• Әхбаратлар еқими
• 01 Қыркүйек, 2022

Мәктәпләрдә дәрис өткүзиду

Пүткүл җумһурийәт бойичә бәш миңдин ошуқ тәртип сақчиси педагоглар вәзиписини атқуруп көриду. 
Полиция хадимлири Қазақстан мәктәплиридә бехәтәрлик вә һоқуққа хилаплиқ қилишларниң алдини елиш бойичә мәшғулатларни жүргүзиду. Җүмлидин улар балиларға пәвқуладдә әһвалларда қандақ һәрикәт қилишни үгитиду. Маарип министрлиги мәтбуат хизмитиниң хәвәр қилишичә, бу тоғрилиқ маарип вә ички ишлар министрлириниң кеңәшмисидә гәп болди.
– Сентябрьдин башлап бәш миңдин ошуқ полиция хадими мәктәпләргә келип, тегишлик дәрисләрни өткүзиду. Педагоглар, мәктәп мудирлири вә уларниң орунбасарлири бу ишқа паал қатнишиду, – деди маарип министри Асхат Аймағамбетов. 
У полициядин мәктәпләр йенида новәтчиликни күчәйтишни вә мәктәп автобуслири һәм бехәтәрлик системилирини тәкшүрүшни аяқлаштурушни илтимас қилди. Министр шундақла билим тәшкилатлири билән ишләватқан күзәт фирмилириға қойилидиған тәләпләргә мәктәпниң алаһидилигини чүшинишиниң зөрүр екәнлиги тоғрилиқ пунктларни киргүзүш вә мәктәп күзәтчилири арисида кадрлар турақсизлиғини азайтиш керәклигини әслитип өтти. 
Өз новитидә ички ишлар министри Марат Ахметжанов полиция хадимлири мәктәпләрдә ишлигән вақитта өзиниң Нур-Султандики гимназияләрниң биригә келидиғанлиғини хәвәр қилди.
Асхат Аймағамбетов мәктәпләрдики видеобайқаш мәсилисигә айрим тохтилип өтти. Һакимлиқларниң мәлуматлири бойичә, барлиқ билим мәһкимилири видеокамерилар билән тәминләнгән. Амма тәкшүрүшләр айрим камериларниң ишлимәйдиғанлиғини, бәзилириниң оператив башқуруш мәркәзлиригә қошулмиғанлиғини көрсәтмәктә. Министр камерилар саниниң әмәс, бәлки оқуғучиларниң видеобайқаш билән тәминләнгәнлигиниң муһим екәнлигини тәкитлиди.