• Әхбаратлар еқими
  • 08 Қыркүйек, 2022

«Ана жутум Қизил Ғәйрәт»

Һәрбир инсан үчүн өзиниң туғулуп өскән, чоң болған йери һәрдайим иссиқ вә иллиқ көрүниду. Киндик қеним тамған, туғулуп чоң болған, мәктәпкә берип, шу билим дәргаһини тамамлиған алтун бөшүгүм — ана жутум Қизил Ғәйрәт маңиму бөләкчә йеқин һәм иссиқ. Жутумизда һазир уйғур, қазақ, түрк вә рус миллитиниң вәкиллири бир аилиниң әзалиридәк инақ, бир-биригә дост, қериндаш болуп һаят кәчүрмәктә. 
 «Атаңму жут, анаңму жут», дегән гәп бар. Һәқиқәтәнму шундақ. Улар динимизни, урпи-адәт, рәсим-йосунлиримизни, мәдәнийитимизни риваҗландуруп, жутниң қәдир-қиммитини чүшәрмәй һаят кәчүрмәктә. Бирлик, өмлүгимизму өз җайида. Жутдашларниң актив паалийити билән йезимиз жилдин-жилға җанланмақта. Жутдарчилиқ ишларниң һәммиси җамаәтчилик әһли билән пүтүватиду. Алимлар «Әлниң әтики күнини билгүң кәлсә, бүгүнки яшлириға қара» десә, қазақ хәлқиниң көрнәклик ақини Мағжан Жумабаев «Мән яшларға ишинимән», дәп яшларға үмүт артқан екән. Бизниңму Қизил Ғәйрәт жутиниң яшлириға ейтар миннәтдарлиғимиз чәксиз. Улар жутдарчилиқ ишлириниң дайим алдинқи сепидә болуп келиватиду. Хәйрихаһлиқ ярдәм көрситиш ишлиридиму әшу яшлиримиз дайим қол учини созуватиду. Шуниму тәкитләш лазимки, бүгүнки яшлиримизниң билимликлигигә, әмгәксөйгүчлүгигә, бир-биригә болған һөрмәт вә меһриванлиғиға қарап, апирин әйләйсән һәм «Аллаға миң қатлиқ шүкри, биз келәчәктә чоң утуқларға йетимиз», дәп үмүт қилалайсән. Қазақ хәлқидә «Болидиған әлниң балиси бирини-бири батур дәйду» дегән дана гәп бар. Шәхсән өзәм қандақла иш болмисун, мәйли биригә ярдәм қолуңни сунуш яки башқиму хәйрихаһлиқ ишлирида , жутумизниң яшлириға мураҗиәт қилимән. Өз новитидә, уларму һәммиси бир ата вә бир аниниң балисидәк, «ләббәй», дәп қоли көксидә туриду. Уларниң бу миннәтсиз меһнитигә қандақ апирин демәйсиз. Бу, әлвәттә, бизниң өмлүгимизниң арқисида болуватқан изгү ишлар. Хәлқимиз «Бирлик бар йәрдә — тирлик бар» дәйду. Һәқиқәтәнму, жутдашлиримиз билән һәмкарлиқта бәҗириватқан ишлиримизда бәрикәт бар. 
 2016-жилдин башлап жутумизниң иссиғидин кирип, соғидин чиқиватқан, һардим-талдим демәй, кечә-күндүз жутиға хизмәт қиливатқан Қизил Ғәйрәт йезисиниң баш жигитбеши Тохтахун Ибрагимовни 1- сентябрь — туғулған күни мунасивити билән сәмимий тәбрикләп, жут яшлири намидин миннәтдарлиғимизни билдүрдуқ. Ейтмақчи, жутумизда қандақла муюм өткүзүлмисун, биринчиләрдин болуп жигитбешиға йолуқиду. Һә, жигитбешиму жуқурида ейтип өткинимдәк, иссиқ-соққа, күн яки түнгә қаримай, яз вә қиш демәй, муюм болған йәргә дәрһал йетип келиду, әһвалдин вақип болғандин кейин, жуқури-төвән ишларни жутқа хәвәрләйду. Мән ейтқан болар едим, жигитбеши бир көрүк. Униң үстидин яхшиму һәм яманму дәссәп өтиду. Мана шуниң һәммисиниң тилини тепип, аманәтни зиммисигә елип, еғир жүкни көтирип кетип барған Қизил Ғәйрәт йезисиниң баш жигит- беши Тохтахун Ибрагимовқа мошу қурлар муәллипиниң илтимаси вә жут яшлириниң қоллап-қувәтлиши билән бүгүнки күнгә қәдәр атқуруп кәлгән миннәтсиз меһнитигә миннәтдарлиғимизни изһар қилғач, учисиға миллий чапан, бешиға допа кийгүздуқ (сүрәттә). Жутумизниң ақсақили Мәһәмәт һаҗим Әйсаров жигитбешиға вә яшлиримизға икки дунияниң яхшилиғини тиләп, дуа қилди. Җанаби расулулла Саллаллаһу әләйһи вәссалам мубарәк һәдис шәриптә: «Адәмгә рәхмити йоқниң, Аллаға шүкүрчилиги йоқ» дегән. Жутниң жигитбешиға вә Қизил Ғәйрәт йезисиниң яшлириға Алла рази болсун. Ишлириға бәрикәт, тәнлиригә саламәт, аилисигә бәхит-саадәт тиләймән. Ата-бовимиздин бизгә мирас болуп келиватқан ана жутумиз — Қизил Ғәйрәт гүллинип, жутдашлиримиз вә пүткүл мусулман әһли аман болсун. Алла таала мошундақ өмлүгимиздин, еғиз бирлигимиздин айримисун, хошаллиқ күнлиримиз көп болсун, әзизләр! Амин!

 Бәхтияр қарим ЖАҚСЫЛЫҚОВ.

Талғир наһийәси.

252 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы