• Әхбаратлар еқими
  • 08 Қыркүйек, 2022

Йеңи вә Адаләтлик Қазақстанни қандақ тәсәввур қилисиз?

Техи йеқинда Президентимиз Қасым-Жомарт Тоқаев қазақстанлиқларға «Адаләтлик дөләт. Бирпүтүн милләт. Хатирҗәм җәмийәт» намлиқ новәттики Мәктүбини йоллиди. Йеңи Мәктүпниң «Бийил биз йеңи басқучқа қәдәм ташлидуқ. Хәлқимиз умуммиллий референдумда сәясий йеңилиниш йөнилишини қоллиди. Конституциялик реформа Йеңи, Адаләтлик Қазақстанни қуруш йолидики интайин муһим қәдәм болди. Елимиздики сәясий йеңилиниш әнди ихтисадий өзгиришләргә улишиши керәк» дәп башлиниши бекар әмәс... Һәммигә мәлумки, һазир елимиздә «Йеңи Қазақстанниң» келәчиги үчүн нурғунлиған өзгиришләр йүз бериватиду. Хәлиқ авазиға қулақ салидиған дөләт сүпитидә биз «Күчлүк Президент – тәсирлик Парламент – һесават бәргүчи Һөкүмәт» формулисини асасқа алдуқ. Дөләт рәһбири ейтқандәк, Адаләтлик Қазақстанни қуруш ишини техи йеңидин башлидуқ. Алда талай қийинчилиқлар күтмәктә. Амма шуниңға қаримастин, бизниң мәхситимиз өзгәрмәйду. Шуңлашқа йеқинда биз «Йеңи вә Адаләтлик Қазақстан дегәнни қандақ тәсәввур қилисиз?» дегән соалға җавап елиш мәхситидә төвәндики гезитханлиримизға мураҗиәт қилдуқ. 

Сабирәм ӘНВӘРОВА,
«Уйғур авази» 

 
Һапиз ҖӘЛИЛОВ, тиҗарәтчи: 
— «Йеңи Қазақстан» дегәндә мән биринчи орунға хәлиқниң хаһишини қойидиған, бирлиги ярашқан, течлиғи бузулмиған дөләтни тәсәввур қилимән. Чүнки бирлик болмиса, тирикчилик қамлашмайду. Шуңа бизгә биринчи новәттә, хәлиқләр достлуғини техиму мустәһкәмләп, барчә қазақстанлиқларни бир мәхсәткә топлаштуридиған сәясәт керәк. Биз бүгүнки Қазақстанни бирлигимиз билән бәрпа қилдуқ, Йеңи Қазақстанни қуруш үчүнму бир болушимиз, өм болушимиз лазим. 
Қазақстанниң әң чоң байлиғи – униң хәлқи. Демәк, хәлиқ мәнипийитини дәсләпки орунға қойғандила, дөлитимиз алға илгириләйду. Униң үчүн ишни хәлиқ ичидики ушшақ мәсилиләрни һәл қилиштин башлаш керәк дәп ойлаймән. Сәвәви, чоң мәсилә – мана шундақ йешимини тапмиған ушшақ зиддийәтләрниң жиғиндиси. Президентимиз тәкитлигәндәк, Йеңи Қазақстан дегинимиз – хәлиқ авазиға қулақ салидиған дөләт. Бүгүнки күндә хәлиқни һәләйкүмгә селиватқан нурғунлиған мәсилиләр бар. Йәр-өй мәсилиси, пенсия-мааш мәсилиси вә шундақла аддий хәлиқниң ғәзивини қозғаватқан – қиммәтчилик проблемиси. Гәпниң очуғи, һөкүмәт пенсия-маашимизға азирақ пул қошулса болди, базардики баһаларму бирдин жуқури өрләйду. Нәтиҗидә пенсия билән маашниң көтирилгинидин һечнемә өзгәрмәйду. Қисқиси, қазақстанлиқлар Адаләтлик Қазақстандин адиллиқни күтиду. 
Селимәм ӨМӘРОВА, хәлиқара «Қизил ай» җәмийәтлик бирләшмиси наһийәлик шөбисиниң рәиси: 
— Биз һәммимиз Йеңи Қазақстандин көплигән йеңилиқларни күтмәктимиз. Һәқиқәтән, елимиз заман тәливигә лайиқ тәрәққий әтмәктә. Узаққа тохталмай, өзәм яшаватқан Чонҗини мисалға кәлтүридиған болсам, йезимиз шәһәрләргә хас қияпәткә кирмәктә. Илгири шәһәрләрдикидәк йезилардики һәр өйгә су кириду, газ кириду десә, ишәнмәттуқ. Мана бүгүн бир заманларда бизгә орунланмас армандәк болған йеңилиқлар йүз берип, күндин-күнгә турмушимиз яхшиланмақта. Қолумизни иссиқ суға селип, бир кнопкини бесип қоюп, иссиқ өйдә яшайдиған күнгә йәттуқ. Мустәқилликниң дәсләпки жиллиридики қийинчилиқлар артта қалди. Оттуз жилда елимиз аләмгә тонулди. Ишинимәнки, йеңи Қазақстанда һаятимиз буниңдинму яхши болиду. 
Йеңи Қазақстан у – Адаләтлик Қазақстан. Мән Адаләтлик Қазақстанни коррупциясиз, парихорлуқсиз, көплигән йеңи иш орунлири ечилған, умумән, хәлиқниң хатирҗәм һаят кәчүрүши үчүн барлиқ имканийәтләр яритилған, қиммәтчиликкә йол қоймайдиған дөләт сүпитидә тәсәввур қилимән. Чүнки әмгәк күчи болсила, елимиздә барлиқ нәрсә йетәрлик. Пәқәт баримизни дурус пайдилиналмайватимиз. Әнди ойғинидиған вақит кәлди. Өзимизниң кийимини кийип, өзимизниң озуқ-түлүгини истимал қилидиған күнгә йетишимиз керәк. Йеңи Қазақстан дегәндә, мениң көз алдимға көплигән йеңи завод-фабрика, карханилар келиду. 
Әркин ЗЛАВДИНОВ, муәллим:
— Мениң хиялимдики Йеңи Қазақстан – йеңи технологияләр билән тәрәққий әтмәк. Чүнки ХХІ әсир – технологияләр дәври. Һазирниң өзидә барлиқ ишимиз компьютерға бағлиқ болуп қалди. Аддийғинә телефонниң ярдими билән көплигән мәсилимиз йешилип, вақтимизни үнүмлүк пайдилиниватимиз. Лекин биз пәқәт телефон билән чәклинип қалмай, униңдин күчлүк, униңдинму илғар технологияләрни ойлап тепишимиз лазим. Шундила риқабәткә қабил дөләткә айлиналаймиз. Бүгүнки күндә дөлитимиз билимлик мутәхәссисләргә муһтаҗ. Бу һесапта, билим саһасиға көпирәк салмақ чүшиду. Келәчәк – яшларниң қолида. Бизниң яшлиримиз компьютер-телефондинму күчлүк кәшпиятларни яритиши шәрт.
Ойлап қарисақ, биз күндилик һаятта пайдилиниватқан телефон, компьютер, телевизор, автомат машина, тоңлатқу, мультиварка, тефаль қатарлиқ кәшпиятларниң һәммиси аллиқачан тәрәққий әткән дөләтләрдә ойлап тепилған. Әгәр биз мошундақ тәйярға һәйяр болуп яшиверидиған болсақ, көчниң кәйнидә қалимиз. Аләм биздин йеңилиқ күтмәктә. Биз башқилар ойлап тапқан технологияләрни пайдилиниш билән чәклинип қалмай, өз кәшпиятлиримизни дунияға таритишимиз лазим. Шуңлашқиму мән Йеңи Қазақстанни «Made in Kazakhstan» дегән бренд билән тәсәввур қилимән. 
Динара АРДАҚҚИЗИ, лешмейкер вә блогер:
— Йеңи Қазақстанда – нурғунлиған йеңи кәсипләрниң барлиққа келидиғанлиғи җәзмән. Сәвәви, һазир бир хизмәт билән күн көридиған заман әмәс. Қолуңдин кәлсә, икки, һәтта, үч ишниң һөддисидин чиқалайсән. Пәқәт шуниң йолини тепиш, һорунлуққа берилмәй әмгәк қилиш керәк. Йеңи Қазақстанни қуруш үчүн – қазақстанлиқларниң сәвийәсини йеңилишимиз лазим. Бизниң менталитетимизда «иссиқ орнуңдин қозғалма», «барға қанаәт қилип яша» дегән чүшәнчә сиңип қалған. Әлвәттә, барға шүкри қилиш керәк. Амма қолуңдин кәлсә, немишкә бүгүнкидинму яхши өмүр сүрүшкә интилмасқа?! Бир орунда туривәрсә, алтунму қарийиду. Йеза яшлиридин «ким болисән?» дәп сорисаң, тәңдин-толиси «муәллим», «дохтур», «ашпәз» дәп җавап бериду. Биз мошундақ ядланди кәсипләрниң әтрапида чөгиләп жүривәрмәй, заман тәливигә лайиқ йеңи мутәхәссисликләрни егилишимиз лазим. 
Байер, бариста, постижер, стрингер, радиохирург, хедхантер, имиджмейкер, спичрайтер дегән кәсип түрлирини бири билсә, бири билип кәтмәйду. Буниңдин башқа, турғунларниң тәливигә мувапиқ Япониядә «сөһбәтләшкүчи», Улуқ Британиядә «новәттә турғучи» дегән мутәхәссисликләр пәйда болди. Илгири «Блогер», «лешмейкер» дегән сөзләрниң өзи бизгә натонуш еди, әмәсму. Амма заман нәпәсигә мувапиқ елимиз аста-аста йеңи терминлар билән толуқтурулуватиду. Йеңи Қазақстан – йеңи терминларни яритиду дәп ишинимән. 
Пәрһат ДУГАНОВ, «Әвлат» ансамблиниң рәһбири: 
— Президентимиз ейтқандәк, бизниң күчимиз – яшларниң билимидә. Ахирқи жиллири елимиздики билим саһасида көплигән өзгиришләр орун алди. Муәллим мәртивиси вә мәктәп мәсилиси һәрқачан муһим орунда келиватиду. Билим – дәрәқниң томури болса, һүнәр – униң мевиси. Шуңа балиларға сүпәтлик билим бериш билән қатар, уларниң бойидики қабилийитини риваҗландурушму интайин муһим. Һәрхил һүнәр мәктәплири бир чәттә турсун, елимиздә оттура билим беридиған мәктәпләрниң тапчиллиғи тәшвишкә салиду. Дөләт рәһбириниң йеңи Мәктүби билән тонушуп, интайин хурсән болдум. Чүнки униңда 2025-жилға қәдәр, 800 миң балиниң заманивий мәктәпләрдә оқушиға шараит яритиш мәсилиси көтирилипту. Шуниң билән қатар балиларниң қошумчә қабилийитини риваҗландуридиған шәхсий мәктәпләргиму көпирәк көңүл бөлүнсә, нур үстигә нур болар еди. Сәвәви, йеза яшлири оттура мәктәпниң босуғиси биләнла чәклинип қеливатиду. 
Қабилийәт дегән данға охшайду. Данни күн яхши чүшидиған йәрни таллап, қара топиға көмүп, вақти-вақтида су қуюп, пәрвиш қилмисаң, һәргиз  үнүп чиқмайду. Данниң буғдайға, буғдайниң нанға айлиниши үчүн көп әмгәк тәләп қилиниду. Шуниңға охшаш, қабилийәтлик яшлиримиздин – талантлиқ адәмләрни тәрбийиләп чиқиш үчүн қолайлиқ шараитқа муһтаҗмиз. Йеңи Қазақстан дегәндә, немишкиду, оюмға бирдин һәрхил йеңи мәктәпләр кәлди. 
Шадийәм ТУРСУНОВА, «Оазис-Сказка» балилар бағчисиниң йетәкчиси, көпбалилиқ ана:
— Йеңи Қазақстан у – балилиримниң бәхитлик келәчигиниң капалити дәп билимән. Йеңи Қазақстанда уларни паравән һаят, бәхитлик келәчәк күтүп турғанлиғиға ишинимән. Һазирму һаятимиз яман әмәс. Амма алдики вақитта бизни буниңдинму яхши йеңилиқлар күтүватиду, дәп ойлаймән. Бир сөз билән ейтқанда, елимиз йеңилиниш йолиға чүшти. Ахирқи йеңилиқларни аңлап, хошаллиғимизда чәк йоқ. 
Болупму, йеқинки Мәктүптин 2028-жилғичә аялларниң пенсия йешиниң 61 яшқичә қалдурулуп, 2023-жилниң 1-январидин башлап бала күтүми үчүн төләм һәққи төләш муддитиниң бир йерим яшқа толғичә узартилидиғанлиғини, һәр бала 18 яшқа толғичә Миллий фондниң һесавидин һесап-чотиға ахча топлинидиғанлиғини аңлап, бешим көккә йәткәндәк болди. Йеңи вә Адаләтлик Қазақстанда буниңдинму яхши йеңилиқлар йүз бериду, дәп үмүт қилимән. 
  Шахинур ӘМИРДИНОВА, башланғуч синип муәллими: 
— Йеңи вә Адаләтлик Қазақстанда һәммә нәрсә башқичә болиду дәп ойлаймән. Йеңи Қазақстан – йеңи идеяләр асасида барлиққа келиду. Шуңа яшларни иш билән тәминләш, уларниң жуқури өрлишигә имканийәт яритиш мәсилилиригә чоңқур көңүл бөлүнсә дәймән. 
Әпсуслинарлиғи, дөлитимиздә яшларниң ишқа кириш мәсилисидә нурғун тосалғулуқлар бар. Туққанвазлиқ, парихорлуқ кесилидин техичә үзүл-кесил қутулалмайватқанлиғимиз ялған әмәс. Җәмийитимиздики мана шундақ адаләтсиз иш-һәрикәтләрниң ақивитидин көплигән яшлар өз мутәхәссислиги бойичә иш тапалмай жүриду. Һәтта қизил дипломини сандуғида сақлап, базар яқилап жүргән яшлиримизниң қариси көпәймәктә. Мениң арминимдики Йеңи Қазақстан – яшларни һәртәрәплимә қоллайдиған дөләт болуши керәк. Яшлардики Вәтәнгә дегән муһәббәтни ойғитиш – Вәтәнниң яшларға дегән муһәббити арқилиқ әмәлгә ашиду. 

P/S: һөрмәтлик оқурмән, Йеңи вә Адаләтлик Қазақстанни Сиз қандақ тәсәввур қилисиз? Пикриңизниң гезитниң сайти арқилиқ изһар қилсиңизму болиду.
 Уйғур наһийәси.

642 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы