• Әхбаратлар еқими
  • 08 Қыркүйек, 2022

Иш бабидики сәпәрдә болди

Президент Қасым-Жомарт Тоқаев Қостанай вилайитидә иш бабидики сәпәрдә болди. 
Дөләт рәһбири регионға келиши билән вертолетта Әулиекөл наһийәсидә орун алған тәбиий өрттин зәрдап чәккән территорияләр үстидин учуп, әһвални көздин кәчүрди. 
Президент Қасым-Жомарт Тоқаев андин кейин Қостанай вилайитидә өртни йоқ қилиш бойичә оператив штабниң мәҗлисини өткүзди. 
Дөләт рәһбири пәвқуладдә вәзийәтләр министри Юрий Ильинниң вә Қостанай вилайитиниң һакими Архимед Мухамбетовниң өртни тохтитиш, аһалилиқ пунктлардин гражданларни эвакуацияләш вә зәрдап чәккәнләргә ярдәм қилиш бойичә көрүлүватқан чариләр тоғрилиқ докладлирини тиңшиди. 
Президент региондики вәзийәтниң назарәт астида екәнлигини тәкитлиди. Тәбиий апәтни тохтитиш бойичә зөрүр болған барлиқ чариләр көрүлди. 
Дөләт рәһбири шундақла йүз бәргән әһвалдин тегишлик савақ елишқа чақирди вә оператив штабқа отни чапсанирақ толуқ тохтитиш үчүн барлиқ идариләрниң үзлүксиз ишлишини тәминләшкә қаритилған бирқатар ениқ тапшурмиларни бәрди. 
Президент өз өйлирини ташлап кетишкә тоғра кәлгән адәмләргә ярдәм қилишниң муһим екәнлигини тәкитлиди. Һөкүмәткә вә Қостанай вилайитиниң һакимлиғиға зәрдап чәккән гражданларға ярдәм пули вә компенсация төлинишини чапсан тәртиптә тәминләш тапшурулди. 
– Зәрдап чәккәнләрниң һәммисигә зөрүр болған ярдәм қилиниду. Улар бехәтәр җайларға көчирилди. Мениң тапшурмам бойичә Һөкүмәт тегишлик мәсилиләрни һәл қилиш билән шуғуллиниватиду. Мундақ ярдәмниң көрситилидиғанлиғиға мунасивәтлик һечқандақ шәк-шүбһә болмаслиғи керәк! – дәп билдүрди Қасым-Жомарт Тоқаев. 
Дөләт рәһбири шундақла өрт сәвәплирини ениқлаш вә тегишлик савақ елишниң муһим екәнлигини атап көрсәтти. 
Униң сөзичә, орман фондини әслигә кәлтүрүш вә келәчәктә бу хилдики еғир әһвалларға йол қоймаслиқ мәхситидә, профилактикилиқ ишни тәминләш бойичә комплекслиқ чариләрни ишләп чиқиш керәк. 
Президент кеңәшмә давамида Пәвқуладдә вәзийәт министрлигини идарә хадимлириниң иҗтимаий, шу җүмлидин турушлуқ өй вә ятақханилар билән тәминләшкә мунасивәтлик мәсилилирини, шундақла кадрларниң кәспий тәйярлиқ дәриҗисини ашуруш мәсилилирини һәл қилишқа қабилийәтлик институт сүпитидә җиддий мустәһкәмләшниң зөрүр екәнлигини қошумчә тәкитләп өтти.
Дөләт рәһбири шундақла пәвқуладдә вәзийәтләр, ички ишлар һәм мудапиә министрликлириниң шәхсий тәркиви вә өрт өчиришкә җәлип қилинған пидаийлар билән учрашти. 
Қасым-Жомарт Тоқаев пәвқуладдә вәзийәтни йоқитишқа қатнашқучиларниң һәммисигә көрсәткән әрлиги үчүн миннәтдарлиқ билдүрди вә уларниң мукапатларға тәвсийә қилинидиғанлиғини тәкитлиди. Президент кадрларни маддий җәһәттин, турушлуқ өй билән тәминләш вә тәйярлаш үчүн шараит яритиш чарилириниң көрүлидиғанлиғини қошумчә қилди.
Дөләт рәһбири оператив штаб мәҗлиси аяқлашқандин кейин өрттин зәрдап чәккән Аманқарағай йезисини көздин кәчүрди.
Президент шундақла Әулиекөл йезисидики мәктәптә қанат яйдурулған эвакуация пунктини зиярәт қилди. 
Бу йәрдә Қасым-Жомарт Тоқаев Қостанай вилайитидә орманда йүз бәргән өрттин зәрдап чәккәнләр билән учрашти вә инсанпәрвәрлик ярдәмни тәхсим қилиш пунктиниң иши билән тонушти.
Дөләт рәһбири Һөкүмәтниң әһвални түзитиш үчүн барлиқ чариләрни көридиғанлиғини вәдә қилди. 
– Әпсуски, күчлүк өрт йүз бәрди. Шундақ болсиму ярдәм көрситилиду. Һөкүмәт икки йерим ай ичидә силәргә йеңи өйләрни селип бериду, униң үстигә улар силәрниң илгәрки өйлириңларға қариғанда бирталай яхши болиду, – деди Президент.
Қазақстан Президенти шундақла вилайәт турғунлири билән учришип, уларни азаплаватқан һәм тәшвишләндүрүватқан мәсилиләргә қулақ салди. 
Президентқа мураҗиәт қилған әр киши һакимлиқ өйини сахта һөҗҗәтләр билән башқа бирлириниң намиға рәсмийләштүргәндин кейин, аилисиниң баш-панасиз қалғанлиғи тоғрилиқ ейтип бәрди. Дөләт рәһбири уни диққәт билән тиңшиди вә проблемисиниң һәл болушиға ярдәм қилидиғанлиғиға вәдә бәрди.
Мәлумки, Қостанай вилайитидә өрт 2-сентябрь күни күндүзи орманда башланди вә аһалилиқ пунктларни өз ичигә алди. 4-сентябрьда өрт мәйдани 43 миң гектардин ешип кәтти. 
Пәвқуладдә вәзийәтләр министрлиги оператив штабиниң ахирқи мәлуматлириға қариғанда, бәш участкида – Аманқарағай, Лесное, Озёрное, Бағаналы вә Калинино йезилири йенида, шундақла умумий узунлуғи бәш километр чиқидиған орман зонисида өрт өчириш давамлишиватиду. 
Өрт 91 турушлуқ өйгә: Аманқарағай йезисида – 85, Озёрное йезисида алтә өйгә зәхмә йәткүзди. Өрт өчиришкә 2 193 адәм, 224 техника бирлиги, алтә вертолёт, бәш өрт өчириш поези җәлип қилинди.
Он бир адәм йеник вә оттура дәриҗидә зәрдап чәкти, 1935-жили туғулған бир әр киши қаза болди. 

518 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы