• Әхбаратлар еқими
• 15 Қыркүйек, 2022

Қазақстанда йеңи рекорд тиркәлди

Нур-Султандики Течлиқ вә разимәнлик сарийида «Дуния музыкиси» лайиһиси даирисидә «The most nationalities in an orchestra» намлиқ концерт өтти. VІІ Дуниявий вә әнъәнивий динлар лидерлири қурултийиға беғишлинип, мәхсус уюштурулған программида «Әң көпмилләтлик оркестр» нами бойичә йеңи дуниявий рекорд тиркилип, Гиннесниң Рекордлар китавиға кирди.
 Йеңи тәшәббусниң асасий мәхсити — елимизниң көпмилләтлик вә толерантлиқ екәнлигини дунияға кәң тәшвиқат қилиш. Һазир дуния Қазақстанни 100дин ошуқ милләт вә 18 конфессия вәкиллири яшайдиған мәмликәт сүпитидә етирап қилиду. 
 Мәдәний чарә-тәдбиргә Парламент Сенатиниң рәиси, Дуниявий вә әнъәнивий динлар лидерлири кативатиниң рәһбири Маулен Әшимбаев қатнашти. У өз сөзидә VІІ қурултайниң тарихий әһмийитигә тохтилип, форумниң динларара вә цивилизацияләрара диалогни риваҗландуруштики алаһидә ролиға тохталди. 
«Новәттики қурултай сани җәһәттинла әмәс, қатнишидиған дин лидерлириниң мәртивиси вә дәриҗиси тәрәптинму тарихий вақиә болуп һесаплиниду. Мошу форумға қатнишиш үчүн дунияниң 50 дөлитидин 100дин ошуқ делегат келиду. Қурултайда течлиқни тәминләшкә, диалог билән һәмкарлиқ идеологиясини риваҗландуруш мәсилилири муһакимә қилиниду. Һазир дунияда сәясий боһран йүз бериватиду. Рәһбәрләрниң музакириләр жүргүзүши вә келишимгә келиши қийин болмақта. Әйнә шундақ әһвалда мәнивий рәһбәрләрниң бирлишип ишләшкә вә дунияниң җай-җайлиридики җиддий мәсилиләрни көтирип, уларни һәл қилишқа интилишини алаһидә тәкитлигән тоғра», – деди М.Әшимбаев. 
 Сенат рәиси чарә-тәдбирни уюштурғучилар вә музыкантларнийеңи рекордниң тиркилиши билән тәбрикләп, сәнъәттә чегара болмайдиғанлиғини, музыка инсанийәтни дайим яхшилиққа башлайдиғанлиғини ейтти.
«Мәдәнийәт вә сәнъәт миллитигә, диниға вә ижтимаий әһвалиға қаримастин адәмләрни бириктүрүш қудритигә егә. Бүгүн биз тарихий вақиәниң гувачиси болдуқ. Рекордниң VІІ Дуниявий вә әнъәнивий динлар лидерлириниң қурултийи һарписида тиркилиши алаһидә мәзмунға егә. Бу – бизниң елимиз үчүнла әмәс, дуния үчүн, болупму һазирқидәк қийин әһвалда муһим вақиә. Йеңи лайиһиниң асасий мәхсити VІІ қурултайниң идеологиялик йөнилиши билән толуқ уйғун келиду. У—диалог, һәмкарлиқ вә дуниядики һазирқи жиддий мәсилиләрни бирлишип һәл қилиш охшаш әвзәлликләр», – деди Сенат рәиси.
 Тәкитләш лазимки, «Әң көпмилләтлик оркестрниң» тәркивидә 75 милләтниң вәкили бар. Барлиқ музыкантлар – жумһурийәтлик вә хәлиқара конкурсларниң лауреатлири. Концертлиқ программа давамида Қазақстан Җумһурийитиниң талланма оркестриниң, Е.Рахмадиев намидики дөләт академиялик филармония камерилиқ хориниң орунлишида қазақстанлиқ муәллипләрниң музыкилиқ композициялири орунланди. Шундақла уссул ансамбильлири һәм башқиму сәнъәткарлар һүнәрлирини намайиш қилди.