндүриду. Келәчәктә өзиниң баһалиқ қәғәзлири чиқириду вә лайиһиләрни мәбләғ билән тәминләйду. Компания йеңи хәлиқара шерикләрниң қошулуши үчүн очуқ.
Әлихан Смайылов Евразия һөкүмәтләрара кеңиши мәҗлисиниң даирисидә Қирғизстан Министрлар кабинетиниң рәиси – Президент Мәмурийитиниң рәһбири Акылбек Жапаров вә Россия Федерацияси Һөкүмитиниң рәиси Михаил Мишустин билән иккитәрәплимә музакириләрни өткүзди. Һөкүмәт башлиқлири ихтисадий һәмкарлиқ мәсилилирини муһакимә қилди.